ပ္ဍဲဍုင်ဗ္ဂေါဝွံ မွဲကရောံကဵု ဂြဲဂူအဆက်ဆက်ဂှ်မ္ဂး ဍာ်ၜဳဗ္ဂေါသၠုင်တိုန်ကၠုင်ဂှ်ရ အပ္ဍဲကွာန်/အရာပ်သ္ကုတ်တိသဝ်လ္တူဍုင်တံဂှ် ကတဵုဒှ်ဒၟံင် ပရေင်ဍာ်ဇၞော်ဍာ်ကလိုပ်ရောင် ဂွံတီကေတ် နူညးလ္တူဍုင်တံရ။
ဟိုတ်နူဗြဲဂူဆက်ဒၟံင်ဂှ်ရ စပ္တံနူဂိတုသေပ်တေမ်ဗာ စၟတ်တ္ၚဲ (၁) တုဲကၠုင်ဏံဝွံ ပ္ဍဲဒၞာဲသ္ကုတ်တိသဝ်၊ ဍုင်ဗ္ဂေါဂှ် ဍာ်စလုပ်စိုပ်ကၠုင်တုဲ စဵုကဵုဂိတုသေပ်တေမ်ဗာ (၃) ၊ တ္ၚဲဏံဂှ် ပ္ဍဲအရာပ်လ္တူဍုင်ဂမၠိုင်၊ ဒၞာဲဂၠံင်ဇၞော်လ္ၚဵု ကေုာံ ဒၞာဲသ္ကုတ်တိသဝ်ဗွဲမဂၠိုင်ဂှ် ဍာ်တတ်ၜက်လုပ်စိုပ်ကၠုင်ဒၟံင်ရောင် ညးဒေသ လ္တူဍုင်မွဲတၠဂှ် ဟီုရ။
“ပြဟ်ပြဟ်ဏံ အရာပ်လ္တူဍုင်ဗ္ဂေါ စတမ်အရာပ်ကလျာဏဳ ဒေသ (၄၊ ၆၊ ၁၆) ၊ အရာပ်ဍုင်တၟိ၊ သ္ကုတ်သၟဝ် မဇြေန်ကဵု “သရက်တော”ဂမၠိုင်၊ အပ္ဍဲအရာပ်လ္ပာ်ရုင်ဂဥုဲ “အောင်” ၊ မဟာမျာင်၊ “ဇိုင်းတောင်” ဂှ်လေဝ် ဍာ်လုပ်စိုပ်မံင်ရ” သာ်ဝွံ ညးဟီုရ။
တုဲပၠန် ဂၠံင်ဍာန်လ္တူဍုင် မပ္တံဂၠံင်မင်္ဂလာ၊ ဂၠံင်သ္ကဲကလျာဏဳဂမၠိုင်၊ ဂၠံင်အရာပ်တၟိဂမၠိုင်၊ သ္ကုတ်ဂၠံင် “နာတ်ဇြေန်” ကဵု ပါတ်တမျာဂှ်လေဝ် ဍာ်လုပ်စိုပ်ဒၟံင်တုဲ ပ္ဍဲကဵုအရာပ်သ္ကုတ်တိသဝ်လ္ၚဵုတံဝွံ လ္တူဂၠံင်ဍာန်ဂှ် ဍာ်စိုပ်ဒၟံင်စဵုကဵုဂၞိင်နွံရောင် ညးထပ်ဟီုလဝ်ရ။
ဍာ်ၜဳဗ္ဂေါသၠုင်တိုန်ကၠုင်တုဲ ဟိုတ်နူဍာ်ဇၞော်ဍာ်ကလိုပ်ဒၟံင်ဂှ်ရ စပ္တံနူဂိတုသေပ်တေမ်ဗာ (၂) ဏံတုဲ ဘာဗ္တောန်လိက် (၁၄) ဘာဂှ် ဒးကၟာတ်လဝ်ဗွဲယာယဳနွံရောင် အလဵုအသဳပၞာန်တံ လလောင်ပ္တိတ်လဝ်ရ။
အခိင်လၟုဟ်ဏံဝွံ သၟာင်နူဗြဲဆက်ဂူဒၟံင်တုဲ ဍာ်ၜဳဗ္ဂေါဂှ်လေဝ် သၠုင်တိုန်မံင်ဂှ်ရ ဍာ်ဆက်သၠုင်တိုန်ကၠုင်မာန်ရောင်ဂှ် ဂွံတီကေတ် နူညးဒေသတံ ဟီုဂးလဝ်ရ။
ဌာနက္ဍိုက်က္ဍိုပ်ဗြဲကျာ ကေုာံ ဇလဗေဒတံဝွံ တ္ၚဲဏံအခိင်နူဂယးဂှ် ဍာ်ၜဳဗ္ဂေါၜက်သၠုင်တိုန်ဒၟံင် နူစၟတ်ဍာ်ဒှ်ဓဝိင် (၁) ပေ၊ (၅) ၝောံတဲပြင်တုဲ အပ္ဍဲတ္ၚဲဂတဏံမွဲတ္ၚဲဂှ်လေဝ် ဆက်နွံမံင်လ္တူစၟတ်ဍာ်ဒှ်ဓဝိင်မာန်ဏီရောင် လလောင်ပ္တိတ်လဝ်ရ။
ဟိုတ်နူအကာဲအရာဂှ်တုဲ ညးဍုင်ကွာန် မၞုံဒၞာဲလုပ်စိုပ်မာန်တံကဵု ကြပ်ၜဳဗ္ဂေါတံဝွံ အကာဲအရာဍာ်ၜဳသၠုင်တိုန်ကီု၊ ဗြဲဂူကီုဂှ် ဒးစွံသတိမင်ရံင်ဗွဲတၟေင်တုဲ သွက်ဂွံစဵုဒၞာ နူဘဲအန္တရာဲဍာ်မာန်ဂှ်လေဝ် ဒးဒစးဒုင်ကၠောန်သ္ပ ပရေင်ပလေဝ်ပလေတ်ရောင် ညးတာလျိုင်တံ ဟီုဂးဆဝ်မ္ၚုဟ်လဝ်ရ။
ဍုင်ယှိုဲကျေန် ကေုာံ ဍုင် “မဒေါက်” လ္ပာ်ဗၟံက်ဗ္ဂေါဂှ်လေဝ် ဍာ်ၜဳဂမၠိုင်ၜက်တိုန်စိုပ်ဒၟံင် လ္တူစၟတ်ဍာ်ဒှ်ဓဝိင်ဂှ်တုဲ ကတဵုဒှ်ဒၟံင် ပရေင်ဍာ်ဇၞော်ဍာ်ကလိုပ်ရောင် ဂွံတီကေတ် နူညးဒေသဂမၠိုင်တံရ။