စနူဂိတုဂျူလာင် သၞာံ ၂၀၂၄ စဵုကဵုစိုပ် ဂိတုအဝ်ဂါတ် သၞာံ ၂၀၂၆ ပ္ဍဲပွိုင်ၜါသၞာံဂှ် ဒပ်ပၞာန်သီအဝဵုတအ် ပ္ကောံဂွံဏာဇြဟတ်ကောန်ပၞာန်တၟိ နနဲအဓမ္မ လၟိဟ် (၁၃၅,၀၈၀) တၠရောင် နူကဵုဌာနဝန်ဇၞော်စဵုဒၞါ အလဵုအသဳ စိုပ်ဌာန်ဇမ္ရောဲ NUG တအ် လလောင်တြးလဝ် ပ္ဍဲတ္ရဲဏအ် (သေပ်တေမ်ဗါ ၁၈) ရ။
သၞောဝ်ဥပဒေ ညးဍုင်ကွာန်ဒးလုပ်ပၞာန်ဂှ် ဒပ်ပၞာန်သီအဝဵုတအ် စဗမံက်ရုပ်ရဴ ပၠောပ်ကၠုင်လမျီု နူဂိတုဖေဖဝ်ဝါရဳ သၞာံ ၂၀၂၄ တေံတုဲ စဵုကဵုစိုပ်ဂိတုအဝ်ဂါတ် သၞာံ ၂၀၂၆ မ္ဂး ပံက်ဂွံဘာကွတ်ဗ္တောန်ပၞာန်သ္ဇိုင် လၟေင် ၂၇ ဝါ တုဲဒှ်အာရ။
ပ္ဍဲကာလလၟုဟ် သ္ပတိုင်ကဵုဇြဟတ်ကောန်ပၞာန်တၟိတၟိတအ်ဂှ် ဗၞတ် (၈၀) က္ဍိုပ်ကၠံတုဲ ဒပ်ပၞာန်သီအဝဵုတအ် ပံက်လဝ်မုက်ပၞာန်ကီု ထ္ပက်မံင်ကရောင်ပၞာန်ကီု အလုံမွဲဍုင်ရောင် ဂးရ။
တုဲပၠန် ပ္ဍဲကဵုပွိုင်ၜါသၞာံဂှ်ဝွံ နူကဵုဒပ်ပၞာန်သီအဝဵုတအ် ချိုတ်အာလဝ် (၂၀,၃၈၃) တၠ၊ ဒးဘဲဝပ် (၉၇၉၂) တၠ၊ ဖျေံလွဟ် (၃၈၇၄) တၠ၊ ဂြိပ်တိတ်နူဒပ် ဗၞတ် (၂၀၀၀၀) တၠပါလုပ်တုဲ အပ္ဍဲကဵုလၟိဟ်တအ်ဂှ်ဝွံ ညးဒးဒုင်ပ္ကောံသ္ပကောန်ပၞာန်အဓမ္မတအ် ပါလုပ်လၟိဟ်ဂၠိုင်အိုတ်ရောင် ဌာနဝန်ဇၞော်စဵုဒၞါ NUG ချူဓမံက်လဝ်ရ။
စဵုကဵုလၟုဟ်လေဝ် နူကဵုဌာနဝန်ဇၞော်စဵုဒၞါ NUG တအ် ရပ်ထိင်လဝ် လၟိဟ်ဂၠုဲပၞာန် (၅၃၆) တၠနွံ ဂွံဗှ်ကေတ် ပ္ဍဲလိက်လလောင် NUG ဂှ်ရ။
လ္တူဒပ်ပၞာန်သီအဝဵုတအ် ကေတ်မံင်ကောန်ပၞာန်တၟိတၟိ စဵုကဵုတ္ရဲဏအ်ဂှ် အလုံညးဍုင်ကွာန်တအ် လ္ပဒုင်တဲ ညံင်ဂွံဒစဵုဒစးမာန် ဌာနဝန်ဇၞော်စဵုဒၞါ NUG ဖ္တိုက်ဖ္အောဝ်လဝ်နွံကီု ဂွံတီကေတ်ရ။