ပ္ဍဲတွဵုရးဍုင်မန်၊ ကရေင် ကေုာံ ရးဒေသဇၞော်တၞင်သဳ သ္ကုတ်သၠုင်ကျာကၟိန်ဍုင်ဗၟာဝွံ နူဂိတုဂျာန္နဝါရဳ စဵုကဵုဂိတုဂျောန် သၞာံ (၂၀၂၆) ဏံ ဟိုတ်နူဒပ်ကမ္မယှေန်ပၞာန်ပန်ဗ္တိုက်တုဲ ကောန်ၚာ်၊ ညးဗြဴ ချိုတ် (၃၂) တၠ၊ ဒးဘဲဝပ် (၈၄) တၠနွံရောင် ဌာန်ဒတန်အခေါင်အရာမၞိဟ်ဍုင်မန် HURFOM လလောင်ပ္တိတ်လဝ်ရ။
အပ္ဍဲကာလပွိုင် (၆) ဂိတုဏံဂှ် ဗ္တိုက်ကဵုက္ၜင်ကျာ (၁၉) ဝါ၊ ပန်ကဵုလွဟ်ဇၞော် (၄၃) ဝါ ဒပ်ပၞာန်လုတ်လောန်လဝ်ဒုဟ်နွံရောင် ဂးရ။
ဟိုတ်နူဗ္တိုက်ကဵုက္ၜင်ကျာဂှ် ကောန်ၚာ်ချိုတ် (၃) တၠ၊ ဒးဘဲဝပ် (၂၀) တၠ၊ ညးဗြဴချိုတ် (၁၂) တၠ၊ ဒးဘဲဝပ် (၁၃) တၠနွံရဂှ် HURFOM ဓမံက်ထ္ၜးလဝ်ရ။
သၟာင်နူဂှ်ပၠန် ဟိုတ်နူဗ္တိုက်ကဵုလွဟ်ဇၞော် ကေုာံ စက်ဗရုသာဲဂှ်ရ ကောန်ၚာ်ချိုတ် (၅) တၠ၊ ဒးဘဲဝပ် (၂၉) တၠ၊ ညးဗြဴချိုတ် (၁၂) တၠ၊ ဒးဘဲဝပ် (၂၂) တၠနွံရ။
“ပန်ဗ္တိုက်ကဵုၜင်ကျာ၊ ပန်ကဵုလွဟ်ဇၞော်၊ ပန်ကဵုမဝ်တာ၊ ပန်ကဵုဒရုင်တုဲတှ်ေ ပရေင်ပြုပြေင်ထ္ပက်ပၞာန်ဗလးတိဂှ် ပဵုတုဲစွံကၠုင်ပွန်ကဵု ဒၞာဲကောန်ကွာန်တံ မံင်တန်တဴဂှ်ရ။ ဟိုတ်နူပန်ဗ္တိုက်ဗီုဏံဂှ်ရ ဒၞာဲဒှ်ပေဲါဗ္တိုက်သၟးဟွံသေင်ပုဟ်။ ဒၞာဲဟွံဒှ်ပေဲါဗ္တိုက်ဂှ်လေဝ် ပရေင်ဒးဘဲချိုတ်ဂျိုင်တံနွံကၠုင်ရ” သာ်ဝွံ Program Director ဌာန်ဒတန်အခေါင်အရာမၞိဟ်ဍုင်မန် နာဲအဲမန် ဟီုရ။
ဟိုတ်နူဒပ်ပၞာန်ပန်ဗ္တိုက်ဂှ်ရ ညးဍုင်ကွာန်/ညးဒေသတံ ဒးပဲါဒဴတိတ်နူဌာန်တုဲ အဆက်ဖဵုပရေံပေဲါပၞာန်ဂမၠိုင်ဂှ် ညးဗြဴဂမၠိုင်တံ ဒးဒုင်စသိုင်ရောင် ဌာန်ဒတန်အခေါင်အရာမၞိဟ်ဍုင်မန် ဂးရ။
ဗွဲကြဴနူဒပ်ပၞာန်သီအဝဵုတုဲဂှ် ပ္ဍဲသ္ကုတ်သၠုင်ကျာကၟိန်ဍုင်ဗၟာဝွံ ကောန်ၚာ်ချိုတ် (၉၉) တၠ၊ ဒးဘဲဝပ် (၂၂၈) တၠ၊ ညးဗြဴချိုတ် (၂၇၇) တၠ၊ ဒးဘဲဝပ် (၆၂၈) တၠနွံရဂှ် ဂွံတီကေတ် နူတင်နင်ဌာန်ဒတန်အခေါင်အရာမၞိဟ် လလောင်ပ္တိတ်လဝ်ရ။