ပ္ဍဲပွိုင်ဍုင်ကျာ်မြဟ်၊ တွဵုရးဍုင်မန်ဝွံ ဗွဲကြဴနူကွဳစက်ဖ္ဍိုက်ကပေါတ်ဗၞိက်သေံဟွံလုပ်သၞောဝ် (၆၀) ဖ္ဍိုက်ပြင် ဒးဒုင်ရပ်ဏာတုဲဂှ် ပ္ဍဲဍုင်မတ်မလီု ကပေါတ်ဗၞိက်သေံဂမၠိုင် ၚုဟ်တိုန်အာရောင် ဂွံတီကေတ် နူညးဒေသလ္တူဍုင်တံရ။
ဂိတုသေပ်တေမ်ဗာ စၟတ်တ္ၚဲ (၅) တုဲကၠုင်ဏံ အခိင်ဗ္တံ ၜိုတ် (၇း၃၀) နာဍဳဂှ် ဒပ်ပၞာန်၊ ပျူသဝ်ထဳ၊ ပၞာန်ကွာန်၊ (စရဖ)၊ ဗၠာဲသၟိင်တံ ရပ်ဂွံလဝ် ကွဳစက်ဖ္ဍိုက်ကပေါတ်ဗၞိက်သေံ (၆၀) ဖ္ဍိုက်ပြင် အကြာကွာန် “ကြက်သွန်ကုန်း” ကဵု ဏာတ်သာန်ဂှ်နွံရောင် ညးဒေသမွဲတၠဂှ် ဟီုရ။
ဗွဲကြဴနူကပေါတ်ဗၞိက်သေံ ဒးဒုင်ရပ်ဏာတုဲဂှ် ပ္ဍဲဗွဝ်ဖျာမတ်မလီုဂှ်လေဝ် စၞစသုင်/ကပေါတ်ဗၞိက်သေံဂမၠိုင် ၚုဟ်တိုန်အာကီုရောင် ဂွံတီကေတ် နူညးဒေသလ္တူဍုင်တံ ဟီုဂးလဝ်ရ။
“ကၠေင် (ပုဇွန်နှစ်ကောင်ဆီ) မွဲလဳတာမွဲဗူ နူ (၅၀၀) ဒကေဝ်ဂှ် သၠုင်တိုန်အာ ဒဵုကဵု (၁၀၀၀) ဒကေဝ်ရ။ ကပေါတ်စၞစသုင်တၞဟ်တံလေဝ် ၚုဟ်ဗက်တိုန်ကီုရ။ နူကၠာတေံရ ၚုဟ်ကပေါတ်တိုန်မံင်တုဲ အကြာညးဍုင်ကွာန်တံ ကြေပ်ဂြတ်မံင်ဂှ် လၟုဟ်ဏံလေဝ် ၚုဟ်ကပေါတ်ထပ်တိုန်တှ်ေ ပရေင်စသုင်မံင်စံင်ဂှ် ပဵုတုဲကြေပ်ဂြတ်ရ” သာ်ဝွံ ညးဒေသလ္တူဍုင်မတ်မလီုမွဲတၠ ဟီုရ။
ကပေါတ်ဗၞိက်သေံဂမၠိုင်ဝွံ နူလ္ပာ်ကျာ်ပိ ပယျဵုသေံဗၟာတေံ ဖ္ဍိုက်နင်ကဵု ကွဳစက်သၠာ (၆) ၊ သၠာ (၁၂) ဂှ် က္လေင်လှာဲကွဳစက် ဒၞာဲကြပ်ကဵုရုင်စက်တိဗုတ် (တိဗဳလာတ်) MCL ဂှ်တုဲ ဖ္ဍိုက်ဏာ ဍုင်မတ်မလီုတေံရ။
ကပေါတ်ဗၞိက်သေံ ဖ္ဍိုက်ပၠောပ်နင် ဇရေင်တွဵုရးဍုင်ဂမၠိုင်ဂှ် သၟာင်နူပရေင်ရပ်စပ် ပ္ဍဲသၞေဟ်ကင်စၟဳစၟတ် ကမ္မယှေန်ပၞာန်ဂှ်မ္ဂး ဂကောံဂမၠိုင်၊ ဌာနမဆေင်စပ်ဂမၠိုင်တံ တၟာတ်ဒၞာဂၠံင်ဍာန်တုဲ ရပ်စပ်ကီု၊ လုပ်ရပ်ပ္ဍဲရုင်ခြိုင်ကပေါတ်ဂမၠိုင်ကီု နွံဒၟံင်ရ။
မွဲလ္ပာ်ဂှ်လေဝ် ကဵုစရိတ်ဂၠံင်ဍာန် ကုသၞေဟ်ကင်ကမ္မယှေန်ပၞာန်၊ ဂကောံ/ဌာန မဆေင်စပ်ဂမၠိုင်တုဲ နကဵုနဲဇဳ ပၠောပ်မံင်ဖိုဟ်ရ။
“ကာဒးဒုင်ရပ်တံဂှ် ကာလှာဲပြံင်တံရ။ ဖ္ဍိုက်နင်ကဵုကွဳစက်ဖ္ဍိုက်ကပေါတ် နူလ္ပာ်ကျာ်ပိတုဲဂှ်တှ်ေ လှာဲကာ ပ္ဍဲဍုင်ကျာ်မြဟ်တုဲ ဖ္ဍိုက်ဏာမတ်မလီုရ” သာ်ဝွံ ညးဒေသမွဲတၠ ဟီုရ။
ပ္ဍဲတွဵုရးဍုင်မန်ဝွံ ရာန်စကာဒၟံင် ကပေါတ်နူကၟိန်ဍုင်သေံ မပ္တံကပေါတ်စၞစသုင်၊ ဂဥုဲဇဗ၊ ကပေါတ်သိုင်ခၞံ၊ ကပေါတ်မၞိဟ်စကာနာနာ ဗွဲမဂၠိုင်ဂှ်ရ လၟုဟ်ဏံ ရပ်ဒၟံင်ကပေါတ်သေံဂမၠိုင်တုဲ သၟာင်နူၚုဟ်တိုန်ကၠုင်ဂှ်မ္ဂး ကိစ္စကပေါတ်ပိုတ်သ္ကုတ်ဂှ်လေဝ် ညးစကာကပေါတ်တံ ဂွိင်ဂွဲါဒၟံင်အိုတ်ရ။