ဂကောံက္ၜင် ဖ္ဍိုက်က္ၜင်ကျာပၞာန်အမေရိကာန် USS Abraham Lincoln တံဝွံ ဗွဲကြဴနူယိုက်ဂၠေင်တာလျိုင် ပ္ဍဲဒေသ္ကုတ်လဒေါဝ်ဗၟံက် ပွိုင်ကြပ် (၇) ဂိတုတုဲ သွက်ဂွံဇူဒီုပြေလၟောင် ကေုာံ သ္ဂောံဗပေင်ဇွောံမဂှ် ပ္ဍဲဂိတုသေပ်တေမ်ဗာ (၂) ၊ တ္ၚဲဏံ လုပ်ဒေံါဇူကၠုင်လဝ် ပ္ဍဲကၟိန်ဍုင်သေံရောင် ပ္ဍဲပရိုင်သေံဂမၠိုင် ဓမံက်ထ္ၜးလဝ်ဂှ် ဂွံတီကေတ်ရ။
ဝတ်တာလျိုင် စပ္တံလဝ် ပ္ဍဲသၞာံ (၂၀၂၅) ၊ ဂိတုနဝ်ဝေမ်ဗာတေံ တုဲဒှ်ဂှ်မ္ဂး နကဵုအလန်ကၠာအိုတ် လုပ်ဇူဒီုကၠုင် ပ္ဍဲသၞေဟ်ပါတ္ထယာကၟိန်ဍုင်သေံ မွဲချိုန်ခဏတုဲ ကောန်သ္ဂံင်အမေရိကာန် (၅၀၀၀) ပြင် ပါလုပ်မံင်ရောင် ဂွံတီကေတ်ရ။
သ္ကိုပ်ဒပ် Carrier Strike Group 3 – Rear Adm. Robert E. Loughran ဂှ် လၟေင်တရဴဏံဝွံ သၟာင်နူကဵုအခေါင်ဇူဒီုပြေလၟောင် ကောန်သ္ဂံင် “မရိန်” ကေုာံ သ္ဂံင်ဒပ်ဍာ်တံတုဲ ပရေင်ဆက်ဆောံမဟာမိတ် အမေရိကာန်ကဵု ကၟိန်ဍုင်သေံတံလေဝ် သကဵုခိုင်ဗိုန်ကၠုင်ရောင် ဂးရ။
က္ဍိုပ်သ္ကိုပ် USS Abraham Lincoln – Dan Keeler ဝွံ အပ္ဍဲကာလ ညးယိုက်ဂၠေင်မံင်တာလျိုင်ဏံဂှ် ဒှ်သၞေဟ်ကၠုင်စိုပ် ပ္ဍဲကၟိန်ဍုင်သေံဏံ အလန်ကၠာအိုတ်တုဲ ဓဝ်ကၠိုဟ်ခၠင်အကြာၜါဍုင် သကဵုတောတက်အာရောင် ဟီုဂးလဝ်ရ။
ကၟိန်ဍုင်သေံဝွံ စပ္တံနူချုက်လိက် ပရေင်ကူသာန်ဗၞိက်ကဵု ပရေင်ဆာန်ကၟိန် ပ္ဍဲသၞာံ (၁၈၃၃) တေံဂှ်ရ ဒှ်လဝ်မဟာမိတ်လုပ်ဝင် အမေရိကာန်တုဲ ပ္ဍဲသ္ကုတ်ဒေသမသ္ၚောဲကဵုသြင်ၜဳ အာယှဒိုဟ်အဂၞဲဂှ် ဒှ်ကၟိန်ဍုင်မဟာမိတ်လုပ်ဝင် အမေရိကာန်မွဲဍုင်ဓဝ်ဟေင်ရ။ ကၟိန်ဍုင်ၜါဏံဝွံ ဇၟာပ်သၞာံ ပံင်တောဲပကတ်ပကေတ်ဒၟံင် ပရေင်ပၞာန် Cobra Gold နွံရ။
ပ္ဍဲကဵုအခိင်လၟုဟ်ဏံလေဝ် ဂကောံက္ၜင်တံဝွံ အပ္ဍဲဧရိယာ ဂကောံဒပ်ဍာ် စၟတ် (၇) အမေရိကာန် အုပ်ဓလီုလဝ် ဒေသအေန်ဒိုဝ် – ပသိဖိတ် ဗွဲမဂၠိုင်ဂှ် ဆက်ကၠောန်သ္ပဒၟံင် ပရေင်ပြုပြေင်ပၞာန်လၟေင်ဍာံနွံရ။
ဂကောံက္ၜင်ဏံဝွံ ဟိုတ်နူလုပ်ဒေံါဇူလဝ် ပ္ဍဲဇိုင်ၜဳပါတ္ထယာ မဒယှ်တှ်ဒၟံင်ကဵု ပေဲါသဘင်အခိင်ဗ္တံ ကေုာံ ကမၠောန်အာတရဴမိပ်လဟိင်လိင်ဂှ်ရ သၞာဲဒဴပၞာန်တြုံ/ဗြဴ မပါကၠုင်ကရောံက္ၜင်ဖ္ဍိုက်က္ၜင်ကျာတံ ညံင်ဟွံဂွံအာစိုပ်ဒၞာဲလ္ၚဵုတံဂှ်လေဝ် ညးတာလျိုင်သေံတံ ကၟာတ်ဒၞာလဝ်နွံရောင် ဂွံတီကေတ်ရ။