ပ္ဍဲဌာန်ပ္တန်သာသနာဘာကျာ်ဒဵုတၟံဗြာတ်၊ ကွာန်ပုဖ္ပဝတဳ၊ ပွိုင်ဍုင်ရေဝ်၊ တွဵုရးဍုင်မန်ဝွံ တ္ၚဲဏံ ဂိတုဘတ် (၁၀) မံက်၊ အခိင်နူဂယးဂှ် ကၠောန်ဗဒှ်ဏာ သဘင်ပူဇဴဗဝ်သၟုတ်လ္ၚီ အတိုင်အခိုက်ကၞာ နလၟေင်ဇၟာပ်ဇၟာပ်သၞာံရ။
ပ္ဍဲဗလးကျာ်ဂှ်ဝွံ ညးဒေသလၟိဟ်ကဵုလ္ၚီ နူဒေသနာနာတံ သ္ပပူဇဴဗဝ်သၟုတ်တုဲ အခိင်နူဂယး ၜိုတ် (၇) နာဍဳဂှ် ကလင်ပှင်မှိင် ဓဝ်ကုသဵု၊ ဓဝ်သဳလ နူဇရေင်ကျာ်ဇၞော်အ္စာ “ထပိုဲဍောတ်” ရ။
ပ္ဍဲကဵုသဘင်ပူဇဴဗဝ်သၟုတ်ဂှ် ညးဒေသမန်လၟိဟ်ကဵုလ္ၚီ နူကွာန်ခေါဇာ၊ ဟံဂံါ၊ အင်ဒင်၊ အၜဝ်၊ တံင်မောံ၊ တံင်ပရင်၊ တၟံကၞေင် ကေုာံ ဍုင်လၟိုင် မၞုံအပ္ဍဲပွိုင်ဍုင်ရေဝ်တံ ပါလုပ်သ္ပကုသဵုဇၟာပ်သၞာံရ။
သဘင်ပူဇဴဗဝ်သၟုတ်ဏံဝွံ သ္ပအစာံကဵု တ္ၚဲဌာပနာဖျေံရိုဟ်ကၞက် ပ္တန်ကျာ်ဓာတ်သော်ဝေဇယန္တဝ်၊ အပ္ဍဲအရှာံဘာကျာ်ဒဵုတၟံဗြာတ် အကြာသက္ကရာဇ်ကောဇာ (၁၃၅၆ – ၅၇) သၞာံ၊ ဂိတုဘတ် (၁၀) မံက်၊ (သၞာံခရေတ် ၁၉၉၅၊ ဂိတုသေပ်တေမ်ဗာ ၃) ဂှ်တုဲ သၞာံဏံမ္ဂး ကၠောန်သ္ပပူဇဴကၠုင် မရနုက်ကဵု (၃၂) ဝါရ။
သဘင်ပူဇဴဗဝ်သၟုတ်ဏံဂှ် ကျာ်ဇၞော်အ္စာဘဒ္ဒန္တပုဖ္ပရမ္မ “ထပိုဲဍောတ်” ကဵု ကွး/ဒါယကာဂမၠိုင်တံ က္ဍိုက်က္ဍိုပ်တုဲ ကၠောန်သ္ပကၠုင်ဇၟာပ်သၞာံရ။
ၜိုန်ရဒှ်အခိင်ကသီုကီုလေဝ် ကၠောန်သ္ပပူဇဴဗဝ်သၟုတ်အခိင်နူဂယးဏံဂှ်ဝွံ ဟွံဒးဗြဲမွဲသာ် ညးဍုင်ကွာန်/ညးဒေသဂမၠိုင် ဂွံကၠုင်စိုပ်သ္ပကုသဵု ပေင်ဗလးကျာ်/သၠာတ်ကျာ်မာန်ဂှ် ဒှ်တင်တၟေင် သဘင်ပူဇဴဗဝ်သၟုတ် မွဲတင်ရဂှ်လေဝ် ညးဒေသဂမၠိုင်တံ ဟီုဂးမံင်နွံရ။
ပၞောဝ်ကဵုသဘင် (၁၂) ရာသဳ ကောန်ဂကူမန်တံဝွံ သဘင်ပူဇဴဗဝ်သၟုတ်ဏံဂှ် ပ္ဍဲတ္ၚဲသဳဂိတုဘတ်ပေင် ကေုာံ ကၠာဟွံစိုပ်တ္ၚဲသဳဂိတုပေင်ဂှ်မ္ဂး ပ္ဍဲကဵုလၟေင်ဘာလကျာ် ဒေသကွာန်ဂမၠိုင်ဂှ် သိုင်ခၞံဗီုပြင်က္ၜင် သ္ပပူဇဴကဵုဒါန်ဗဝ်သၟုတ်တုဲ ပ္ဍဲဘာဗ္တောန်လိက်ဂမၠိုင်ဂှ်လေဝ် ကွးဘာဂမၠိုင်တံ ကၠောန်သ္ပကၠုင် နဒဒှ်ပရေင်ချဳဓရာင်ဘာမွဲကီုရ။
အပ္ဍဲကဵုသ္ပပူဇဴပိဏ္ဍပါတ်ဗဝ်သၟုတ်ဏံဝွံ နကဵုကပေါတ်ဝတ္ထု စၞအာဟာရဘောဇိုန် ကဵုဒါန်နာနာ မၞုံယၟုကြပ်ကဵုလ္ၚီ မပ္တံပုင်သၟုတ်၊ က္ဍိုင်၊ ဇၞောဝ်၊ ပ္ကဴသဴမြမောဝ်၊ ပၟတ်ပၞာင်သ္ဍဴ၊ ဇဗၠုသွတ်တံဂမၠိုင် သ္ပပူဇဴကဵုဒါန်ဂှ်ရ ကောန်ဂကူမန်တံ ကော်ဂး သဘင်ပူဇဴဗဝ်သၟုတ်လ္ၚီ (ဝါ) သဘင်ပူဇဴဗဝ်သၟုတ်က္ၜင်နွံဂှ် ဂွံတီကေတ်ရ။