အပ္ဍဲကဵုပေဲါဗ္တိုက်ၜါလ္ပာ်၊ ကြပ်ကွာန်ပုလိင်၊ ဂကောံကွာန်တဂေါန်ဒေင်၊ ပွိုင်ဍုင်လှာဒကှ်၊ တွဵုရးကရေင်ဂှ် သၟတ်ဒေသ (၁) တၠကဵု ညးဍုင်ကွာန်အာတရဴ (၂) တၠ ဒးချိုတ်အာလဝ်ရောင် ဂွံတီကေတ် နူညးဒေသလှာဒကှ်တံရ။
ဂိတုအံက်တဝ်ဗာ (၁၂) ၊ အခိင်သဝ်တ္ၚဲ ၜိုတ် (၄) နာဍဳပြင်ဂှ် အကြာကရောင်ပၞာန်ကမ္မယှေန်ပၞာန်ကဵု ဒပ်ပံင်ကောံပၠန်ဂတး KNLA တံ က္တဵုဒှ်ပေဲါဗ္တိုက်သ္ကာတ်မြဟ် ကြပ်ကွာန်ပုလိင်ဂှ်တုဲ သီုပန်ပှော်ကဵု လွဟ်ဇၞော်၊ က္ၜင်ကျာ အဆက်ဆက်ရ။
အဃောဒှ်မံင်ပေဲါဗ္တိုက်ဂှ်ဝွံ ညးဍုင်ကွာန်မၞုံဒၟံင် ပ္ဍဲသ္ကုတ်ဂၠံင်ဂှ် (၃) တၠဂှ် ဒးကဝေက်ကမ်လွဟ်တုဲ ချိုတ်အာရဂှ် ညးဒေသ နူဂကောံကွာန်တဂေါင်ဒေင်မွဲတၠ ဟီုရ။
“ချိုတ်အာဂှ်တှ်ေ သၟတ်နူပုလိင် (၁) တၠကဵု ညးအာတရဴ (၂) တၠ။ ဇွသၟတ်ဂှ်တှ်ေ လ္တူဂၠံင်ဂှ်၊ ဇွညးအာတရဴဂှ်တှ်ေ လ္တူကာဂှ်၊ ကာ ဒေံါလဝ်ပ္ဍဲဂၠံင်၊ ကွဳလိုန်ဓာတ်တံလေဝ် ဗွဲမဂၠိုင်တှ်ေ ဒးလဝ်ကမ်လွဟ်ရ” သာ်ဝွံ ညးဒေသလ္တူဂှ် ဟီုရ။
ဟိုတ်နူအကာဲအရာ ပေဲါဗ္တိုက်ဆက်သ္ကာတ်မြဟ်ဒၟံင်ဂှ်ရ သွက်ဂွံသီဂိုင်ဇွညးချိုတ်တံဂှ် ဝါတ်ဂါတ်မံင်ရောင် ဂးရ။
ဟိုတ်နူပေဲါဗ္တိုက်တုဲ ညးဒေသအာကၠုင် ပ္ဍဲဂၠံင်ဍာန်ကဵု ညးအာတရဴလ္ၚဵုတံဂှ် ဂကောံဒပ်ကမ္မယှေန်ပၞာန်တံ ရပ်ထိင်လဝ်မွဲချိုန်ခဏ ပ္ဍဲသ္ၚိဒၟံင်မွဲဒၞာဲတုဲ ဂိတုအံက်တဝ်ဗာ စၟတ်တ္ၚဲ (၁၃) ၊ နူတနေံဏံ အခိင်သဝ်တ္ၚဲဂှ် က္လေင်ဗလးကဵုလဝ်ရောင် ဂွံတီကေတ်ရ။
သွက်ဂွံဗပေင်ဇြဟတ် ပ္ဍဲဗဒိုပ်ဒပ် (ဇီးဖြူကုန်း) ၊ ဂကောံကွာန်တဂေါန်ဒင်ဂှ်မ္ဂး စနူဂိတုအံက်တဝ်ဗာ စၟတ်တ္ၚဲ (၁၁) တုဲကၠုင်ဏံရ နကဵုကရောင်ပၞာန် (၃) ကရောင်ပၞာန် လၟိဟ်ဇြဟတ်ကဵုကၠံ နူတမ်ဒပ်အမၠံက်အၜေတ် (၃၁၈) ၊ ဖျေံသဇိုင်မုဟ်ဍုင်တံ စထ္ပက်ကၠုင်ကရောင်ပၞာန် ပ္ဍဲသ္ကုတ်ဂၠံင်အၜေတ်-ပုလိင်-တဂေါင်ဒေင်ဂှ်တုဲ ပေဲါဗ္တိုက်သ္ကာတ်မြဟ်ကၠုင်ရ။
