ပ္ဍဲအရာပ် “ညောင်ပင်ဆိပ်” ကေုာံ မုပေါန်၊ ဍုင်မတ်မလီု၊ တွဵုရးဍုင်မန်ဝွံ ကတဵုဒှ်အာဘဲဗၠိုက်ဍာ်ၜါဝါတုဲ ညးတြုံချိုတ်အာ (၂) တၠရဂှ် ဂွံတီကေတ်ရ။
ဂိတုအဝ်ဂေတ် (၃၁) ၊ အခိင်လဒေါဝ်တ္ၚဲဂှ်ဝွံ ညးတြုံအာယုက် (၁၉) သၞာံ ကၠောန်မံင်ကမၠောန် ပ္ဍဲ “ထွန်းသဲဆိပ်” ၊ အရာပ်မုပေါန်မွဲတၠဂှ် ဇိုင်ကလိတ်စှ်ေနူလ္တူဂၠုင်၊ ဒတုံစှ်ေအပ္ဍဲၜဳသြင်လောန်ချိုတ်အာတုဲ နကဵုပရေင်ရီုဗင်သၟာဗၠိုပ်ဍာ်တံဂှ် ဂၠာဲဆဵုကေတ်ဇွဂှ်ကီု ဂွံတီကေတ်ရ။
“ဂၠုင်ဇြောတ်ဗ္တဳဂှ်လေဝ် ကာတ်လဝ်ပ္ဍဲသြင်ရ။ နူကဵုကၠောန်မံင်ကမၠောန်လ္တူဂၠုင်ဂှ် ဇိုင်ကလိတ်စှ်ေတုဲတှ်ေ ဒတုံစှ်ၜေဳရ။ ဟိုတ်ဂှ်ရ ကာလဒးအာကၠောန်ပ္ဍဲၜဳဟွံသေင်တှ်ေ ပဠောံရီုလမျီုမၞိဟ်တံ မုတံ ဟွံမွဲပုဟ်” သာ်ဝွံ ကောန်ဂကောံဟံင်ပြာ်ရီုဗင်မၞိဟ် ဍုင်မတ်မလီု ပါလုပ်ရီုဗင် ပ္ဍဲပရူဒဒှ်ဂှ်မွဲတၠ ဟီုရ။
ကာတ် (စွံ) လဝ်ဂၠုင် ပ္ဍဲဇိုင်ၜဳတုဲ ဇြောတ်မံင်ဗ္တဳနူလ္တူဂၠုင်ဂှ်ရ အပ္ဍဲဗွိုင်ကမၠောန်ဂှ် ဟွံစကာလဝ် ကပေါတ်ဟံင်ပြာ်လမျီုရဂှ်လေဝ် ဂွံတီကေတ်ရ။
တုပ်သာ်ဂှ်ကီု ဂိတုအဝ်ဂေတ် (၃၁) ၊ နူတနေံဏံ အခိင်တ္ၚဲစေင် (၃) နာဍဳဂှ်လေဝ် ညးတြုံအာယုက် (၃၃) သၞာံ၊ ဒၟံင်တန်တဴမံင် ပ္ဍဲအရာပ် “ညောင်ပင်ဆိပ်” ၊ ဍုင်မတ်မလီုဂှ်လေဝ် ဗၠိုက်ဍာ်ချိုတ်အာလဝ် ပ္ဍဲကြုင်ကြပ်သ္ၚိဒၟံင်ဂှ်ကီု ဂွံတီကေတ်ရ။
ညးဗၠိုက်ဍာ်ချိုတ်အာတံဂှ် ဂကောံကမ္မယှေန်ပၞာန်မဆေင်စပ်တံ ကၠုင်စိုပ်စၟဳစၟတ်တုဲ ဂကောံရီုဗင်မၞိဟ်တံ ပလံင်ဗ္စိုပ်ဏာ ရုင်ပါ်ကရေက်ဍုင်မတ်မလီုရ။
ဍုင်မတ်မလီုဝွံ သၟာင်နူကြပ်ကဵုဇိုင်ၜဳတုဲ ကတဵုဒှ်ဒၟံင် ပရေင်ဍာ်ဇၞော်ဍာ်ကလိုပ်ဂှ်ရ ညးဒၟံင်တန်တဴ ကြပ်ကဵုပွဳဗွိုင်တံဂှ် ဒးစွံသတိတုဲ ယဝ်ဆဵုဂဗဘဲအန္တရာဲမ္ဂး ကဵုပရိုင်ကုဂကောံဟံင်ပြာ်မၞိဟ်အပ္ဍဲဍုင် ဗွဲမပြဟ်ညိဂှ်လေဝ် ဂကောံရီုဗင်မၞိဟ်တံ ဟီုဂးဖ္တိုက်ဖၟောဝ်လဝ်ရ။
ဂိတုအဝ်ဂေတ် စၟတ်တ္ၚဲ (၂၄) တုဲကၠုင်တေံဂှ်လေဝ် ပ္ဍဲပွိုင်ဍုင်ကအ်ကြိက်ဝွံ ဂၠုင်ဖ္ဍိုက်လဝ်ကပေါတ်ဗၞိက်မွဲဖ္ဍိုက်ဂှ် ဗ္ကပ်အာတုဲ အ္စာၝောံဗ္တောန်လိက်မွဲတၠ ဒးချိုတ်အာလဝ်နွံကီု ဂွံတီကေတ်ရ။