ပ္ဍဲကွာန်ဇြဳပျံင် (ဇီးပြောင်း) ၊ ပွိုင်ဍုင်ကျာ်ထဝ်၊ တွဵုရးဍုင်မန်ဝွံ ဟိုတ်နူလွဟ်ဇၞော်ဒတုံခတိုဟ်အာ အပ္ဍဲသၠာတ်ပေဲါပြိုင်တေအ်မခ္ဍံကျာဂှ်ရ ကောန်ၚာ်အာယုက် (၅) သၞာံမွဲတၠ မဒးချိုတ်အာတုဲ ညးဒးဘဲဝပ် ဟွံအောန်နူ (၁၁) တၠနွံရဂှ် ဂွံတီကေတ် နူညးဒေသတံရ။
နူတနေံဏံ ဂိတုအဝ်ဂေတ် (၁၉) ၊ အခိင်ဗ္ဂါပ်ဂယး ၜိုတ် (၁၁) နာဍဳဂှ် လွဟ်ဇၞော်ဒတုံခတိုဟ်အာ ပ္ဍဲသၠာတ်မခ္ဍံကျာ (ရွာဦး) ဂှ်ရ။
ဟိုတ်နူလွဟ်ဇၞော်ဒတုံခတိုဟ်အာဂှ်ရ ကွးဘာညးတြုံ အာယုက် (၅) သၞာံ၊ တန် KG မွဲတၠ ဒးချိုတ်အာ ပ္ဍဲဒၞာဲဂှ်တုဲ ကောန်ၚာ်ပါလုပ်ကီု သီုဖအိုတ် ညးဒးအာဘဲဝပ် ဟွံအောန်နူ (၁၁) တၠနွံရဂှ် ညးဒေသမွဲတၠ ဟီုရ။
“အခိင်ကၠောန်ဗဒှ်မံင် ပေဲါပြိုင်မခ္ဍံကျာ အခိင်ကသီုဂှ် ကမ်လွဟ်ဇၞော် ဒတုံခတိုဟ်စှ်ေ ပ္ဍဲသ္ကဲသၠာတ် ပုရိသာတ်တံနွံမံင်ဂှ်ရ။ မၞိဟ်နူတုင်ဇြယာတ်လ္ၚဵုတံလေဝ် ဒးဘဲဇီုကပိုက်ရ” သာ်ဝွံ ညးဟီုရ။
ပၞောဝ်ကဵုညးဒးဘဲဝပ်ဂမၠိုင်ဂှ်ဝွံ သွက်ညးဒးဘဲဝပ်သ္ကာတ်မြဟ် (၄) တၠဂှ် အကာဲအရာ ဒးဒှ်ဓဝိင်နွံမံင်ရောင် ဂးရ။
ညးဒးဘဲဝပ်သ္ကာတ်မြဟ် (၄) တၠဂှ်ဝွံ လှောဲပြံင်ပလံင်ဗ္စိုပ်ဏာ ဇရေင်ရုင်ဂဥုဲဇၞော်ညးဍုင်ကွာန်ဗ္ဂေါ နကဵုကာတၟေင်တုဲ ညးဒးဘဲဝပ်တၞဟ်တၞဟ်ဂမၠိုင်တံဂှ် ဒုင်လွဳလွတ်ဒၟံင် ပ္ဍဲရုင်ဂဥုဲပွိုင်တိုက်တုင်ဇြယာတ်ဂှ်ရောင် ဂွံတီကေတ်ရ။
ကွာန်ဇြဳပျံင် (ဇီးပြောင်း) ဝွံ နွံဒၟံင်ပ္ဍဲတိဍာ် မဟာဒပ် (၁) ၊ ဗော်သွးကရေင် (ကေအေန်ယူ) ထိင်ဒဝ်ဂှ်တုဲ ဒပ်ကမ္မယှေန်ပၞာန်တံ ထ္ပက်ကရောင်ပၞာန် ကေုာံ ပန်ကဵုလွဟ်ဇၞော်ဆဆဵု မွဲနှေံမွဲနှေံနွံရောင် ဂးရ။