ပ္ဍဲပွိုင်ဍုင်မုဟ်ဍုင်၊ တွဵုရးဍုင်မန်ဝွံ ကၠောန်သ္ပပေဲါရုဲစှ် သ္ကိုပ်အုပ်ဓုပ်အရာပ်/ကွာန်တၟိကီုလေဝ် ညးမိက်ဂွံကေတ်တာလျိုင် ပရေင်အုပ်ဓုပ် ကေုာံ ညးစိုတ်လုပ်စအောန်ဂှ်ရ သ္ကိုပ်အုပ်ဓုပ်တြေံကၠာတေံဟေင် က္လေင်အုပ်ဓုပ်မံင်ရောင် ဂွံတီကေတ်ရ။
နကဵုဗၞတ်ဗ္ၜတ်အလုံမွဲပွိုင်ဍုင်မ္ဂး စဵုကဵုဂိတုဂျူလာင်အိုတ်ဂှ် ၝောံဍုင်မုဟ်ဍုင် (၃) ကွာန်တံင်ပိုအ်၊ ကွာန်ဟဗုဲ(ကွမ်းကဗွီး)၊ ထုင်မင်၊ ဝင်ဒုန်၊ အခေါန်၊ ဝါကလိ ကေုာံ ဍုင်ကၟာဝက်အရာပ်လ္ၚဵုတံဟေင် ရုဲစှ်သ္ကိုပ်အုပ်ဓုပ်တၟိမာန်ရ။
ဒၞာဲသ္ကိုပ်အုပ်ဓုပ်ကွာန်/အရာပ်လ္တူဍုင် မသှ်ေမံင်တံဂှ် ပရေင်ပြံင်လှာဲဟွံမွဲမွဲသာ်တုဲ ဥက္ကဌတြေံ မကေတ်မံင်တာလျိုင်သၞာံလအ်တံဂှ်ဟေင် ဆက်စွံအာလဝ်နွံရောင် ညးဗြဴဒေသပွိုင်ဍုင်မုဟ်ဍုင်မွဲတၠ ဟီုရ။
“တြေံဂှ်ဟေင် ဒးရုဲစှ်ဏာရ။ မၞိဟ်ပ္ဍဲကွာန်တံ ကောံထောံညိညိတုဲတှ်ေ ပ္တိုန်ဏာတၟိရ။ အခိင်လၟုဟ်ဏံ ညးလုပ်ပြိုင်၊ လုပ်ကၠောန်လေဝ် ဟွံမွဲပုဟ်။ ဒၞာဲဒပ်ပၞာန်ထိင်ဒဝ်ဂှ်တှ်ေ ညးဂှ်တိုန်တိုန် ဍေံတံဟေင် အဝဵုနွံရ။ ပ္ဍဲမုဟ်ဍုင်ဂှ် ပၠန်ဂတးလေဝ် ချဳဓရာင်မံင်တှ်ေ အကြာၜါလ္ပာ်ဂှ် ဒှ်ခက်ခုဲကွေံကွေံရ” သာ်ဝွံ ညးဟီုရ။
သ္ကိုပ်အုပ်ဓုပ်ကွာန်/အရာပ်တၟိတံဂှ်ဝွံ မၞိဟ်စုက်လုပ်ကဵု ဗော် USDP ၊ မၞိဟ်ဒပ်ပၞာန်ဗ္ဂေတ်မာန်တံဂှ်ဟေင် ရုဲစှ်ပ္တိုန်ဏာလဝ်ရောင် ဂွံတီကေတ်ရ။
ပ္ဍဲကဵုရုဲစှ်ပရေင်အုပ်ဓုပ် အရာပ်ၝောံဍုင် (၃) ဂှ်လေဝ် ပရေင်ကၠးဖ္ဍးဟွံမွဲမွဲသာ် ကၠောန်သ္ပဏာလဝ် နကဵုဂကောံစုက်လုက်မၞိဟ်အောန်တံဂှ်ဟေင် ညးဒေသဍုင်ကၟာဝက်မွဲတၠ ဟီုရ။
