ပ္ဍဲတွဵုရးကရေင်ကဵု တွဵုရးဍုင်မန်ဂှ် စဵုစိုပ်ဂိတုအဝ်ဂါတ် စၟတ်တ္ၚဲ (၁၃) ဗြဲဇၞော်ဆက်ဂူမာန်တုဲ စွံသတိကဵု ဘဲအန္တရာဲသဘာဝညိဂှ် နူကဵုဌာနဗြဲကျာတအ် လလောင်ပ္တိတ်လဝ် ပ္ဍဲဂိတုအဝ်ဂါတ် စၟတ်တ္ၚဲ (၁၀) ဏံရ။
ပ္ဍဲဗလးၜဳကပ္ပလဳကဵု ၜဳဘင်္ဂလာတအ်ဂှ် ဟိုတ်နူအသိင်ကျာမုတ်သုန်ခိုဟ်မံင်ကီု၊ မတ်ဗြဲဂၠုခိုဟ်မံင်ကီုတုဲ စနူအဝ်ဂါတ် စၟတ်တ္ၚဲ (၁၀) ဏံတုဲ စဵုစိုပ် စၟတ်တ္ၚဲ (၁၃) တေံမ္ဂး ပ္ဍဲတွဵုရးကရေင်ကဵု တွဵုရးဍုင်မန်တအ်ဂှ် ဗြဲဇၞော်ဂူ နကဵုက္ဍိုပ်ကၠံပေင်င်မာန်ရောင်ဂှ် ဌာနက္ဍိုက်ပ်ဗြဲကျာတအ် လလောင်ပ္တိတ်လဝ် တင်ကဵုသတိရ။
ပြဟ်ဟ်ဏံ ပ္ဍဲဍုင်မတ်မလီုကဵု ဘာအင် ဒၞာဲဒေသတိသဝ်လ္ၚဵုတအ် ဍာ်ကလိုပ်လုပ်မံင်တုဲ ဟိုတ်နူဗြဲဂူမံင်အဆက်က်ကီု၊ ဍာ်ဒဵုစှ်ေဂၠိုင်မံင်ကီုတုဲ ဍာ်ၜဳလေဝ်သၠုင်တိုန်စိုပ်အာ စဵုကဵုကဆံင်ဒးဒှ်ဓဝိင်နွံရောင် ညးဒေသတအ်ဟီုရ။
“လၟုဟ်ဏံ ဗြဲဂူမံင်ညိညိရ။ အဏံဗြဲဂူဆက်မံင် မွဲသတ္တာဟပြင်ရ။ အရာပ်ပိုဲဏံ ဗၠးမံင်ဍာ်ရ။ ဆဂး အရာပ် (၉) တေံ သဝ်မံင်တုဲ ဍာ်လုပ်မံင်ယျ။ ဗြဲဂှ် တရိုပ်မွဲလစုတ် ဍးမွဲလစုတ်ရ။ တုဲဍာ်ၜဳလေဝ် တိုန်မံင်တၟာဂလိုင်ရလေဝ်” သာ်ဝွံ ညးဒေသဘာအင်မွဲတၠ ဟီုရ။
ဟိုတ်နူဗြဲဂူတရိုပ် ကျာပိုက်ဗွဲမသ္ကာတ်မြဟ်တုဲ အန္တရာဲသဘာဝ မပ္တံကဵု တိလာ်စှ်ေကဵု ဍာ်ဇၞော်ဍာ်ကလိုပ်တအ် အခိင်ဟွံရုဲ က္တဵုဒှ်မာန်တုဲ ညးဍုင်ကွာန်တအ်လေဝ် ပြဟ်ဒုင်စဵုဒၞာ ဒၟံင်နွံရ။
အတိုင်ဌာနဗြဲကျာတအ် တော်ခယျလဝ် အာဂတပွိုင် (၂) တ္ၚဲဏံမ္ဂး ရးဒေသေဇၞာ်ဗဂေါ၊ ရးဒေသေဇၞာ်ဨရာဝတဳ၊ ရးဒေသေဇၞာ်တနင်သဳ၊ တွဵုရးကချေင်၊ တွဵုရးကရေင်၊ တွဵုရးဍုင်မန်၊ တွဵုရးရခေင်ကဵု တွဵုရးသေံဗၟံက်တအ်ဂှ် ဒၞာံအပြံက် ဗြဲဇၞော်ဂူမာန်ရောင် ဓမံက်ထ္ၜးလဝ်ရ။
တွဵုရးကရေင်ကဵု တွဵုရးဍုင်မန်တအ်ဂှ် ဇၞာပ်သၞာံ ဟိုတ်နူဗြဲဇၞော်ဂူတရိုပ်မံင်တုဲ အန္တရာဲသဘာဝတအ် က္တဵုဒှ်မံင်လၟိုန်ရ။ ဒၞာဲဒေသကြပ်ကဵု ဍာ်ၜဳကြုင်တအ်ဂှ် ဍာ်ဗၠိုက်ဂၠိုင်တုဲ လ္ပါ်သကုတ်ကုန်ဒဵုတအ်ဂှ် ဒးဒုင်ဇီုကပိုက်ဘဲတိလာ်ဂၠိုင်ရ။ သၟာင်နူဂှ်ပၠန် အခိင်ဗြဲဇၞော်ဂူမ္ဂး ဘဲကျာမေလံင်ပိုက်ကီု၊ ဂဂဵုဂတးပန်ကဵု တၞံဆုဒေါမ်တအ်လေဝ် က္တဵုဒှ်မံင် ဟွံလအ်ဟွံလအ်ကီုရ။
ဟိုတ်ဂှ်ရ ပ္ဍဲအခိင်ကသီုဏံ ညံင်ဂွံဒစးဒုင် ပလေဝ်ပလေတ်လဝ် သွက်ဂွံဗၠးအန္တရာဲ ဘဲဒဏ်သဘာဝကီု၊ တင်ကဵုသတိဆေင်ကဵုဗြဲကျာတအ်လေဝ် ညံင်ဂွံမင်ဗဵုကလင်အာလၟိုန်ဂှ် ဂကောံရီုဗင်ဘဲဒဏ်သဘာဝတအ် ဖတိုက်ဖအောဝ်လဝ်နွံရ။