ဒၞာဲဒှ်လဝ်ပေါဲပၞာန် တွဵုရးကရေင် မဆက်စပ်တတ်ကၠောံကဵုဍုင်မန် ပ္ဍဲကွာန်ပုလိင်ဂှ် သၟူဇွမၞိဟ်အုဲပသဒၟံင် အလုံကွာန်မွဲတုဲ ညးမွဲလေဝ် ဂိုင်ဒေပ်ဟွံမွဲရောင် ညးဒေသမွဲတၠ ဟီုလဴထ္ၜးကဵုရ။
သၟူဇွမၞိဟ်အုဲပသဒၟံင် မွဲဒမြိပ်ကွာန်ပုလိင်ဂှ် သီုဇွမၞိဟ် သီုဇွကောန်ပၞာန် ချိုတ်ဒၟံင်ဂၠိုင်ကဵုဒၞာဲတုဲ ပသအုဲဒၟံင် အလုံကွာန်မွဲနွံရောင် ညးဒေသဗွိုင်ကွာန်ပုလိင် ဆဵုလဝ်နမတ်မွဲတၠဂှ် ဟီုထ္ၜးသာ်ဝွံရ။
“ဇွမၞိဟ်ချိုတ်မံင်တုဲ နူတနေံတေံတှ်ေ အုဲပသဒၟံင်ဂၠိုင်ကဵုဒၞာဲဏောင်၊ ပ္ဍဲကဵုဇွမၞိဟ်ဂှ်တှ်ေ ဇွကောန်ပၞာန်လေဝ်နွံ၊ ဇွရဲကွာန်လေဝ်နွံ ချိုတ်မံင်ပြးဇး နွံတၟာဂလိုင်ဒှ်ဏောင်၊ ဖေက်မံင်တုဲ ညးမွဲလေဝ်ဂွံဂိုင်ဒေပ်ဇွစဂှ် ဟွံမွဲပုဟ်” သ္ဂးရ။
ဇွမၞိဟ်ချိုတ်ပြးဒၟံင် ပ္ဍဲကွာန်ပုလိင်ဂှ်ကီု၊ ဗွိုင်ကွာန်စဂှ်ကီု သီုကောန်ပၞာန် သီုကောန်ကွာန် ဟွံအောန်နူ (၁၀) ဒၞာဲဒှ်ရောင်ဂှ်လေဝ် မၞိဟ်ဆဵုလဝ်နမတ်ဂှ် ဟီုရ။
လၟုဟ်မ္ဂး ဒၞာဲဒှ်လဝ်ပေါဲဗတိုက် ပ္ဍဲကွာန်ပုလိင်ဂှ် ပၞာန်ၜါလ္ပာ်ဂှ် ဆုတ်ခြာတိတ်ညးသ္ကအ်တုဲ ပေါဲပၞာန်ညိင်အာကီုလေဝ် ညးဍုင်ကွာန်တအ် ဒးဖေက်ဒၟံင်ဘဲအမၠံက်ဇၞော်ကဵု ဘဲဗမ်က္ၜင်ကျာပၞာန်ဏီဂှ်တုဲ ဟွံဂံင်ကလေင်စဴသ္ၚိအိုတ်ဏီရ။
“ပေါဲပၞာန်ဂှ်ညိင်အာယျ၊ ဆဂး မၠံက်ဇၞော်စှ်ေမံင်အကြာစဂှ် မွဲဏှေအ်မွဲဏှေအ် ဗြုမံင်အရိုဟ်တ္ၚဲ အရိုဟ်ဗတမ်မံင်ဏီ၊ က္ၜင်ကျာပၞာန်လေဝ် ဂေတ်ပဝ်မံင်လတူကွာန် အရိုဟ်ဗတမ်ဏောင်၊ ဒၞာဲဂှ်ဂှ် ကောန်ပၞာန်လ္ပာ်တေံ လ္ပာ်ဏံ ဟွံမွဲရ၊ ဆဂး ပေါဲပၞာန်ညိင်အာယျဂှ် ဖျေံစိုတ်ဟွံဂွိုအ်ဏီပုဟ်၊ လ္ပာ်ရဲပၠန်ဂတးတအ်ဂှ်တှ်ေ ချဳဒရာင်အာကၠုင်မံင်နွံမံင်၊ ပၞာန်ဗၟာတိုန်ကၠုင်ပၠန်တှ်ေ ဘိုအ်ဂွံဒှ်ပၠန်ရနွံ၊ ဒှ်ပေါဲဗတိုက်တှ်ေ မၠက်ဇၞော်ကဵု မၠံက်က္ၜင်ကျာရ ညးဍုင်ကွာန်တအ် ဖေက်မံင်” သာ်ဝွံ ညးကွာန် နူကွာန်ခၠဵု ပါဲဓလေတ်ဒၟံင်ဘဲပေါဲပၞာန်မွဲတၠ ဟီုထ္ၜးရ။
ဒၞာဲဒှ်လဝ်ပေါဲဗတိုက် ကွာန်ပုလိင်ဂှ် ဘဲမကမ်မၠံက်ဇၞော်ကီု၊ ဘဲဗမ်နူက္ၜင်ကျာကီု တၞံဆုကဝ်ပိုတ်၊ သ္ၚိလီုသရိုဟ်တူဒၟံင်ပၟတ် ဗီုကွာန်လီုလီုမွဲရောင်ဂှ်လေဝ် မၞိဟ်ဂှ် ဟီုလဴကဵုရ။
အသိင်ပေါဲဗတိုက် ပ္ဍဲကွာန်ပုလိင် အံက်တိုဝ်ဗာ (၁၃) ကဵု (၁၄) ပွိုင်ၜါတ္ၚဲဂှ်တုဲ ကွဳစက်ဂြိပ်လာင် ကျာ်ပိ – ဇြပ်ဗု၊ ကျာ်ပိ – မုဟ်ဍုင် – မတ်မလီု လ္ပာ်တိုန်ကီု လ္ပာ်စှ်ေကီု ဒးဒေါံဇူမံင် အကြာဘာ်တရဴအိုတ်ရ။