“ပေဲါရုဲစှ်မၞိဟ်ဇၞော် အရာပ်ၝောံဍုင် (၃) ဂှ် ကော်ညးကြပ်ကဵု သ္ကိုပ်စှ်သ္ၚိဂှ်၊ မွဲသ္ၚိညးစၞးမွဲတၠ ဂးတုဲ ကၠုင်လေဝ် ဟွံကဵုပရိုင်ပုဟ်။ နကဵုသ္ၚိတ်သ္ၚိတ်ဇြဇြ သ္ကိုပ်ကၠံသ္ၚိ (၃) တၠဂှ်လေဝ် မၞိဟ်ညးတံဟေင် ဂွံအခေါင်ကၠောန် ဂးမံင်တှ်ေ ဟွံပြေပြံင်ပုဟ်။ ပရေင်ကၠးဖ္ဍးဟွံမွဲပုဟ်” သာ်ဝွံ ညးဟီုရ။
ဗွဲကြဴနူဒပ်ပၞာန်သီအဝဵုတုဲ မွဲကရောံကဵု ပဋိပက္ခရပ်လွဟ်ဂှ်မ္ဂး ပ္ဍဲကဵုတိဍာ် ဂကောံပၠန်ဂတးကဵု ဂကောံဒပ်ပၞာန် ပြိုင်ပ္ကာန်ထိင်ဒဝ်ဂှ် ဒးဆဵုဂဗမံင် ဘဲအန္တရာဲ ပရေင်ဂီုကၠီုကဵု ပရေင်ဇြဟတ်ဓရိုဟ်ဇဳဂှ်ရ ညးကေတ်တာလျိုင် ပရေင်အုပ်ဓုပ်အောန်စှ်ေကၠုင် ကၠးကၠးဖ္ဍးဖ္ဍးတုဲ ဒၞာဲလ္ၚဵုတံဂှ် ခါန်ကၞက်ဟွံမာန်ရ။
တွဵုရးဍုင်မန်ဝွံ ပ္ဍဲကဵုအလုံမွဲကၟိန်ဍုင်မ္ဂး ဒှ်ဒေသ သ္ကိုပ်အုပ်ဓုပ်ကွာန်/အရာပ် ဒးဒုင်ကၠတ်ဂစိုတ်ဂၠိုင်အိုတ်မွဲရဂှ်လေဝ် ဂကောံလ္ၚတ်သေနင်္ဂမဟာဗျူဟာ မစုက်လုက်ကဵုဂကောံဒပ်ပၞာန်တံ လလောင်ပ္တိတ်လဝ်ရ။
အတိုင်သၞောဝ်ဥပဒေအုပ်ဓုပ် (၂၀၁၂) ဂကောံကွာန် (ဝါ) အရာပ်ဂှ်မ္ဂး အခိင်ကာလတာလျိုင် သ္ကိုပ်အုပ်ဓုပ်ကွာန်/အရာပ်တံဂှ် အတိုင်အာယုက်တာလျိုင်သမ္မတတုဲ မွဲအဆက်ဓဝ် ဂၠိုင်နူၜါဝါ ဟွံဂွံရဂှ် ဓမံက်ထ္ၜးလဝ်ရ။
အတိုင်သၞောဝ်ဥပဒေအုပ်ဓုပ်ကွာန်/အရာပ်ဂှ်မ္ဂး ပ္ဍဲကာလရုဲစှ် သ္ကိုပ်အုပ်ဓုပ်ကွာန်/အရာပ်ဝွံ တင်သ္ဂုတ်သွာတ် သ္ကိုပ်အုပ်ဓုပ်အဆံင်ပွိုင်ဍုင်ဂှ် ဒှ်အဓိကတုဲ ဒၞာဲသ္ကိုပ်ဓုပ်အရာပ်သၠးမ္ဂး ညးကလိဂွံမာဲဂၠိုင်အိုတ်ဒုတိယဂှ် ခါန်ကၞက်မာန်တုဲ ယဝ်ညးဟွံကၠောန်မ္ဂး သ္ကိုပ်ကၠံသ္ၚိ မထေက်ကြိုက်ဂှ် ကဵုလဝ်ဒၞာဲယာယဳကီု၊ ပရေင်ရုဲစှ်တၟိကီု ဒးကၠောန်သ္ပရေင်တၠုင်ရောင် ဓမံက်ထ္ၜးလဝ်ရ။