ပ္ဍဲကဵုပေဲါဆဵုဂဗ တၞောဝ်ဒတောဝ်ကောန်ဂကူကောန်ဍုင်အရင်မန်သေံ မကၠောန်ဗဒှ် ပ္ဍဲဘာလကျာ် “ဝါတ်ယာဲဏဃောန်” ၊ ပွိုင်ဍုင်ၜါန်ပေါင်၊ ခရိုင်ရာတ်ချၝုရဳ၊ ကၟိန်ဍုင်သေံဂှ် ရုဲစှ်သ္ပဒ္တန်ဏာ ညးစၞးကောန်ဂကူကောန်ဍုင်အရင်မန် (၅) တၠရောင် ဂွံတီကေတ်ရ။
သွက်သ္ဂောံချူဓဇက်သၞောဝ်ဥပဒေ တၞောဝ်ဒတောဝ်ကောန်ဂကူကောန်ဍုင်အရင် ကေုာံ သွက်ဂွံပံင်တောဲရေင်တၠုင် ကိစ္စအခိုက်ကၞာယေန်သၞာင်၊ ဘာသာ၊ ဂကူ အကြာတၞောဝ်ဒတောဝ် ကောန်ဂကူကောန်ဍုင်အရင်တၞဟ် မၞုံအပ္ဍဲကၟိန်ဍုင်သေံဂမၠိုင်ဂှ်မ္ဂး အရင်တၞောဝ်ဒတောဝ်ဂကူမန် မၞုံအပ္ဍဲကၟိန်ဍုင်သေံတံ မနွံပၟိက်ကၠုင် ညးစၞးရ။
ဟိုတ်ဂှ်ရ ညးစၞးသွက်ကောန်ဂကူကောန်ဍုင်အရင်မန်သေံ နူခရိုင်နန်ထၝုရဳ၊ ဍုင်ၜင်ကံက်၊ ရာတ်ချၝုရဳ၊ ဖေတ်ၝုရဳ ကေုာံ ခရိုင်ကာန်ချဏၝုရဳ (၅) တၠဂှ် ညးတိုန်စိုပ် ပ္ဍဲပေဲါဆဵုဂဗ ဂိတုသေပ်တေမ်ဗာ စၟတ်တ္ၚဲ (၂၀) ဏံ တုပ်စိုတ်ရုဲစှ်ပ္တိုန်လဝ်ရ။
ကိစ္စပရေင်ယိုက်ဂၠေင်တာလျိုင် ညးစၞးရုဲစှ်လဝ်ဂမၠိုင်ကီု၊ လညာတ်တၞောဝ်ဒတောဝ်မန် မၞုံပ္ဍဲကၟိန်ဍုင်သံကီုဂှ် သၟာန်သၟုက်သ္ပလဝ်ဒ္တန်ရဂှ်လေဝ် ဥက္ကဌဂကောံသၟတ်မန်ဍုင်ၜင်ကံက် နာဲတိုင်ပ္ကဴ ဟီုကဵုဌာန်ပရိုင်ဗၠးၜးမန်ရ။
“ပ္ဍဲကဵုပေဲါကောံဓရီု ကၠောန်လဝ်ဂိတုတုဲဏံဂှ် ညးစၞး (၅) တၠ၊ ညးစၞးအရန် (၅) တၠ ရန်လဝ်ရ။ တုဲတှ်ေ နကဵုညးစၞးကောန်ဂကူကောန်ဍုင်အရင်တံဂှ် ရုဲလဝ်ဗွဲအပြောံတုဲဣရ။ တာလျိုင်ကဵုလဝ်ဂှ် ယိုက်ဂၠေင်မာန် / ဟွံမာန်၊ မၞိဟ်တဏံ ဒှ်မၞိဟ်စၞးထေက်ဟာ၊ မန်နွံပ္ဍဲဍုင်သေံဖအိုတ်ဂှ် အာစိုပ်ရီုဗင်မာန်ဟာ၊ စတမ်နူမန်ဍုင်သေံတံ တုပ်စိုတ်/ ဟွံတုပ်စိုတ်ဟာဂှ် ဗီုကဵုသၟာန်လဝ်လေဝ်ဏး” သာ်ဝွံ ညးဟီုရ။
ပေဲါဆဵုဂဗလၟုဟ်ဏံဝွံ ကောန်ဂကူမန် နူပွိုင်ဍုင် (၃၂) ပွိုင်ဍုင် သွက်ဂွံကၠုင်စိုပ်ဂှ် စၟဳကေတ်လဝ်ကီုလေဝ် ဟိုတ်နူအာကၠုင်ခက်ခုဲတုဲ ညးစၞး နူ (၂၀) ပွိုင်ဍုင်ဟေင် ကၠုင်စိုပ်ရဂှ် နာဲတိုင်ပ္ကဴ ဟီုရ။
ပ္ဍဲကၟိန်ဍုင်သေံဝွံ တၞောဝ်ဒတောဝ်ကောန်ဂကူကောန်ဍုင်အရင် ၜိုတ် (၇၀) သ္ပလန်ဒ္တန်နွံတုဲ ဟိုတ်နူဟီုဂးစကာ အရေဝ်ဘာသာမိ ဟွံမွဲဂှ်ရ နလၟေင်ဒေသ သုန်ဂြာံကၠေံကၠက်အာနွံရ။
အတိုင်သၞောဝ်ဥပဒေ (၂၀၂၅) ဂှ်မ္ဂး အလဵုအသဳသေံ သ္ပစၟတ်သမ္တီလဝ် ဇာနှိက် (ကွန်ယက်) တၞောဝ်ဒတောဝ်ကောန်ဂကူကောန်ဍုင်အရင် (၆၀) နွံတုဲ သွက်ဂွံစၟတ်သမ္တီသၠုင်ပ္တိုန် ပရေင်မင်မွဲရံင်စံင်ဘဝမၞိဟ်မာန်ဂှ် နကဵုကောန်ဂကူကောန်ဍုင်အရင်မန် မၞုံပ္ဍဲကၟိန်ဍုင်သေံတံ သွက်ဂွံပလေဝ်ပလေတ် ပကောံပကေဝ် တင်နင်မနွံပၟိက်ဂမၠိုင်ကဵု ပရေင်ရုဲစှ်ညးစၞးဂမၠိုင်ကီု၊ သွက်ဂွံသဳကၠဳ လၟေင်ကမၠောန် သ္ဂောံဆက်ရေင်တၠုင်ဂမၠိုင်ဂှ်ကီု ဒးကၠောန်သ္ပပေဲါဆဵုဂဗရ။
ပ္ဍဲကဵုပေဲါဆဵုဂဗ အခိင်သဝ်တ္ၚဲဂှ်ဝွံ ပရူပရာသွက်ဂွံကၠောန်ဗဒှ်အာ တ္ၚဲကောန်ဂကူမန် မရနုက်ကဵု (၈၀) ဝါ၊ ဒၞာဲလဘာကျာ် “ဝါတ်ယာဲဏဃောန်္ၚောန်၊ ပ္ဍဲဂိတုမာတ်ဂှ်လေဝ် သဳကၠဳလဝ်ကီုရောင် ဂွံတီကေတ်ရ။