ပ္ဍဲပွိုင်ဍုင်ပုဠဝ် (လာမူဠာ)၊ ခရိုင်ဗိက်၊ ရးတၞင်သဳဂှ်ဝွံ ကရောင်ပၞာန်ဒပ်ကမ္မယှေန်ပၞာန် မလုပ်စိုပ်ကၠုင်တံ ဂစိုတ်ထောံကောန်ကွာန် (၂) တၠတုဲ သီုစံင်ပလီုပလာ်ထောံ သ္ၚိဒၟံင် (၉) မရဂှ်လေဝ် ဗော်သွးကရေင် ကေအေန်ယူ လလောင်ပ္တိတ်လဝ်ရ။
ပ္ဍဲဂိတုအဝ်ဂေတ် စၟတ်တ္ၚဲ (၂၇) တုဲကၠုင်ဏံ ကရောင်ပၞာန်ဒပ်ကမ္မယှေန်ပၞာန် လုပ်စိုပ်ကၠုင် အပ္ဍဲဂကောံကွာန်မဇြဝ်၊ ပွိုင်ဍုင်ပုဠဝ် (လာမူဠာ) ဂှ် ဂစိုတ်ထောံကောန်ကွာန် (ၚါးရပ်အင်း) (၂) တၠ ဂးရ။
ကရောင်ပၞာန်ဂှ်ဝွံ စံင်ပလီုပလာ်ထောံသ္ၚိဒၟံင် (၈) မ၊ ပ္ဍဲကွာန် (တုံးဗျော) ဂှ်တုဲ ပ္ဍဲဂိတုအဝ်ဂေတ် စၟတ်တ္ၚဲ (၂၈) ဂှ်လေဝ် စံင်ပလီုပလာ်ထောံ သ္ၚိဒၟံင် ပ္ဍဲကွာန် “ရေခမ်းချောင်း” (၁) မပၠန်ရ။
အပ္ဍဲဂကောံကွာန်မဇြဝ် မပ္တံကဵုကွာန် (ၚါးရပ်အင်း၊ တုံးဗျော၊ ရေခမ်းချောင်း၊ ဒူကျိုး) တံဂှ် ဒပ်ပၞာန်တံ လလောင်ပ္တိတ်လဝ် ပရေင်အုပ်ဓုပ်ပၞာန် (မာယှေဝ်ဠဝ်) ရ။
ဒပ်ကမ္မယှေန်ပၞာန်တံဝွံ ပန်ဗ္တိုက်ဒၟံင် ညးဍုင်ကွာန်ဒုဟ်ဟွံမွဲတံ နကဵုက္ၜင်ကျာ၊ စက်ဗရုသာဲ ကေုာံ လွဟ်ဇၞော်ကီု၊ ရပ်စပ်ဂစိုတ်ဒၟံင်ညးဍုင်ကွာန်တံကီုတုဲ လုတ်လောန်ဒၟံင်ဒုဟ်အမှုရာဇဝတ် ဇၟာပ်တ္ၚဲရောင် ကေအေန်ယူ ဂးရ။