ဂိတုအဝ်ဂေတ် စၟတ်တ္ၚဲ (၄) တ္ၚဲဏအ်ဝွံ ပ္ဍဲဍုင်မာဲဆံက်၊ ခရိုင်တက် ကၟိန်ဍုင်သေံဂှ် ဗၠာဲသၟိင်သေံတအ် လုပ်စၟဳစၟတ်ရပ်ဂွံ သၞာဲဒဴဌာနဗဂဵုလဟဵုဍုင်ကွာန်သေံ ကေုာံ ကောန်ဍုင်ဗၟာ (၁၂) တၠ ညးကၠောန်ပ္တိတ်ကဵုလိက်တၞးၝာတ် (၁၀) သၞာံတအ်နွံရောင် ဂွံတီကေတ်ရ။
တ္ၚဲဏအ် အခိင်နူဂယး ၜိုတ် (၆) နာဍဳဂှ်ဝွံ ညးတာလျိုင်သေံကဵု ဂကောံဗၠာဲသၟိင်သေံနာနာ လၟိဟ်ၜိုတ် (၁၃၀) တၠတအ် လုပ်စိုပ်စၟဳစၟတ် ပ္ဍဲကဵုသ္ၚိ ဒၞါဲကဵုရုင်ကၠောန်ပတိတ်လိက်တၞးၝာတ် (၁၀) သၞာံဂှ် ဂွံဆဵုကေတ် သၞာဲဒဴ ဌာနဗဂဵုလဟဵုဍုင်ကွာန်သေံ (၂) တၠ၊ ညးလျိုင်တဆံင် တွဵုရးသေံ (၃)တၠ ကဵု ကောန်ဍုင်ဗၟာတအ်ဂမၠိုင် ပါလုပ်မံင်တုဲ သၞာဲဒဴသေံမွဲတၠဂှ် ဂြိပ်ဗၠးတိတ်အာလဝ်ရ။
သၞာဲဒဴ ဌာနဗဂဵုလဟဵုဍုင်ကွာန်သေံ (၂) တၠဏအ်ဝွံ မၞိဟ်တြုံဂှ် ကေတ်လဝ်တာလျိုင် နဒဒှ်သၞာဲဒဴအလဵုအသဳ ပ္ဍဲရုင်ဌာနညးဍုင်ကွာန်တအ် ပတိုန်တၞးကာဒ်ကောန်ဍုင်တုဲ မၞိဟ်ဗြဴဂှ် ကေတ်လဝ်တာလျိုင် နဒဒှ်သၞာဲဒဴအလဵုအသဳ ရပ်ပကောံပ္ကေဝ်စရင် ပ္ဍဲရုင်ဌာနဂှ် မွဲတၠကီုရ။
အပ္ဍဲကဵုညးတအ်ကၠောန်ပတိတ်လိက်တၞးၝာတ် (၁၀) သၞာံဏအ်ဂှ်မ္ဂး ကေတ်ကၠုင်စရိတ်အကံက်အခေါန် ဩန်သေံ အကြာ (၄၀,၀၀၀)ၝာတ် ကဵု (၁၀၀,၀၀၀)ၝာတ်နွံကၠုင်ရ။
နူကဵုသၞာဲဒဴ ဌာနဗဂဵုလဟဵုဍုင်ကွာန်သေံ (၂) တၠဂှ် ဗၠာဲသၟိင်သေံတအ် ဂွံဆဵုကေတ် တၞးလိက်သက်သဳ ပွမကၠောန်ပတိတ်ကဵု ၝာတ် (၁၀) သၞာံ နကဵုမဂၞန် “0” သာ်ဏအ်ဂှ် လုပ်သၞောဝ် / ဟွံလုပ်သၞောဝ် သ္ဂောံတီကေတ်ချိုတ်ပၠိုတ်မာန်တုဲ ဗက်အာစၟဳစၟတ် ပ္ဍဲကဵုသ္ၚိ ဒၞါဲကဵုရုင်ကမၠောန်ဂှ်ရ။
သၞာဲဒဴ ဌာနဗဂဵုလဟဵုဍုင်ကွာန်သေံ (၂) တၠ၊ ညးလျိုင်တဆံင်တွဵုရးသေံ (၃)တၠ ကဵု ကောန်ဍုင်ဗၟာတအ်ဂမၠိုင်တအ်ဝွံ ညးတာလျိုင်တအ် ရပ်ထိင်လဝ် ပ္ဍဲကဵုရုင်ဗၠာဲသၟိင်သေံ ဍုင်မာဲဆံက်တုဲ ဆက်စၟဳစၟတ်ကေတ်မံင်အရေဝ်နွံရ။
ပြဟ်ဟ်ဏအ်ဝွံ စပ်ကဵုကဵုသၞာဲဒဴ ဌာနဗဂဵုလဟဵုဍုင်ကွာန်သေံ ဂြိပ်ဗၠးတိတ်အာလဝ်မွဲတၠဂှ် ညးတာလျိုင်သေံတအ် ပတိတ်လဝ်အမိင်ရပ်စပ်တုဲ ဂြိပ်ပါဲအောပ်မံင် လ္ပါ်ကဵုဍုင်ဗၟာ ဂကောံကရေင် BGF တအ်ရောင် ဂွံတီကေတ်ရ။
သၞာဲဒဴ ဌာနဗဂဵုလဟဵုဍုင်ကွာန်သေံ ညးဂြိပ်ဗၠးတိတ်လဝ်မွဲတၠဏအ်ဝွံ ညံင်သ္ဂောံရပ်စပ်ပြဟ်ဟ်မာန်ဂှ် အလဵုအသဳသေံတအ် ဂ္စာန်ဂၠိုက်ဂၠာဲ ပတိတ်လဝ်အမိင် ကဵုရပ်စပ်အာ ဗၞတ် (၁၃) ဒၞါဲနွံတုဲ တ္ၚဲဏအ် အခိင်နူဂယး ၜိုတ် (၁၀) နာဍဳဂှ် ဟီုလဝ်ပ္ဍဲပေါဲသောင်ကၠးပရိုင်နွံရောင် ဂွံတီကေတ်ရ။