အပ္ဍဲဒေသမန်ကဵု ကရေင်ဝွံ ဟိုတ်နူသ္ၚိသွံဂဥုဲၜူမာဲ / ညးသွံဂဥုဲၜူမာဲ ကေုာံ နကဵုၚုဟ်မးဂဥုဲၜူမာဲအောန်ဂှ်ရ သွက်ကွးဘာအဝဲတန်မူလဂမၠိုင်တံ ကလိဂွံဒၟံင် “ဟောဝ်ကေတ်ဒၟံင်” ဂဥုဲၜူမာဲ ဗွဲမလောဲသွာနွံရောင် အတိုင်ဂကောံချူဓဇက်မူဝါဒဂဥုဲၜူမာဲမန် (Mon Drug Policy Team-MDPT) ဟီုဂးလဝ်ဂှ် ဂွံတီကေတ်ရ။
ဟိုတ်နူသွံတြးကုသၟတ်ကွးဘာ အာယုက်ဟွံပေင်တံမွဲတဆံင်ကီု၊ ဟိုတ်နူညးဆိုက်ဗ္ဒက် သွက်ဂွံစမ်ၜတ်စကာကီုတုဲ အကြာသၟတ်ကွးဘာတန်မူလ အဝဲ (၁၀) သၞာံတံလေဝ် စကာဂၠိုင်ကၠုင်ရောင် မိပ္ကဴဇမ္ပာ နူ (Mon Drug Policy Team-MDPT) ဟီုရ။
“ပဲါနူသၟတ်တံတှ်ေ ကွးဘာပန်မသုန်တာန်တံလေဝ် စကာမံင်ရ။ ဣညအ်ဂှ် နအလဵုအ္စာၝောံတံ ကၠုင်ပံက်ဟီုရ။ တုဲတှ်ေ ပ္ဍဲကဵုဗွဝ်ဖျာဂှ်လေဝ် သွံမံင်ကဵု ညးအာယုက်ဟွံပေင်တံရ။ ဇှ်ရတှ်ေ အကြာကွးဘာတံဂှ် ပဵုတုဲတှ်ေ ပရးဇးကၠုင်ရ” သာ်ဝွံ ဟီုရ။
အပ္ဍဲကဵုဗွဝ်ဖျာ သွံတြးမံင် ဂဥုဲၜူမာဲၚုဟ်မးသာသာ ဗီုပြင်စၞစဂှ်လေဝ် ဒှ်ဟိုတ်ဖဵု သွက်သၟတ်ကွးဘာတံ သကဵုကလိဂွံ ဗွဲမလောဲသွာမွဲသာ်ရ။
ဟိုတ်ဂှ်ရ ဂဥုဲၜူမာဲဝွံ အကြာသၟတ်တံ စကာလောဲသွာမာန်သၟးဟွံက စဵုကဵုသၟတ်သြန်ဟွံဍိုက်ပေင်တံလေဝ် ဖံက်လုပ်စိုပ်ကၠုင်ဒၟံင်ရ။
ဟိုတ်ဖဵုပရေံဂဥုဲၜူမာဲဂမၠိုင်ဂှ်ဝွံ ပွမစွံအာရီုအောန်ကၠုင်ကီု၊ ဘာလီုဂၠိုင်ကီု၊ စိုတ်လုပ်စကဵု ပရေင်ပညာအောန်ကၠုင်ကီုရောင် သၞာဲဒဴ ပရေင်ပညာမွဲတၠ ဟီုရ။
“ကောန်ၚာ်ခေတ်လၟုဟ်ဏံ ထိင်ဝါတ်မံင်ရ။ လ္ၚဵုတံ စောဲလာံဂဥုဲၜူမာဲတုဲ ဂွံတိုန်ဘာဂှ် လၞုဟ်ကၠုင်နွံရ။ မိမတံ ဟွံကဵုတိတ်ဘာတုဲ ဒးတိုန်မံင်ဘာရ။ ဆဂး ဟွံစိုပ်ဘာပုဟ်၊ အေဗီုဂှ်လေဝ်နွံရ။ ဂဥုဲၜူမာဲဂှ် ဟွံညာတ်ကၠးကၠးကီုလေဝ် ကွးဘာတံ ၜိုတ် (၈၀%) ဂှ် သုင်မံင် ၜံက်ကဵု အရက်ရ” သာ်ဝွံ အ္စာၝောံဘာတန်သၠုင်မွဲတၠ ဟီုရ။
ဂိတုသေပ်တေမ်ဗာတုဲကၠုင်ဏံဝွံ ပ္ဍဲဍုင်မတ်မလီုဂှ် ရပ်ဂွံ ညးအာယုက်ဟွံပေင် (၂) တၠပါလုပ်ကီု သီုဖအိုတ် ရပ်ဂွံသၟတ်စကာဂဥုဲၜူမာဲ (၆) တၠဏီရ။
မွဲလ္ပာ်ပၠန်ဂှ်လေဝ် ယဝ်ဆဵုသၟတ်ကွးဘာ စောဲလာံဂဥုဲၜူမာဲမ္ဂး လ္ပကဵုဒုဟ်ပ္တိတ်ဘာ၊ ကလင်ပရေင်ဒုင်စသိုင်ကောန်ၚာ်တံတုဲ ကဵုသတိတုဲမှ အခေါင်ကတ်ဗ္တောန်ပညာကောန်ၚာ်တံ ညံင်ဟွံဂွံဆောံလေင်အာဂှ် ဒးဆက်ရေင်တၠုင်ထေက်ရောင် (MDPT) ဖ္တိုက်ဖၟောဝ်လဝ်ရ။