ပ္ဍဲကဵုပေဲါဆဵုဂဗသၠာဲဂတးလညာတ် ပရေင်ဍုင်ကွာန်သၟတ် အလန်ပထမ မကၠောန်ဗဒှ်လဝ် အကြာသၟတ်ကောန်ဂကူကောန်ဍုင်အရင် မန်၊ ကရေင် ကေုာံ ပအိုဝ်တံဂှ်ဝွံ ကိစ္စပံင်ကောံရေင်တၠုင် လၟေင်ကမၠောန်ပရေင်ဍုင်ကွာန်ကဵု ပရေင်ပၠန်ဂတးဗလးတိဂှ် အကြာသၟတ်ကောန်ဍုင်အရင်တံ တုပ်လဝ်စိုတ်ညးသ္ကံရောင် ညးမၞုံအခေါင်ဟီုဂး ဇြဟတ်ရာမညဖေဝ်ဒရေဝ်ခေတ်တၟိ (NRFF) နာဲပဳတာ ဟီုရ။
ပ္ဍဲဂိတုသေပ်တေမ်ဗာ သတ္တဟဒုတိယတုဲကၠုင်ဏံဝွံ အကြာသၟတ်ကောန်ဍုင်အရင် မန်၊ ကရေင် ကေုာံ ပအိုဝ်တံ နကဵုတင်ရန်တၟံ သွက်ဂွံပံင်ကောံရေင်တၠုင် လၟေင်ကမၠောန်ပရေင်ဍုင်ကွာန်ကဵု ပရေင်ပၠန်ဂတးတုဲ ကၠောန်ဗဒှ်လဝ် ပေဲါသၠာဲဂတးလညာတ်ပရေင်ဍုင်ကွာန်သၟတ် အလန်ပထမ၊ ပွိုင် (၂) တ္ၚဲရ။
အကြာသၟတ်ကောန်ဍုင်အရင်ဂမၠိုင်တံဝွံ ကိစ္စသ္ဂောံဒက်ပ္တန်ဓဝ်ပတှ်ေ ကေုာံ ညံင်သ္ဂောံတတ်ထပါ် တင်ကော်ဆောဗလးတိ မွဲကရောံမွဲစွံမာန်ဂှ် သဳကၠဳလဝ်ရောင် နာဲပဳတာ ဟီုရ။
“ပရေင်ရုန်ဂစာန်ပၠန်ဂတး ဆေင်စပ်ကဵု နလၟေင်ကဏ္ဍ၊ လၟေင်ဒေသ၊ လၟေင်ဂကူတံဂှ်တှ်ေ အရာပံင်ကောံရေင်တၠုင်ဂွံတံဂှ် သွက်ဂွံသၠာဲဂတးလညာတ်၊ သွက်ဂွံပံင်ကောံ ဘိုင်ရီုကဵုထံက်ပင်မာန်ဂှ် တုပ်လဝ်စိုတ်ရ။ တုဲတှ်ေ နကဵုဂကောံဇြဟတ်နာနာကီု၊ နကဵုညးဍုင်ကွာန်ဗလးတိတံကီု ဒးဆဵုဂဗမံင် တင်ကော်ဆောဂှ်တှ်ေ ကဏ္ဍမဆေင်စပ်တံဂှ် ညံင်ဂွံပံင်ကောံရေင်တၠုင်ကြပ်ကြပ်” သာ်ဝွံ ဟီုရ။
ပေဲါဆဵုဂဗသဳကၠဳသၠာဲဂတးလညာတ်ဏံဝွံ နူဇြဟတ်ရာမညဖေဝ်ဒရေဝ်ခေတ်တၟိ (NRFF) က္ဍိုက်က္ဍိုပ်ကၠောန်ဗဒှ်တုဲ ဂကောံသၟတ် ဒေသမန်၊ ကရေင်၊ ပအိုဝ်၊ ဂကောံညးဗြဴ၊ သမဂ္ဂကွးဘာ ကေုာံ ဂကောံဇြဟတ်ပရေင်ဍုင်ကွာန်/ပၠန်ဂတးကီု သီုဖအိုတ် ညးစၞးနူ (၉) ဂကောံတံ တိုန်စိုပ်လဝ်ရ။
နူပေဲါဆဵုဂဗသဳကၠဳဏံမွဲတဆံင်ဂှ် ပ္ဍဲအနာဂတ်တေံ အကြာသၟတ်တံ ပေဲါဆဵုဂဗဂမၠိုင် သၠဲလးဂၠိုင်ကၠုင်တုဲ ဇာနှိက် (ကွန်ရက်) မဟာမိတ်ဗဗွဲဓဝ်မွဲ သ္ဂောံမံက်ကၠုင်ဂှ် စၟဳကေတ်လဝ်ရောင် ဂးရ။
နာဲပဳတာဂှ် “ဗီုကဵုဇာနှိက်ဗဗွဲဓဝ် ဒက်ပ္တန်ဟာဟီုဂှ်တှ်ေ သွက်ဂွံနွံကၠုင်၊ နူဏံသွက်ဂွံစမာန်ဂှ် စၟဳလဝ်ရ။ သီုဖအိုတ်တံဂှ်လေဝ် သွက်ဂွံပံင်ကောံရေင်တၠုင်ကြပ်ဂၠိုင်နူဏံ၊ သွက်ဂွံဆဵုဂဗ သၠဲသၠဲလးလးမာန်ဂှ် မနွံပၟိက်ရ” သာ်ဝွံ ညးဟီုရ။
အပ္ဍဲဆဵုဂဗသဳကၠဳဏံဝွံ ညးတာလျိုင် နူကံင်ဇြဳဖေဝ်ဒရေဝ်ဍုင်မန် (MSFC)၊ ကံင်ဇြဳဖေဝ်ဒရေဝ်ကောန်ဂကူပအိုဝ် (PNFC) ကေုာံ နူဗော်သွးသၟတ်ကရေင် (KYO) တံ ဟီုဂလာန်တုဲ ပ္ဍဲအခန်ကဏ္ဍက္ဍိုက်က္ဍိုပ် ကေုာံ ပရေင်တောတက်ပၠန်ဂတး အပ္ဍဲဒေသ မဆေင်စပ်တံဂှ် ပံင်ကောံသ္ၚဳဂၠိပ် အခန်ကဏ္ဍသၟတ်တံရ။
နကဵုဇြဟတ်ရာမညဖေဝ်ဒရေဝ်ခေတ်တၟိ (NRFF) ဝွံ စပ္တံနူသၞာံ (၂၀၂၃) တုဲကၠုင်တေံတုဲ သၟာင်နူပေဲါသဳကၠဳပရေင်ဍုင်ကွာန်သၟတ်မ္ဂး ပေဲါဆဵုဂဗသဳကၠဳ အကြာဂကောံဇြဟတ်ပၠန်ဂတး မန်-တၞင်သဳ ကေုာံ မန်-ထဝဲါတံဂှ်လေဝ် ကၠောန်သ္ပရေင်တၠုင်လဝ်အဆက်ဆက်နွံရ။
သၟတ်မန်၊ ကရေင် ကေုာံ ပအိုဝ်တံဝွံ သၟာင်နူမံင်တန်တဴ ထုဲဓရုဲမွဲစွံ အပ္ဍဲတွဵုရးဍုင်မန်တုဲ ဗွဲကြဴနူဒပ်ပၞာန်သီအဝဵုဂှ်မ္ဂး ဒှ်မဟာမိတ်ကောန်ဍုင်အရင် ပံင်ကောံရေင်တၠုင် ပရေင်ပၠန်ဂတးရ။