အကြာဏံဝွံ နူကဵုအမာတ်ကၠတ်ထဝ်ဍုင်မန်တအ် စှ်ေဆဵုဂဗဒၟံင် ကုညးဍုင်ကွာန်တအ်နွံတုဲ နကဵုညးဍုင်ကွာန်တအ် မုနွံပၟိက် အာတ်မိက်ပတိုန်ထ္ၜးဂွံမံင်ဟီုကီုလေဝ် နတဲကွေံကွေံဂှ် တင်အလဵုအသဳတၠအဝဵုတအ် ဖန်ကဵုဂှ်ရ ဖန်ဖက်ကဵုဒၟံင်ရောင် ညးဍုင်ကွာန်တိုန်စိုပ်လဝ် ပေါဲဆဵုဂဗကုညးဍုင်ကွာန် ပွိုင်ဍုင်မုဟ်ဍုင်မွဲတၠ ဟီုရ။
စပ်ကဵုပရေင်ဖောအ်ဗြေဝ်ညးဍုင်ကွာန်တအ်တုဲ မုညးဍုင်ကွာန်တအ်နွံပၟိက်ဂှ် နူကဵုအမာတ်ကၠတ်ထဝ်တအ် သ္ပကဵုဒဒန်တုဲ ပတိုန်ထ္ၜးကဵု စၞးဍုင်ကွာန်တအ်ရောင်၊ ပရေင်ဒတုဲဖဵုညးဍုင်ကွာန်တအ်ဂှ် အလဵုအသဳတအ် ဓမံက်ကဵုရုပ်ရဴရောင်၊ အမာတ်ကၠတ်ထဝ်တအ် ဟီုဒၟံင်ဂှ် တင်ဓမံက်ကဵုရုပ်ရဴဂှ်ရ ဓမံက်ကဵုရောင် ညးဍုင်ကွာန်တိုန်ကလင်လဝ် ပေါဲဆဵုဂဗဂှ် ဟီုရ။
“အမာတ်တအ် စှ်ေဆဵုဂဗကဵု ညးဍုင်ကွာန်တအ်ဂးတုဲ ကော်ဘိက်ကၠုင်ညးဍုင်ကွာန်တအ် ပိုဲလေဝ်တိုန်ကလင်ကီု၊ ညးတအ်ဟီုဂှ် စပ်ကဵုပရေင်ဖောအ်ဗြေဝ်ညးဍုင်ကွာန်တအ်တုဲ မုညးဍုင်ကွာန်တအ်နွံပၟိက်ဂှ် အမာတ်ကၠတ်ထဝ်တအ် ပတိုန်ထ္ၜးကဵု စၞးညးဍုင်ကွာန်တအ်ဏောင်၊ သွက်ညးဍုင်ကွာန်တအ် ဂွံဖောအ်ဗြေဝ်ဂှ် အလဵုအသဳတအ် ဒးဖန်ဓမံက်ကဵုရုပ်ရဴဏောင်၊ အမာတ်တအ်ဟီုမံင်ဂှ် အရေဝ်ဂှ်တုဲ အရေဝ်ဂှ်ပၠန်ရ ကမၠောန်ဖောအ်ဗြေဝ် ဂၠံင်ဍာန်၊ ဒဒန်၊ ဘာတအ်ဂှ် ကမၠောန်အလဵုအသဳဍုင် ဒးကၠောန်မံင်ရရဏောင်၊ အမာတ်တအ်ပတိုန်ထ္ၜးဟီုကဵုမှ အလဵုအသဳဒးကၠောန်ကဵုဟွံသေင်” သာ်ဝွံ ညးဍုင်ကွာန်ဂှ် ဟီုပါ်ပါဲရ။
