ပ္ဍဲပွိုင်ဍုင်မုဟ်ဍုင်၊ တွဵုရးဍုင်မန်ဝွံ သၟတ်ဒးဒုင်ရပ်လဝ် နကဵုအမိင်ဒေသန္တရတံဂှ် ဒးကဵုဒၟံင်သြန်ဟွံမွဲကဵုသၞောတ်ဗ္ၜတ်ရောင် ဂွံတီကေတ် နူညးဒေသတံရ။
ပ္ဍဲသ္ကုတ်ဂၠံင်လတက် – ဝင်ကၟံဂှ်ဝွံ ဂိတုအဝ်ဂေတ် (၅) ၊ အခိင်သဝ်တ္ၚဲ ၜိုတ် (၆) နာဍဳ သၟတ်တြုံၜါတၠ ဍိုက်ကၠုင်ကွဳလိုန်ဓာတ်ဂှ် မၞိဟ် (၄) တၠ နကဵုကယျိုင်အရာပ်တံ ဗဒေံါစၟဳစၟတ်တုဲ ရပ်ဏာရ။
သၟတ်တြုံၜါတၠဂှ်ဝွံ ဟိုတ်နူဖံက်ပ္ကဝ်အမိင်ဒေသန္တရ မတွံဂး ညးတြုံၜါတၠ အခေါင်ဍိုက်ကွဳမွဲစွံဟွံမွဲဂှ်ရ ရပ်ထိင်ဒဝ်လဝ်တုဲ ဒးပ္ညဳပ္ညပ်ကဵုလဝ်သြန် (၁၅၀) ကိုဋ်ရောင် ညးဒေသမုဟ်ဍုင်မွဲတၠ ဟီုရ။
“အကြပ်ဒပ်ကဵု မိမဂှ် ပ္ညဳပ္ညပ်ကိစ္စလှုဲတုဲ နူစဂှ်တှ်ေ အာတ် (၂၀၀) ကိုဋ်ရ။ တုဲတှ်ေ ကဵု (၁၅၀) ကိုဋ်မာန်တှ်ေ ဗလးကဵုဏောင် ဂးရ။ ဂကောံသ္ၚိကၟိန်တံ လှောဲဏာလှုဲကဵု Kapay ရ။ တုဲတှ်ေ မၞိဟ်ၜါဂှ် ဗၠးကၠုင်ရ” သာ်ဝွံ ညးဟီုရ။
ၜိုန်ဂှ်ကီုလေဝ် ကေတ်လဝ်ဖှုင်၊ ကွဳလိုန်ဓာတ် ကေုာံ ကပေါတ်ၚုဟ်မးဇၞော်ဇၞော်ဂမၠိုင် အခိင်ရပ်လဝ်ဂှ် ဟွံက္လေင်ကဵုရ။
ဂိတုဂျူလာင် စၟတ်တ္ၚဲ (၃၀) တုဲကၠုင်တေံဂှ်လေဝ် သၟတ်ကၟာဝက် က္လေင်စဴကၠုင် နူၜှ်ပ္ကဴဒ္ဂိုန်ဂှ် ဂကောံကမ္မယှေန်ပၞာန်တံရပ်တုဲ ဓရတ်အာတ်ကေတ်သြန်ဏီရ။
တုပ်သာ်ဂှ်ကီု အပ္ဍဲပွိုင်ဍုင်ပံင် ကေုာံ ပွိုင်ဍုင်သဓီု၊ ခရိုင်သဓီုဂှ်လေဝ် ဟိုတ်နူအမိင်ဒေသန္တရတုဲ ဇၟာပ်တ္ၚဲ ညးဒးဒုင်ရပ်ကေတ်အရေဝ်နွံကီု၊ ကဵုသြန်တုဲ က္လေင်နုက်ကေတ်နွံရဂှ်လေဝ် ဂွံတီကေတ် နူညးဒေသတံရ။
သၟတ်ဒးဒုင်ရပ်လဝ်ဂမၠိုင်တံဂှ် သၟာင်နူရုင်ကောပ်ကာဲမၞိဟ်လုပ်တိတ်၊ ဗဒိုပ်ဗၠာဲသၟိင်ၝောံဍုင် ကေုာံ တမ်ဒပ်ဂမၠိုင်တုဲ မပ္တံပ္ဍဲကဵုဆေင် KTV ဒၞာဲနာနာဂှ်လေဝ် ပြံင်ဆုဲထိင်ဒဝ်ဒၟံင်ရ။
သွက်လၟေင်တန်ဗ္တောန်ယိုက်ဂၠေင်ပၞာန် ကမ္မယှေန်ပၞာန်ဂှ်မ္ဂး ကိစ္စဂၠာဲရပ်စပ် ညးသ္ဂောံတိုန်တန်ဗ္တောန်ပၞာန်ကီု ကိစ္စသွံရာန်ညးတိုန်တန်ဗ္တောန်ပၞာန်ကီုဂှ် ရပ်ဂွံသၟတ်/ကလိဂွံသၟတ် အောန်စှေ်ကၠုင်ဂှ်ရ သၟာင်နူသ္ၚိကၟိန်သၞာဲဒဴတုဲ အခိင်လၟုဟ်ဏံ ဂကောံသ္ၚိကၟိန်ဒပ်ဗၠာဲသၟိင်တံလေဝ် ရပ်စပ်ကၠုင်မံင်ရောင် ဂွံတီကေတ်ရ။
ပ္ဍဲပွိုင်ဍုင်လ္ၚဵု တွဵုရးဍုင်မန်ဝွံ သွက်ဂွံဒ္ဂေတ်ဗက်အမိင်ဒေသန္တရဂှ် ထပ်ကဵုလဝ်သတိတုဲ ကွဳလိုန်ဓာတ်မွဲဖ္ဍိုက်မ္ဂး ညးတြုံၜါတၠ ဍိုက်မွဲစွံဟွံဂွံ၊ ညးဗြဴဒဳတုဲ ညးတြုံဍိုက်ဗက်လက္ကရဴဟွံဂွံ၊ (၉) နာဍဳဗ္တံတုဲ လ္ပအာကၠုင်ညိဂှ်လေဝ် တာဒၞာလဝ်ရောင် ဂွံတီကေတ်ရ။