ပ္ဍဲကွာန်လ္ၚဵု ဍာ်ဇၞော်ဍာ်ကလိုပ်ဒၟံင် မွဲဒမြိပ်ၜဳတၞင်သဳ၊ ရးဒေသဇၞော်တၞင်သဳဂှ် ဟိုတ်နူဍာ်သုင်/ဍာ်စကာ ဟွံသအးဇ္ၚးတုဲ ညးဒှ်ယဲဂၞဴနွံမံင်ရောင် ဂွံတီကေတ် နူဂကောံဟံင်ပြာ်မၞိဟ်တံရ။
စပ္တံနူဂိတုအဝ်ဂေတ် စၟတ်တ္ၚဲ (၁၈) လောန်ကၠုင်ဏံတုဲ ညးဒေသ နူကွာန်မွဲဒမြိပ်ဂၠံင်ဇၞော် ဗိက် – တၞင်သဳ – ကအ်သံင် ကေုာံ ကွာန် (၂၀) ပြင် မၞုံကြပ်ၜဳတၞင်သဳတံဂှ် ဒးဗဒဗဒဲါဇူဒီုဒၟံင် ပ္ဍဲဗဒိုပ်ဟံင်ပြာ်ဘဲဍာ် မၞုံကြပ်တံဂှ်ရောင် ကောန်ဂကောံ ဂကောံဟံင်ပြာ်မၞိဟ် နူပွိုင်ဍုင်တၞင်သဳမွဲတၠ ဟီုရ။
ညးပြံင်ဆုဲကၠုင် ပ္ဍဲဗဒိုပ်ဟံင်ပြာ်ယာယဳဂမၠိုင်တံဝွံ နကဵုပရေင်ထံက်ပင် တၠဒါန်ဂမၠိုင်ကဵု ဂကောံဟံင်ပြာ်မၞိဟ်တံဂှ် ပသောင်ကဵုဒၟံင် ပရေင်စသုင်လၟေင်တ္ၚဲကီုလေဝ် ညးဒေသဒးဘဲဍာ် နွံပ္ဍဲသၟိဒၟံင် ပြံင်ဆုဲဟွံမာန်ဏီတံဂှ် ဒးဆဵုဂဗဒၟံင်တင်ခက်ခုဲ ဆေင်စပ်ကဵု ပရေင်ထတ်ယုက်၊ စၞစသုင် ကေုာံ ဍာ်သုင်တံရ။
“ဟိုတ်နူဍာ်ဟွံသအးဇ္ၚးတုဲ ဒှ်မံင်ယဲဂၞဴနွံရ။ ဟိုတ်ဂှ်ရ သွက်ဂွံဂွံဍာ်သုင်/ဍာ်စကာဂှ် စၟဳမံင်ရ။ သၟာဟံင်ပြာ်တံလေဝ် အာစိုပ်ကဵုမံင်ဒါန်ရ။ ဆဂး ဟွံရုံဂပ်ပုဟ်။ ဍာ်သုင်/ဍာ်စကာကဵု စၞဒကှ်တံဂှ် နွံပၟိက်ဗွဲမဂၠိုင်ရ” သာ်ဝွံ ကောန်ဂကောံဟံင်ပြာ်ဂှ် ဟီုရ။
သၟာင်နူဂှ်ပၠန် သွက်ညးဗြဴ၊ ကောန်ၚာ် ကေုာံ ညးအာယုက်ဇၞော်တံဂှ် ကပေါတ်စကာလၟေင်ဂိတုကီု၊ သွက်ညးယဲဍာ်ဇမၠိင်တံဂှ် ဂဥုဲဇဗဂမၠိုင်ကဵု ပရေင်ရံင်စံင်ထတ်ယုက်ကီု မနွံပၟိက်ဒၟံင်ရောင် ဂွံတီကေတ်ရ။
“ကွာန် မွဲဒမြိပ်ၜဳတၞင်သဳ ကြပ်သီုဖအိုတ်ဂှ် ဗၠိုက်မံင်ရ။ ကွာန်လ္ၚဵုတံ ဗၠိုက်အိုတ်တုဲ လ္ၚဵုတံဂှ်တှ်ေ မံင်ဂွံမံင်ဏီတုဲ မံင်ဒၟံင်ရ။ ပြဟ်ဟ်ဏံ ပ္ဍဲဘာလကျာ်ကဵု ၝောံခန် လ္တူဍုင်တၞင်သဳဂှ် ပံက်လဝ်ဗဒိုပ်ဘဲဍာ်ရ။ ဗဒိုပ်ဘဲဍာ်ဂှ် နွံၜိုတ် (၆) ဒၞာဲရ” သာ်ဝွံ ညးဟီုရ။
အခိင်လၟုဟ်ဏံဝွံ ပ္ဍဲဘာလကျာ်ကဵု အရာပ် “ချောင်းကြီး” ဂှ် ပံက်လဝ်ဗဒိုပ်ဟံင်ပြာ်ဘဲဍာ်တုဲ လၟိဟ်မၞိဟ် စဵုကဵုလ္ၚီတၠနွံရဂှ်လေဝ် ဂွံတီကေတ်ရ။
ဟိုတ်နူဍာ်ၜဳတၞင်သဳ သၠုင်တိုန်ကၠုင်ဂှ်ရ ပ္ဍဲသ္ကုတ်ဂၠံင် ဗိက် – တၞင်သဳ – ကအ်သံင်လ္ၚဵုတံဂှ် ဍာ်တတ်ၜက်ကလိုပ်ဒၟံင်တုဲ စဵုကဵုတ္ၚဲဏံ တိတ်ကၠောံအာကၠုင် ဟွံမာန်ဏီရ။
ဗွဲကြဴနူဍာ်ဇၞော်ဍာ်ကလိုပ်တုဲဂှ် ဟိုတ်နူဍာ်ဟွံသအးဇ္ၚးကဵု စၞစဂမၠိုင်တုဲ သၟာင်နူယဲဂၞဴလီုဂၞဴအာ၊ ယဲကြုတ်ဂုဟ်၊ ယဲစၞာံဇကု ကေုာံ ယဲဇွဟ်ဂှ်မ္ဂး ဒးဆဵုဂဗကဵု ပြဒ္ဒညာပရေင်ထတ်ယုက် အဆက်ဖဵုတၞဟ်တၞဟ်မာန်ဂှ်ရ စွံသတိကဵု ပရေင်ထတ်ယုက်တုဲ ညံင်ဂွံလွဳလွတ် ဗွဲမဂတာပ်အခိင်ဂှ်လေဝ် သၞာဲဒဴပရေင်ထတ်ယုက်တံ ဟီုဂးဖ္တိုက်ဖၟောဝ်လဝ်ရ။