ပ္ဍဲဘာဗ္တောန်လိက်သဇိုင်၊ တွဵုရးဍုင်မန်ဝွံ စနူသၞာံဗ္တောန်ပညာဂတဏံတုဲ သွက်ဂွံဗ္တောန်အာလိက်ပတ်မန် တန် Grade 4, 5 မာန်ဂှ် ပလေဝ်ပလေတ်ဒၟံင်ရောင် အတိုင်ဂကောံကမ္မတဳလိက်ပတ်ယေန်သၞာင်မန်တံ ဟီုဂးလဝ်ဂှ် ဂွံတီကေတ်ရ။
ကိစ္စဆေင်စပ်ကဵု ဗ္တောန်လိက်ပတ်မန် ကေုာံ ပရေင်ပညာကောန်ဂကူမန်ဂှ်ဝွံ ဝန်ဇၞော်ကေင်ကာကောန်ဍုင်အရင် အလဵုအသဳပၞာန်၊ ဌာနက္ဍိုက်က္ဍိုပ်လိက်ပတ်ယေန်သၞာင်ကောန်ဍုင်အရင်ကဵု ပရေင်ပညာ၊ ကမ္မတဳပရေင်ပညာကောန်ဂကူမန်၊ ဗော်ပရေင်ဍုင်ကွာန်မန်ကဵု ညးတာလျိုင် နူကမ္မတဳလိက်ပတ်ယေန်သၞာင်တံ ဆဵုဂဗလဝ်ညးသ္ကံ ပ္ဍဲဂိတုအဝ်ဂေတ် (၂၆) တုဲကၠုင်ဏံရ။
သၟာင်နူအကာဲအရာ ဗ္တောန်လိက်ပတ်ကောန်ဍုင်အရင်မန်၊ လၟိဟ်ဘာ၊ အ္စာ/အ္စာၝောံ ကေုာံ လၟိဟ်ကွးဘာဂမၠိုင်တုဲ တင်နွံပၟိက် ပ္ဍဲအရာဗ္တောန်ဂမၠိုင်ဂှ်လေဝ် အပ္ဍဲဂိတုသေပ်တေမ်ဗာဏံ သွက်ဂွံဗက်စၟဳစၟတ်အာ နလၟေင်ပွိုင်ဍုင်နွံရောင် ဂးရ။
ကမ္မတဳမွဲတၠဂှ် “အဃောဗ္တောန်မံင်ဂှ်ရ တင်နွံပၟိက်တံ၊ တင်ဍိုန်လျတံ မံက်ကၠုင်တှ်ေ ပလေဝ်ပလေတ်တုဲ ဒးဆက်ဓမံက်အာရုပ်ရဴဏောင်။ ကၠာအိုတ်ဂှ်တှ်ေ ပွိုင်ဍုင်မတ်မလီု၊ ပွိုင်တိုက်ဖအိုတ်ဂှ် သွက်ဂွံအာသၟာန်ရ” သာ်ဝွံ ညးဟီုရ။
ပ္ဍဲကဵုဘာ လၟိဟ်အ္စာ/အ္စာၝောံ ဗ္တောန်လိက်ပတ်ကောန်ဍုင်အရင်ဍိုက်ပေင်လ္ၚဵုတံဂှ် စဗ္တောန်ဒၟံင် တန် Grade 4, 5 နွံရ။
အပ္ဍဲသၞာံဗ္တောန်ပညာလၟုဟ်ဏံဝွံ အ္စာ/အ္စာၝောံ TA/LT ကၠုင်စိုပ်ပ္တိုန်စရင်တၟိ ဟွံမွဲဂှ်ရ အပ္ဍဲသၞာံဗ္တောန်ပညာဂတဏံ နကဵုလၟေင်ဘာ သွက်ဂွံသၠုင်ဗ္တောန်ပ္တိုန်မာန်ဂှ် ဒးဆဵုဂဗကဵု တင်နွံပၟိက် အ္စာ/အ္စာၝောံမာန်ရောင် ဂးရ။
“ညးပ္တိုန်စရင် TA/LT ဟွံမွဲပုဟ်။ ဟိုတ်နူဂုန်ဖဵုဂွံဒုင်စသိုင် ဟွံမွဲလေဝ်ဏး။ ဟိုတ်နူ TA/LT ဟွံမွဲတုဲ ဘာစဟွံမာန်တံ နွံဂၠိုင်ကွေံရ။ နကဵုပိုဲတံ ဂွံစမာန်ဂှ်တှ်ေ ဒးဂ္စာန်မံင်ရ” သာ်ဝွံ ကောန်ဂကောံကမ္မတဳလိက်ပတ်ယေန်သၞာင်မန်ဂှ် ဟီုရ။
သွက်တန် Grade 4,5 ဂှ်ဝွံ ဗ္တောန်အာ အတိုင်လိက်အုပ်မာတိကာဗီုဗ္တောန် ချူဓဇက်လဝ် နူသၞာံ (၂၀၁၀) တေံဂှ်တုဲ လၟိဟ်လိက်အုပ်မနွံပၟိက်တံဂှ် ဆက်ရေင်တၠုင်ပ္ည္ညဳပ္ညပ်အာကဵု ဌာနပရေင်ပညာရောင် ဂးရ။
အခိင်လၟုဟ်ဏံဝွံ နူဂကောံလိက်ပတ်ယေန်သၞာင်မန်တံ ကော်စန္ဒက်ဒၟံင် အ္စာ/အ္စာၝောံဒေသ မိက်ဂွံဗ္တောန်လိက်ပတ်မန်တံတုဲ သြန်ဂိတု ကေုာံ အခေါင်ထပ်ဂွံဒုင်စသိုင်ဂမၠိုင်ဂှ်လေဝ် နကဵုလၟေင်ပွိုင်ဍုင် ၜိုတ်သ္ပမာန်ဂှ် ဗပေင်မံင်ကဵုရောင် ဂးရ။
ကိစ္စခါန်ကၞက် သွက်ဂွံဗ္တောန်လိက်ပတ်မန်ဂှ် ဒးပ္တိုန်စရင် ဇရေင်ဌာနဝန်ဇၞော် ကေင်ကာကောန်ဍုင်အရင်တုဲ သ္ဂောံဂွံအခေါင်ဗ္တောန်ဂှ်မ္ဂး ဒးဒှ်အတိုင်အခေါင်ဌာနဝန်ဇၞော် ပရေင်ပညာဂှ်ရ အကြာဌာနဝန်ဇၞော် (၂) ဂှ် ဒးညးရေင်တၠုင်ပ္ညဳပ္ညပ်ဒၟံင်တုဲ ဒၞာဲသၠးဂၠိုင်အာရောင် ဂးရ။
ပ္ဍဲတွဵုရးဍုင်မန်ဝွံ လိက်ပတ်ကောန်ဍုင်အရင်တံဂှ် ဗ္တောန်ဒၟံင်ပ္ဍဲဘာဗ္တောန်လိက်သဇိုင် မၞုံပ္ဍဲပွိုင်ဍုင်ၜါသွာင်၊ ကျာ်မြဟ်၊ မုဟ်ဍုင်၊ ဇြပ်ဗု ကေုာံ ပ္ဍဲပွိုင်ဍုင်ရေဝ်နွံရ။