စပ်ကဵုပရေင်ဖောအ်ဗြေဝ် ဒေသညးဍုင်ကွာန်တအ်တုဲ နူကဵုတၠအဝဵုအလဵုအသဳတအ် ပံက်လဝ်ကဵုအခေါင် သွက်ဂွံစှ်ေဆဵုဂဗကဵု ညးဍုင်ကွာန်တအ် ဇၟာပ်ဒေသတုဲ တင်ညးဍုင်ကွာန်နွံပၟိက်ဂှ် နူကဵုအမာတ်ကၠတ်ထဝ်ဂမၠိုင်တအ် ညံင်ဂွံက လေင်ပတိုန်ထ္ၜးကဵု အလဵုအသဳဌာနမဆေင်စပ်တအ်ဂှ် ဖျေံလဝ်ကမၠောန်ဂှ်ရ အမာတ်ကၠတ်ထဝ်တအ်ညးဂမၠိုင် ဗက်စှ်ေဆဵုဂဗဒၟံင် ညးဍုင်ကွာန်အကြာဒေသတအ်နွံရ။
ညးဍုင်ကွာန်မွဲတၠပၠန်ဂှ် “ဟီုဍာံဍာံတှ်ေ အခိင်လၟုဟ်ဂှ် ဇၟာပ်ညးဍုင်ကွာန်တအ်ဂှ် ခက်ခုဲမံင်ကဵု ပရေင်ပိုန်ဒြပ်ဖအိုတ်ရ၊ ဂွံကၠောန်ကမၠောန်ဂှ်လေဝ် ခက်ခုဲကဵု ဩန်တမ်ရိုဟ်ဟွံမွဲ၊ ညးဍုင်ကွာန်တအ် ဂွံကၠောန်ကမၠောန် စပ်ကဵုပရေင်ပတိတ် တမ်ရိုဟ်ကမၠောန် နူကဵုအလဵုအသဳ ယဝ်ဖန်ကဵု ပရေင်ဒမၠေံဩန် အိက်သာသာမာန် ဟလှေ်ခိုဟ်၊ ၜိုတ်ဆဟီုမံင် ကၠောန်ကဵုဂၠံင်ဏောင်၊ ကၠောန်ကဵုဒဒန်ဏောင်၊ သိုင်ကဵုဘာဏောင်ဟီုဂှ် ကမၠောန်အလဵုအသဳတအ် ဒးကၠောန်ရရဏောင်၊ ကၠောန်ကဵုၝစဏံတုဲတှ်ေ ညးဍုင်ကွာန်သက်သာအာ ဟွံသေင်ပုဟ်၊ ကမၠောန်ထံက်ပင်ညးဍုင်ကွာန် နတဲဍာံဍာံ ဂွံဒှ်ဗီုကဵုဒမၠေံကဵုဩန် သွက်တမ်ရိုဟ်ကမၠောန်စဏံ၊ ဖန်ထံက်ပင်ကဵု တၠကေမၠာန် ရဲတဵုလွဳစဏံ၊ ရုင်စက်စဏံ၊ ဗီု ဏံတှ်ေ ညးဍုင်ကွာန်တအ် ဒှ်ဂုန်ဖဵုဍာံဍာံ” သာ်ဝွံ ဟီုရ။
ပံက်ကဵုလဝ်အခေါင် ကုညးစၞးအမာတ်ကၠတ်ထဝ်ဂမၠိုင်တအ် သွက်ဂွံစှ်ေဆဵုဂဗကဵု ညးဍုင်ကွာန်ဒေသနာနာတအ်ဂှ် ဒှ်ကမၠောန်သွက်ဂွံထ္ၜးစမွဲတုဲ ကမၠောန်ပရေင်ဖောအ်ဗြေဝ်ဒေသတအ်ဂှ် ဒှ်ကမၠောန်အလဵုအသဳ ဒးကၠောန်ဓမံက်ရုပ်ရဴမွဲ ရတုဲ အမာတ်ကၠတ်ထဝ်တအ်ဂှ် ဒှ်သွက်ဂွံထ္ၜးစရုပ်ရဴကဵု ညးဍုင်ကွာန်တအ် အကြာ တၠအဝဵုအလဵုအသဳတအ်ရရောင် ညးဍုင်ကွာန်တံ ဟီုပါ်ပါဲရ။