အခိုက်ကၞာယေန်သၞာင်မန်ဝွံ သၟာင်နူဗ္တောန် အပ္ဍဲအခန်ဗ္တောန်လိက်ဂှ်မ္ဂး သၟတ်တံ နွံပၟိက်ကၠုင်ကဵု အခေါင်ထ္ၜးစရာဲကွတ်နတဲရောင် ညးစိုန်သကီုဆေင်စပ်ကဵု အခိုက်ကၞာန်ယေန်သၞာင်မန်တံ ဟီုဂးထံက်ထ္ၜးရ။
သွက်ဂွံဆက်စၠောံတဲကဵု ဇရေင်သၟတ်မန်တၞောဝ်ဒတောဝ်တၟိမာန် ရန်တၟံတုဲ ကွတ်ပညာအခိုက်ကၞာယေန်သၞာင်မန်ဂှ် နဒဒှ်ဘာသာမွဲ စဗ္တောန်ကၠုင် ပ္ဍဲကဝ်လိက်ကောန်ဂကူမန် နူသၞာံ (၂၀၂၃) တုဲ ပ္ဍဲကဵုတန်ဗ္တောန်မ္ၚးဂမၠိုင်ဂှ်လေဝ် ဗ္တောန်ကဵုဒၟံင်နွံရ။
ဟိုတ်နူအခေါင်အရာ ထ္ၜးစရာဲကွတ်နတဲမာန်အောန်ဂှ်ရ သၟတ်တံ စိုတ်လုပ်စအောန်ကၠုင်ဂှ် ဂွံဆဵုကေတ်တုဲ သွက်ဂွံဖန်ဗဒှ်ကဵုဂှ် ဒးစဳဇန်ကဵုထေက်ရောင် အ္စာၝောံမိမိုဝ်မိုဝ် မဗ္တောန်ဒၟံင်ကွတ်ဘာသာ ဆေင်စပ်ကဵုအခိုက်ကၞာယေန်သၞာင်မန် ပ္ဍဲကဝ်လိက်ကောန်ဂကူမန်ဂှ် ဟီုရ။
“အ္စာၝောံတံဂှ် ပဲါနူကဝ်လိက်တုဲ ပ္ဍဲကဵုတန်ဗ္တောန်မ္ၚးဂှ်လေဝ် ပံက်ဗ္တောန်မံင်မွဲနှေံမွဲနှေံရ။ ဆဂး ဗ္တောန်တုဲ တုဲအာဟီုဂှ်တှ်ေ ကောန်ၚာ်တံ ဗီုလဵုစိုတ်ဂွံလုပ်စရော။ သွက်ဍေံတံ ဒၞာဲထ္ၜးကွတ်တဲမာန်တံ၊ အခေါင်အရာတံလေဝ် ဒးဖန်ဗဒှ်ကဵုဏောင်” သာ်ဝွံ ညးဟီုရ။
စဵုကဵုအခိင်အခါတ္ၚဲဏံ စၞးဒးကဵုမံင်ဒၞာဲကုသံင်ဗံက်လှဲလှဲလးလး ပ္ဍဲပေဲါသဘင် ကေုာံ အသေအဟာန် အခိုက်ကၞာယေန်သၞာင်မန်ဂှ် ကဵုဒၞာဲကုပရေင်တိင်တိုက် အခိုက်ကၞာယေန်သၞာင်မန်ညိဂှ်လေဝ် ဖ္တိုက်ဖၟောဝ်လဝ်ရ။
ပ္ဍဲအခိုက်ကၞာယေန်သၞာင်မန်ဝွံ ပွမလှေ်၊ ဒယှေ်၊ တိင်တိုက်၊ ဗွိုက်လ္တက်အခိုက်ကၞာ ကေုာံ အခိုက်အလေံဂမၠိုင် ပါလုပ်တုဲ အာဲကၟာဲယေန်သၞာင်မန်ဏံဝွံ သွက်တၞောဝ်ဒတောဝ်တၟိတံ ဂွံဆက်စၠောံမာန်ဂှ် စိုပ်မံင်အကာဲအရာ တင်ကော်ဆော ဇၞော်ကၠုင်ဒၟံင်ရောင်ဂှ်လေဝ် ညးဟီုရ။
“ညးလေပ်ပညာဏံ၊ ညးဗ္တောန်ကဵုမာန်တံဂှ်လေဝ် အောန်ကၠုင်ရ။ အ္စာၝောံတံလေဝ် အာယုက်ဇၞော်ကၠုင်ရဟီုတှ်ေ သွက်ဂွံဆက်စၠောံတဲကဵု သၟတ်ခေတ်တ္ၚဲဏံဂှ် ကိစ္စဇၞော်မံင်ဣရ။ သၟတ်ခေတ်တ္ၚဲဏံ လေပ်လဝ်ပညာဏံ စိုန်သကီုမှ ဆက်စၠောံတဲကဵု တၞောဝ်ဒတောဝ်တၟိတေံမာန်ရ” သာ်ဝွံ ဟီုရ။
ပ္ဍဲကဝ်လိက်ကောန်ဂကူမန်ဝွံ စနူသၞာံ (၂၀၂၃) စဵုကဵု (၂၀၂၆) ဂှ် ညးကတ်လ္ၚတ် ကွတ်ဘာသာလိက်ပတ်မန် ကေုာံ အခိုက်ကၞာယေန်သၞာင် (၁၀၇) တၠနွံတုဲ ညးကလိဂွံတဆိပ်ကြာကီု၊ ညးဆက်ကတ်လ္ၚတ်ပညာကီုနွံရ။
အခေါင်ထ္ၜးစရာဲကွတ်တဲဇကု မွဲကရောံကုအစဳဇန်ဗ္တောန်ဂှ်နွံမ္ဂး သွက်ဂွံဆက်စၠောံတဲ ကုတၞောဝ်ဒတောဝ်တၟိ ကေုာံ သ္ဂောံထိင်ဒဝ် အခိုက်ကၞာယေန်သၞာင်ဂှ် သကဵုဒှ်အထံက်ရီုရောင် ညးစိုန်သကီုဂမၠိုင်တံ ဟီုရ။
အခိင်လၟုဟ်ဏံဝွံ ကွတ်ပညာအခိုက်ကၞာယေန်သၞာင်မန် မပ္တံလှေ်၊ ဒယှေ်၊ တိင်တက်လ္ၚဵုတံဂှ် တၠပညာသ္ဂောံဗ္တောန်ကဵုမာန် အောန်စှ်ေကၠုင်ဂှ်ရ ဒးဒှ်ဓဝိင်ကဵု ပရေင်ဗ္တောန်ကွတ်နတဲ ဒေံါဒေင်အာရ။