ပ္ဍဲပွိုင်ဍုင် တွဵုရးဍုင်မန် ကေုာံ ကရေင်လ္ၚဵု ကတဵုဒှ်မံင် ပရေင်ဍာ်ဇၞော်ဍာ်ကလိုပ်ဂှ်ဝွံ ဒးစကာအာကၠုင်ဒၟံင် နကဵုဂၠုင်စက်တုဲ ဟိုတ်နူဖ္ဍိုက်ကပေါတ်ဇြိုင်ဂၠိုင်အာကဵု သာသ္ပအ်ဂှ်ရ ညးအာတရဴ ဍိုက်ဂၠုင်စက်တံ ဒးဆဵုဂဗဒၟံင် ဘဲအန္တရာဲနွံရောင် ဂွံတီကေတ်ရ။
ပွမအာကၠုင်ဆက်စၠောံ မွဲကွာန်ကဵုမွဲကွာန်ကီု၊ အာဒုင်ပလံင်ကွးဘာဇၟာပ်တ္ၚဲ ကေုာံ ဖ္ဍိုက်ကပေါတ်ဗၞိက်ကီုဂှ် စနူလဒေါဝ်ဂိတုအဝ်ဂေတ်တုဲကၠုင်ဏံတုဲ ဒးစကာဂၠုင်စက် ဂၠိုင်ကၠုင်ရ။
ပ္ဍဲဒေသဍာ်ဇၞော်ဍာ်ကလိုပ်မံင်ဂှ်ဝွံ သၟာင်နူဂၠုင်စက်ဟွံရုံဂပ်တုဲ ဟိုတ်နူဍာ်ဇွောတ်ထတ်ကာတ်ဂၠိုင်ကၠုင်ကီု၊ ဟွံဂွံဆဵုကေတ် အရာဒၞာတာသၟဝ်ဍာ်ကီု၊ ပ္ဍဲဂၠုင်စက်ဂှ် ဖ္ဍိုက်ညးအာတရဴ ကေုာံ ဖ္ဍိုက်ကပေါတ်ဗၞိက်လျိုင်ဇြိုင်ဂၠိုင်ကီု၊ သၟာဒဳဂၠုင်တံ သာသ္ပအ်ကီုဂှ်ရ ဂၠုင်စက်ဗ္ကပ်ဒၟံင် မွဲနှေံမွဲနှေံရ။
အကြာကွာန်လိုင်ကၞုဲ – ဒဵုထောင် ဍာ်ဇၞော်ဍာ်ကလိုပ်ဒၟံင် မၞုံပ္ဍဲသ္ကုတ်ဂၠံင်မုဟ်ဍုင် – ကျာ်ပိ ညးအာတရဴလၟိဟ်ကဵုကၠံ တတ်ကၠောံအာကၠုင်ဒၟံင် ဇၟာပ်တ္ၚဲဂှ်ဝွံ အပ္ဍဲဂိတုအဝ်ဂေတ်တုဲကၠုင်ဏံ ဂၠုင်စက်ဗ္ကပ်အာ ဟွံအောန်နူ (၃) ဝါနွံရောင် ဂွံတီကေတ် နူညးဒေသတံရ။
“ဂၠုင်ဂှ်လေဝ် အောန်၊ ညးအာတရဴ လ္ပာ်ကျာ်ပိဂှ်လေဝ် ဂၠိုင်မံင်ရ။ ဟိုတ်ဂှ်ရ သၞောတ်ဗ္ၜတ် (ပမာဏ) ဂွံဖ္ဍိုက်မၞိဟ်ကဵု ကပေါတ်ဂှ် စၟတ်ကေတ်ဝါတ်ရ။ ဒှ်သာ်ဂှ်ရ ဂၠုင်မွဲဖ္ဍိုက် ဍိုက်မၞိဟ်မူစိတၠရောဟီုဂှ် စၟတ်လဝ်ဟွံမွဲပုဟ်။ ကပေါတ်ဂှ်လေဝ် ၜိုတ်ဖ္ဍိုက်ဂွံ ဖ္ဍိုက်မံင်ရ” သာ်ဝွံ ညးတြုံ နူဒေသကွာန်လိုင်ကၞုဲမွဲတၠ ဟီုရ။
သၟာင်နူဂှ်ပၠန် ဟိုတ်နူဒဳဟွံမွဲကဵုသၞောတ်သၞောဝ် ကေုာံ သုင်အရက်သုရာဂှ်လေဝ် ဂၠုင်ဗၠိုက်မံင်နွံရဂှ်လေဝ် ဂွံတီကေတ်ရ။
