ပ္ဍဲအရာပ်သ္ကုတ်တိသဝ် ကေုာံ လ္တူဂၠံင် ဍုင်ဘာအင်၊ တွဵုရးကရေင်ဂှ် ဍာ်စလုပ်စိုပ်ကၠုင်တုဲ ဍာ်ၜဳလေဝ် ဆက်သၠုင်တိုန်မံင်ဖိုဟ်ရောင် ဂွံတီကေတ် နူညးဒေသကဵု ဂကောံဟံင်ပြာ်ရီုဗင်မၞိဟ်တံရ။
အတိုင်ဌာနက္ဍိုက်က္ဍိုပ်ဗြဲကျာတံ စမ်ၜတ်လဝ်ဂှ်မ္ဂး တ္ၚဲဏံ ဂိတုအဝ်ဂေတ် (၁၀) ၊ အခိင်နူဂယး ၜိုတ် (၆း၃၀) နာဍဳဂှ် ဍာ်ၜဳသြင်လောန်ဝွံ နူဍာ်စၟတ်ဒှ်ဂဝိင် (၇၅၀) သေန်တဳမဳတာဂှ် သၠုင်တိုန်ကၠုင်စဵုကဵု (၈၂၀) မဳတာဂှ်ရ ဍာ်သၠုင်ၜက်ဒၟံင် နူစၟတ်ဒးဒှ်ဂဝိင် ၜိုတ် (၇၀) သေန်တဳမဳတာရောင် ဂွံတီကေတ်ရ။
ဟိုတ်နူဍာ်သၠုင်တိုန်ကၠုင်ဂှ်ရ ဒၞာဲသ္ကုတ်တိသဝ် မပ္တံဂၠံင်မေတ္တာ၊ ဂၠံင်စေတနာ၊ ဂၠံင်စှ်ပေ (ဆယ်ပေလမ်း) ၊ ဖျာလ္တူဍာ် စၟတ် (၂) ၊ အရာပ်ယှိုဲနှေန်ဇြဳ စၟတ် (၁) မၞုံလ္တူဍုင်ဘာအင်တံ ဍာ်လုပ်စိုပ်ဒၟံင်ရ။
သၟာင်နူဂှ်ပၠန် ဒေသသ္ကုတ်တိသဝ် ကြပ်က္ဍိုပ်ဒဒန် (ဆယ်အိမ်စု) ကေုာံ ပ္ဍဲအရှာံဘာသဇိုင်တန်မူလလောန် စၟတ် (၂) ၊ ဂၠံင်သၟဝ် (ကုက္ကိုလ်ပင်) ဂှ် ဍာ်လုပ်စိုပ်ဂၠိုင်မံင်တုဲ ဒၞာဲလ္ၚဵုတံဂှ် ဍာ်လ္တူဂၠံင် ၜိုတ် (၁) ပေနွံမံင်ရောင် ဂွံတီကေတ် နူညးဒေသတံရ။
“နူစၟတ်တ္ၚဲ (၈) တေံ ဍာ်တိုန်ကၠုင်မံင်သိုက်သိုက်တုဲ လၟုဟ်တှေ် ဍာ်ၜက်မံင်ကွေံကွေံရ။ ဗ္တံဂှ်ဟေင် ဍာ်တိုန်ကၠုင်ကွေံကွေံရ။ သ္ကုတ်သဝ်မံင်ဂှ်တှေ် ဍာ်လုပ်အိုတ်တးရ” သာ်ဝွံ ညးတြုံဒေသဘာအင်မွဲတၠ ဟီုရ။
ပ္ဍဲကဵုအခိင်အခါလၟုဟ်ဏံ ဍာ်ၜဳသြင်လောန်ဆက်သၠုင်တိုန်မံင်တုဲ အပ္ဍဲတ္ၚဲဂတဏံမွဲတ္ၚဲ ထပ်သၠုင်တိုန် ၜိုတ် (၁) ပေမာန်ဂှ်ရ ဆက်သၠုင်တိုန် နူစၟတ်ဍာ်ဒှ်ဂဝိင်မာန်တုဲ နကဵုညးမံင်တန်တဴဒၟံင် ပ္ဍဲသ္ကုတ်တိသဝ်တံ ပဲါဒဴအာဒၞာဲဗၠးဘဲဍာ်တေံထေက်ရောင် ဌာနက္ဍိုက်က္ဍိုပ်ဗြဲကျာတံ လလောင်ပ္တိတ်လဝ်ရ။
အခိင်လၟုဟ်ဏံဝွံ ဟိုတ်နူဍာ်ဆက်သၠုင်တိုန်မံင်ဂှ်ရ ပ္ဍဲကဵုအရာပ်သ္ကုတ်တိသဝ် ဍာ်လုပ်စိုပ်မံင်တံ ကပေါတ်ကိစ္စဇၞော်ဂှ် ပြံင်ပဆုဲဏာလဝ်တုဲ ကၠောန်သ္ပပရေင်ဒစးဒုင် ပလေဝ်ပလေတ်နွံရောင် ဂွံတီကေတ်ရ။