ညးသွံရာန်ဂဥုဲၜူမာဲ ကေုာံ ညးသုင်စောဲဂဥုဲၜူမာဲ မရပ်ဂွံလဝ် အပ္ဍဲပွိုင်ဍုင်ရေဝ်၊ တွဵုရးဍုင်မန်ဂှ် လ္ပကဵုအခေါင် က္လေင်နုက်ပ္တိတ်ကဵုသြန်တုဲ ကေတ်ကဵုအရေဝ် ဗွဲမစိုပ်တရဴညိဂှ် ညးဒေသရေဝ်ဂမၠိုင်တံ အာတ်မိက်ရ။
ညးသုင်စောဲသွံရာန်ဂဥုဲၜူမာဲ အပ္ဍဲပွိုင်ဍုင်ရေဝ်ဂမၠိုင်ဂှ် နူကဵုဂကောံဒပ်ပၞာန် ကေုာံ သ္ကိုပ်အုပ်ဓုပ်ကွာန်/အရာပ်တံ ရပ်စပ်ဒၟံင်ကီုလေဝ် ကဵုသြန်ဗွဲမဂၠိုင်တုဲ အပ္ဍဲတ္ၚဲညိညဂှ်ဟေင် က္လေင်ဗလးကဵုနွံရ။
ဟိုတ်နူက္လေင်နုက်ပ္တိတ်ကဵုသြန်မာန်ဂှ်ရ ပရေင်သွံရာန်ဂဥုဲၜူမာဲဂမၠိုင် သာပရေံဂၠိုင်ကၠုင်တုဲ ဗ္တိုက်သရိုဟ်ညံင်အဆက်တမ်ရိုဟ်ဂွံပိုတ် ဟွံမာန်ရဂှ် ညးဒေသရေဝ်ဂမၠိုင်တံ ဟီုရ။
ညးတြုံဒေသရေဝ်မွဲတၠဂှ် “ညးသုင်ကီု ညးရာန်ကီု ရပ်ဂှ် ရပ်မံင်ရ။ ဆဂး က္လေင်နုက်ကဵုသြန်တှ်ေ မွဲချိုန်ခဏဟေင် က္လေင်ဗလးကၠုင်ရ။ ဒှ်မံင်ဗီုဂှ်တှ်ေ ရပ်လေဝ် မွဲချိုန်ခဏရ။ စိုပ်ကၠုင်မ္ၚးတှ်ေ ပဵုတုဲဂံင်ကၠောန်ကၠုင်ရ။ ဟိုတ်ဂှ်ရ ဟွံမိက်ကဵုဗလးလောဲလောဲ ဗီုလၟုဟ်ဏံပုဟ်” သာ်ဝွံ ဟီုရ။
ဟိုတ်ဂှ်ရ ပံင်ကောံပါလုပ် နကဵုသြန်လာဘ်ဗဇဴတုဲ လ္ပဗလးကဵုကီု ကေုာံ ညးမရပ်ဂွံဂမၠိုင်တံဂှ် အတိုင်သၞောဝ်ဥပဒေဟေင် ကဵုဒုဟ်ဒဏ်ပိုတ်ပိုတ်သ္ကုတ်သ္ကုတ်ကီုဂှ် အာတ်မိက်ကၠုင်ရ။
အပ္ဍဲလ္တူဍုင်ရေဝ်ဂှ် သွံရာန်ဒၟံင်ဂဥုဲၜူမာဲဂမၠိုင် မံက်မံက်ဂတဝ်ဂတဝ်တုဲ ညးသုင်စောဲဂၠိုင်ကၠုင်ဂှ်ရ ညးဒေသလ္တူဍုင်တံ ဒးဆဵုဂဗဒၟံင် ပရေင်ကၠတ်ဂၠံက်ပၠံင်ၜး ကြပ်အရိုဟ်တ္ၚဲရ။
“လၟုဟ်ဏံတှ်ေ တိတ်အာကၠုင်အခိင်တ္ၚဲလေဝ် ဒးဖေက်မံင်ရ။ အခိင်ဗ္တံတှ်ေလေဝ် စနူကပေါတ်သုင်စောဲသ္ၚိဍောတ်ဍောတ်တံလေဝ် ဒးဒုင်ကၠတ်မံင်ရ။ ကမၠတ်ဂှ် ကြာန်ဟာ လ္ပမှာန်ရ။ ကောန်ပၞာန်တံလေဝ် ဒးဖေက်၊ ညးသုင်စောဲဂဥုဲတံလေဝ် ဒးဖေက်၊ ပရေင်ဂီုကၠီုလေဝ် ဟွံမွဲရပုဟ်” သာ်ဝွံ ညးဗြဴဒေသရေဝ်မွဲတၠ ဟီုရ။
တုဲပၠန် နူဂကောံမှာဇန်မန်ကီု၊ ဂကောံအုပ်ဓုပ်ကွာန်/အရာပ်ကီု သွက်ဂွံကဵုပညာ စပ်ကဵုပရူပရာဂုန်ဖဵုပရေံဂဥုဲၜူမာဲ ကုသၟတ်မၞုံအပ္ဍဲကွာန်တံဂှ်လေဝ် မနွံပၟိက်ရ။
ဂဥုဲၜူမာဲဂမၠိုင်ဝွံ သၟာင်နူကလိဂွံလောဲသွာတုဲ ဟိုတ်နူရာန်ဂွံဒၟံင် နကဵုၚုဟ်မးဗွဲသက်သာဂှ်ရ အကြာသၟတ်ကွးဘာကဵု ညးအာယုက်ဟွံပေင်တံ ပြးဇးဒၟံင်ဗွဲမမြက်ဇက်တုဲ ကိစ္စဘဝအနာဂတ်သၟတ်တံ ဒးလီုလာ်ဂှ်လေဝ် မိမညးဍုင်ကွာန်တံ ဒှ်ဂဝိင်စံင်တူဗွဲတၟေင်ရ။
ၜိုန်ဂှ်ကီုလေဝ် ကိစ္စသွံရာန်ဂဥုဲၜူမာဲ သၟတ်အာယုက်ဟွံပေင်ဏီတံ ပါလုပ်မံင်ဂှ် ညးစၞးကၠတ်ထဝ် မဆေင်စပ်ပွိုင်ဍုင်ရေဝ်တံ သ္ပလဝ်ကရဴမတ်ဖိုဟ်ရ။