ဟိုတ်နူဍာ်သၠုင်တိုန်ကၠုင်တုဲ အာကၠုင်ကဵုကွဳစက် ဟွံဂွံဏီဂှ်ရ ဒးဆက်စကာဂၠုင်ဂမၠိုင်တုဲ ဟွံဂွံစၟတ်လဝ်မွဲသာ် ပွမဖ္ဍိုက်မံင် ညးအာတရဴကဵု ကပေါတ်ဗၞိက်ဂမၠိုင်ကီု၊ ပွမသုင်အရက်သုရာ အပ္ဍဲအခိင်ကမၠောန်ကီုဂှ် ဒးစွံသတိရောင် ညးဒေသဂမၠိုင်တံ ဟီုဂးဖ္တိုက်ဖၟောဝ်လဝ်ရ။
ပ္ဍဲဂိတုအဝ်ဂေတ် စၟတ်တ္ၚဲ (၂၄) တုဲကၠုင်ဏံဝွံ ဂၠုင်စက်ဖ္ဍိုက်လဝ် မၞိဟ် (၈) တၠ၊ ကွဳလိုန်ဓာတ် (၂) ဖ္ဍိုက် ကေုာံ ကပေါတ်ဗၞိက်ဂမၠိုင်ဂှ် ဗၠိုက်အာဍာ် ပ္ဍဲကွာန်ကအ်ခိုဟ် – (နွားခြံကုန်း) ၊ ပွိုင်ဍုင်ကအ်ကြိက်တုဲ အ္စာၝောံဗ္တောန်လိက်မွဲတၠ ဒးချိုတ်အာကီုရ။
ညးဒေသကအ်ကြိက်မွဲတၠဂှ် “အခိင်ဍာ်ဇွောဝ်ထတ်မံင်ဏံဂှ် ညးၜိင်ဍာ်ဟွံလေပ်တံ ဂၠုင်ဗၠိုက်ဏောင်တှ်ေ အကာဲအရာချိုတ်ဂှ် ဂၠိုင်ရ။ ဟိုတ်ဂှ်ရ သၟာဂၠုင်တံလေဝ် မၞိဟ်တဏံ ညံင်ဟွံဂွံဒှ်ဘဲအန္တရာဲလမျီုဂှ် ဒးသ္ပဂရုထေက်” သာ်ဝွံ ညးဟီုရ။
ဟိုတ်နူဗြဲဇၞော်ဂူကဵု ဍာ်ဒဵုဂမၠိုင်ဂှ်ရ ၜဳကြုင် မဇွောဝ်တတ်ကၠောံဒၟံင် အပ္ဍဲတွဵုရးကရေင်ဝွံ စၟတ်ဍာ်လောန်ၜက်နူဒးဒှ်ဓဝိင်ဂှ်တုဲ အပ္ဍဲပွိုင်ဍုင်ကအ်ကြိက်၊ ကြုင်ဒဵု၊ “လှိုင်းဘွဲ့” ကဵု ပွိုင်ဍုင်လှာဒကှ်ဂှ် ကတဵုဒှ်ဒၟံင် ပရေင်ဍာ်ဇၞော်ဍာ်ကလိုပ်ဖိုဟ်ရ။
အပ္ဍဲအခိင်ကာလ ဍာ်ဇၞော်ဍာ်ကလိုပ်မံင်ဏံဝွံ နကဵုညးဒဳဂၠုင်စက်ဂမၠိုင်တံ ကၠာဟွံဂွံတိတ်တရဴမ္ဂး ဒးဒစးဒုင်စၟဳစၟတ် ဂၠုင်စက်၊ စက်အေန်ဂျေန်၊ တိုင်ကဳကၠေင်၊ ဗုင်ဂၠုင်ကဵု ဍာ်လုပ်စိုပ် ပ္ဍဲဂၠုင်စက် နွံ / ဟွံမွဲဂှ်တုဲ နကဵုညးဍုင်ကွာန်အာတရဴဂမၠိုင်တံလေဝ် အကာဲအရာဗြဲဂူထတ်သ္ကာတ်မံင်မ္ဂး ဒးပဆုဲထောံ လၟေင်တရဴထေက်ရဂှ်လေဝ် ညးစိုန်သကီု အကာဲအရာဍာ်တိုန်စှ်ေတံ ဟီုဂးဖ္တိုက်ဖၟောဝ်လဝ်နွံရ။