သၞေဟ်ကင်မွဲဒမြိပ်ဂၠံင်ဇၞော် ဍုင်မန်ကဵု ရးလ္ဂုင်ဂှ် စၟဳစၟတ်သီကေတ်ဒၟံင်ကပေါတ်နွံတုဲ ပြင်ပလံင်ကပေါတ် ဒှ်ခက်ခုဲဗွဲမလောန်ရောင် ညးသွံရာန်ကပေါတ်အရပ်စပ်လ္ၚဵုတအ် ဟီုရ။
ဟိုတ်နူပရေင်စၟဳစၟတ်တေင်တုဲ သီုကဵုသီကေတ်ဒၟံင်ကပေါတ်နွံကၠုင်ဂှ်တုဲ ပ္ဍဲအရာဗကန်ရာန်ကပေါတ်ကီု၊ ပ္ဍဲအရာပြင်ပလံင်ကပေါတ် ဍုင်မန်ကဵု ရးလ္ဂုင် မမိက်ကဵုမွဲမွဲကီုဂှ် ကွဳစက်တအ်ဟွံဒုင်တဲဂှ်ရ ဒှ်ကၠုင်ခက်ခုဲရောင် ညးသွံရာန်ကပေါတ်စက် နူဍုင်ဇြပ်ဗုမွဲတၠ ဟီုထ္ၜးရ။
“ရာန်လဝ်ကပေါတ်စက် နူလ္ဂုင်မွဲမ ဒုင်လျိုင်ဍေံ (အာမခံ) ဂွံလဝ် ပွိုင် (၆) ဂိတု၊ (၆) ဂိတုဟွံပေင်ဏီ ယောင်လီုအာ၊ ဂွံကလေင်ပြင်ဏာလ္ဂုင်တေံဂှ် တၠကွဳစက်တအ် ဟွံဂံင်ဒုင်တဲ၊ ဍေံစၟဳစၟတ်အကြာဂၠံင်တှ်ေ ဖေက်ဍေံသီတုဲ တၠကွဳစက်တအ်ဟွံဒုင်တဲ၊ ဂွံကဵုဏာရဲရေင်တၠုင် ပြင်ပလံင်ကပေါတ်တအ်လေဝ် လၟုဟ်တှ်ေ ဆေင်ကဵုကပေါတ်စက်တှ်ေ ဍေံဟွံဒုင်တဲ ခက်မံင်ဖိုဟ်” သာ်ဝွံ ညးဟီုရ။
အကြာကာလဏံဂှ် ဒၟာနူပရေင်စၟဳစၟတ်ကပေါတ်အရပ်စပ်ကၠုင်နူသေံ တေင်ဂြတ်ဒၟံင်ဂှ်တုဲ ပ္ဍဲကဵုသၞေဟ်ကင်ဂမၠိုင်တအ်ဂှ် ဆဵုဒးကပေါတ်သေံမ္ဂး သီကေတ်ဏာဖအိုတ်တုဲ သီုဒးဒုင်စောဲစပ်ဒုဟ် သၞောဝ်ဥပဒေပၠုပ်ပတိတ်ကပေါတ်နွံကၠုင်ရ။
သ္ပဟိုတ်နူသာ်ဂှ်တုဲ ကမ္ပဏဳပြင်ပလံင်ကပေါတ်တအ်ကီု၊ ကွဳစက်ဇက်ပလံင်ကပေါတ်တအ်ကီု ဟွံဂံင်ဒုင်တဲ ပရေင်ပြင်ပလံင်ကပေါတ်ဂှ်အိုတ်ရ။
“နူကဵုဍေံပတေင်ပတိုန် စၟဳစၟတ်ကပေါတ်သေံတုဲတှ်ေ ပရေင်ကမၠောန်သွံရာန်ကပေါတ်အန်လာင်တအ်ကီု၊ ပရေင်က မၠောန်ပြင်ပလံင်ကပေါတ်တအ်ကီု၊ ညးဍုင်ကွာန်တအ် ဗကန်ရာန်ကပေါတ်နူလ္ဂုင်ကီု ဒှ်အာပရေင်ခက်ခုဲဖအိုတ်ရ” ဂှ် ညးသွံရာန်ပလေဝ်ဒၟံင် ကပေါတ်ကမ်ပျူတာ လတူဍုင်မတ်မလီုမွဲတၠ ဟီုရ။
ကြဴနူကဵုအလဵုအသဳတၠအဝဵုတအ် ပတေင်ပတိုန်သၞောဝ်ဥပဒေ ပရေင်ပၠုပ်ပတိတ်ကပေါတ်ဂှ်တုဲ ကပေါတ်စက်နာနာသာ်ကီု၊ ကပေါတ်ကမ်ပျူတာနာနာကီု၊ ကပေါတ်ဓာတ်လလဳနာနာသာ်ကီု ကပေါတ်အရပ်စပ်နာနာသာ်ဂှ် ပိုတ်ကၠုင် ဒဵုကဵုဗကန်ရာန်ဟွံဂွံ က္တဵုဒှ်ဒၟံင်ရ။
ဗီုကဵုဍုင်မန်မ္ဂး စပ္တံနူကပေါတ်ပါင်ဖဴနာနာသာ်ကီု၊ ကပေါတ်အရပ်စပ်နာနာသာ်ကီု၊ ကပေါတ်သုင်စောဲပ္ဍဲသ္ၚိနာနာသာ်ကီုတအ်ဂှ် သ္ပပဓာန်ဒၟံင်ကဵု ကပေါတ်ကၠုင်နူသေံဂၠိုင်တုဲ ဒၟာနူစၟဳစၟတ်သီကေတ်ကပေါတ် က္တဵုဒှ်ကၠုင်ဂှ်ရ တၠကွဳစက် ဇက်ပလံင်ကပေါတ်တအ်လေဝ် ဟွံဂံင်ဇက်ပလံင်ကပေါတ်ဒှ်ကၠုင်တုဲ တၠကွဳစက်လ္ၚဵုတအ်ဂှ် ဒးဒေါံဇူလဝ် ပရေင်ဇက်ပလံင် ကပေါတ်လေဝ် နွံကၠုင်ကီုရ။