ပ္ဍဲသ္ကုတ်သၠုင်ကျာ တွဵုရးဍုင်မန်ဝွံ နူကဵုရုင်စက်ကမၠောန်ထ္ၜိုတ် အဓိကကၠောန်ဒၟံင် နဒဒှ်ကမၠောန်ပရေင်ပိုန်ဒြပ် ကေုာံ ပရေင်တဵုလွဳဂှ် အပ္ဍဲကသီုဏံ ဟိုတ်နူသၟူထ္ၜိုတ်ပရေံပရေံသ္ကာတ်မြဟ်ဂၠိုင်ဂှ်ရ ဒးဆဵုဂဗမံင်ကဵု ဘဲအန္တရာဲ/ပြဒ္ဒညာ ပရေင်ထတ်ယုက်ရောင် ညးဒေသဒၟံင်တန်တဴကြပ်ရုင်စက်တံ ဟီုကဵုဌာန်ပရိုင်ဗၠးၜးမန် IMNA ရ။
ပ္ဍဲပွိုင်ဍုင်မုဟ်ဍုင်ဝွံ ရုင်စက်ထ္ၜိုတ်ဇၞော် ဟွံအောန်နူ (၆) ရုင်နွံတုဲ ရုင်ခြိုင်စွံနွံဗွဲမဂၠိုင်ဂှ်ရ အခိင်ဗ္တံမ္ဂး ညးဒၟံင်တန်တဴကြပ်ရုင်စက်တံ ဒးယီုမံင်သၟူကျာထ္ၜိုတ်ပရေံပရေံရောင် ဂးရ။
ဟိုတ်နူသၟူပရေံပရေံဂှ်ရ မပ္တံက္ဍိုပ်ဂိ၊ ဗ္ၜူ၊ တိက်ဟွံသၠိင်၊ ဂအအ် ကေုာံ ယီုဝါတ်ဂမၠိုင် ကတဵုဒှ်မံင်မွဲနှေံမွဲနှေံတုဲ ညးအာယုက်ဇၞော်ကဵု ကောန်ၚာ်ဍောတ်သွတ်တံ သာတုဲဒးဆဵုဂဗဂၠိုင်မံင်ရောင် ညးဒေသမုဟ်ဍုင် ဒၟံင်တန်တဴကြပ်ရုင်စက်မွဲတၠ ဟီုရ။
“အခိင်ဗ္တံတှ်ေ သၟူကာတ်ကွေံ။ ကၟာတ်လဝ်ဗ္တင်တြင်လေဝ် သၟူလုပ်ကၠုင်ဂှ်ရ။ ဒၞာဲရုင်စက်ကွာန်တာဂှ်တှ်ေ တတ်အာကဵုကာလေဝ် မိက်ဂွံဂအအ်မံင်။ မၞိဟ်မံင်တန်တဴဒၞာဲဂှ်တှ်ေ ပဟီုရ။ ဗ္တံတိက်ဟွံလှိင်လေဝ်နွံတုဲ ကောန်ၚာ်တံလေဝ် ခ္ဍက်ကီု၊ ယီုဟွံဖဲကီု ဒှ်မံင်” သာ်ဝွံ ညးဟီုရ။
ပ္ဍဲကာလဍာ်ဇမၠိင်မ္ဂး ဒးဆဵုဂဗကဵု ပြဒ္ဒညာပရေင်ထတ်ယုက် သာတုဲပရေံဂၠိုင်ကၠုင်ရဂှ်လေဝ် ဒှ်မံင်ဂဝိင်ရောင် ညးဆက်ဟီုလဝ်ရ။
ပ္ဍဲကာလဗုတ်ထ္ၜိုတ်တၞးမ္ဂး ဟိုတ်နူဍာ်ထ္ၜိုတ်ကဵု ဓာတ်အေက်အေတ်တုဲ သၟူပရေံပရေံ၊ ဍာ်အုဲအုဲတိတ်ကၠုင်ဂမၠိုင်ဂှ် ဟွံကၠဟ်သောင်သအးထောံ ဗွဲမစှ်ေသၞောတ်ဂှ်ရ သၟာင်နူဂၠးကျာကၠိပပ်တုဲ ဒးဇီုကပိုက်ကဵု ဘဲအန္တရာဲပွဳပွူသဘာဝရ။