ဂကောံဒပ်ကမ္မယှေန်ပၞာန်တံဝွံ ဆက်နွံဒၟံင် ပ္ဍဲကြပ်ကွာန်ပုလိင်ဂှ် စဵုကဵုတ္ၚဲဏံတုဲ ပရေင်ပၞာန်လေဝ် ဆက်ကြံင်မ္ၚိုဟ်ကၠုင်မာန်ဂှ်ရ ညးဒေသလၟိဟ်ကဵုကၠံ နူၜိုတ် (၅) ကွာန် မပ္တံကွာန်ပုလိင်၊ တဂေါင်ဒေင်၊ ခလေဝ်ဂှ် ဒးဂြိပ်ပဲါဒဴဒၟံင် ဒၞာဲဗၠးဘဲတေံရောင် ညးတြုံဒေသမွဲတၠပၠန်ဂှ် ဟီုရ။
“အဓိကဂှ်တှ်ေ မၞိဟ်နူပုလိင်တံ ဒးပဲါဘဲပၞာန် ဂၠိုင်ရ။ မၞိဟ်နူတဂေါင်ဒေင် ကြပ်ကွာန်ပုလိင် ဗွဲမဂၠိုင်ဂှ်လေဝ် ပဲါရ။ ကွာန်ခလေဝ်ဂှ်တှ်ေ ပဲါမံင်ညိညဓဝ်ဏီရ။ ပြဟ်ပြဟ်ဏံဂှ်တှ်ေ ပဲါဒၟံင် ပ္ဍဲဘာလကျာ် ကွာန် “နန်းသိုင်းထွန်” ဂှ်ရ” သာ်ဝွံ ညးဟီုရ။
ဟိုတ်နူပေဲါဗ္တိုက်ဝွံတုဲ ပရေင်တတ်ကၠောံအာကၠုင် ပ္ဍဲသ္ကုတ်ဂၠံင်ကွဳစက်အၜေတ်-ပုလိင်-တဂေါင်ဒေင်ဂှ် ဂကောံၜါလ္ပာ်တံ ဒၞာတာလဝ်တုဲ ညမသှ်ေမံင် ပ္ဍဲကွာန်ပုလိင်ဂှ်လေဝ် သွက်ဂွံပြံင်ဆုဲဒၞာဲဗၠးဘဲတေံဂှ် ဂကောံဒပ်ကမ္မယှေန်ပၞာန်တံ ဒၞာတာလဝ်ကီု ဂွံတီကေတ်ရ။
ဒပ်ကမ္မယှေန်ပၞာန်တံဝွံ ပွမပလံင်ဗစိုပ်ဇွောံမစၞစ ဇရေင်ဗဒိုပ်ဒပ် (ဇီးဖြူကုန်း) ပ္ဍဲဂကောံကွာန်တဂေါန်ဒေင်ဂှ်ကီု၊ သွက်ဂွံပြံင်လှာဲဒပ်ဂှ် မွဲသၞာံမွဲဝါ နူတမ်ဒပ်အၜေတ် လုပ်စိုပ်ထ္ပက်ကရောင်ပၞာန်နွံကီုလေဝ် အလန်ဏံဝွံ လုပ်စိုပ်ကၠုင် ဗီုကဵုဗပေင်ဇြဟတ်ရောင် ဂကောံဒပ်ပၠန်ဂတးတံ ဟီုရ။
ဗွဲကြဴနူဗပေင်ဇြဟတ် ဇရေင်ဗဒိုပ်ဒပ် (ဇီးဖြူကုန်း) တုဲမ္ဂး သွက်ဂွံအာစိုပ်ကဵုဂီုကၠီု ပ္ဍဲကဵုပရေင်ပလေဝ်ပလေတ်ဒဒန် ၜါသွာင်-ဒါလဳ မဆက်စၠောံလဝ် မုဟ်ဍုင်-ကျာ်မြဟ်-လှာဒကှ်-ကျာ်ပိဂှ် လ္ပာ်ဒပ်ပၞာန်တံ စဳဇန်ဒၟံင်နွံရဂှ်လေဝ် ဂွံတီကေတ်ရ။