နကဵုညးဒေသတံဝွံ ဆေင်စပ်ကဵုသၟူပရေံပရေံဂှ်တုဲ ကေင်တေင်လဝ်ကဵု ညးတာလျိုင် အလဵုအသဳအဆက်ဆက်ကီုလေဝ် သၟာင်နူစှ်ေစၟဳစၟတ်ဗလးတိဂှ်မ္ဂး ကေတ်အရေဝ်ဗွဲမစိုပ်တရဴဂှ်လေဝ် ဟွံမွဲကၠုင်ဏီရောင် ဂးရ။
“ကၠာတေံ ကေင်တေင်လဝ်ကီုလေဝ် ၜိုတ်ကၠုင်စိုပ်စၟဳစၟတ်ဟေင်တုဲ ဂွံကေတ်အရေဝ်ဗွဲမစိုပ်တရဴဂှ် ဟွံဆဵုပုဟ်။ ရုင်စက်တံလေဝ် လအ်ခ္ဍင် သာတုဲသၟူပရေံကၠုင်ခ္ဍင်ရ။ ညးဒေသတံလေဝ် သွက်ဂွံအာတေင်ကဵု အမာတ်မန်တံနွံ” သာ်ဝွံ ညးဗြဴဒေသမုဟ်ဍုင်မွဲတၠ ဟီုရ။
သ္ကုတ်သၠုင်ကျာတွဵုရးဍုင်မန်ဝွံ ဒှ်ဒေသကၠအ်အလဵုအသဳကဵု တဵုလွဳကၠောန်ပ္တိတ်ကမၠောန်ထ္ၜိုတ် ပုဂ္ဂလိကဂၠိုင်အိုတ်ဂှ်ရ ပ္ဍဲကဵုကွာန်/အရာပ်ဂမၠိုင်ဂှ်လေဝ် သၟူပရေံပရေံမတိတ်ကၠုင် နူကဵုဗုတ်ထ္ၜိုတ်တၞးဂှ် ဒးဒုင်ယီုမံင်ရိုဟ်တ္ၚဲရ။
ပ္ဍဲကာလကၠောန်ပ္တိတ်ထ္ၜိုတ်မ္ဂး ပွမစကာ ကပေါတ်ဓာတု၊ သၞောတ်ခြိုင်စွံ ကပေါတ်ထ္ၜိုတ်အပြောံ ကေုာံ ပွမသအးဍာ်ပရေံပရေံ ဟွံရုံဂပ်ဂှ်ဝွံ သကဵုသၟူပရေံပရေံ ကတဵုဒှ်ကၠုင်အဓိကကီုရောင် အတိုင်ညးလ္ၚတ်ဆေင်စပ်ကဵု ပွဳပွူသဘာဝတံ ဟီုဂးလဝ်ဂှ် ဂွံတီကေတ်ရ။
ဟိုတ်ဂှ်ရ နကဵုညးတာလျိုင်ရုင်စက်ထ္ၜိုတ်တံဝွံ ညံင်ဂွံဂၠာဲနဲကဲဖအောန်ဖျေံ သၟူပရေံပရေံဗွဲမပြဟ်ကီု၊ ဍာ်ပရေံပရေံဂမၠိုင်ဂှ်လေဝ် ညံင်ဂွံသအးပသောင်ထောံ ဗွဲမကိတ်ညဳကဵု သၞောတ်ပွဳပွူသဘာဝကီုတုဲ နူကဵုဌာနပရေင်ထတ်ယုက် ကေုာံ ပရေင်ထိင်ဒဝ်ပွဳပွူသဘာဝတံလေဝ် ကၠောန်သ္ပရေင်တၠုင်ကဵု ပရေင်စၟဳစၟတ်ဗလးတိလၟေင်ဍာံညိဂှ် ညးဒေသတံ မနွံပၟိက်ဒၟံင်ရ။