အပ္ဍဲကဵုဂကောံကွာန် (ၚှက်ပျောတော) ၊ ပွိုင်ဍုင်ကျာ်ထဝ်၊ တွဵုရးဍုင်မန်ဂှ် ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵု စက်ဗရုသာဲဂှ်ရ ကောန်ကွာန်ညးဒေသ ချိုတ်အာ (၃) တၠတုဲ ညးဒးဘဲဝပ် ဟွံအောန်နူ (၅) တၠနွံရဂှ် ဂွံတီကေတ် နူညးဒေသတံရ။
ဂိတုအံက်တဝ်ဗာ စၟတ်တ္ၚဲ (၁၂) တုဲကၠုင်ဏံ အခိင်လ္ဒောဝ်တ္ၚဲ ၜိုတ် (၁၂) နာဍဳဂှ် နူတမ်ဒပ် (ၝောံဒပ် ၄၄) ၊ မဖျေံသဇိုင်ဍုင်ကျာ်ထဝ် ပန်ဗ္တိုက်ထောံဖျေံဗမ် လ္ပာ်ကွာန် (ဇီးကုန်း)၊ မၞုံအပ္ဍဲဂကောံကွာန် (ၚှက်ပျောတော) ဂှ်ရ။
ဟိုတ်နူဒပ်ပၞာန်တံ ပန်ဗ္တိုက်ထောံဖျေံဗမ်ကဵုစက်ဗရုသာဲတုဲ ကောန်သ္ၚိကၟိန် ကွာန် (ဇီးကုန်း) မသုန်တၠတံ ဒးအာဘဲဝပ်ကဝေက်ဗမ်နွံရ။
တုဲပၠန် အခိင်တ္ၚဲစေင်ဂှ်လေဝ် နူတမ်ဒပ် (ၝောံဒပ် ၄၄) ထပ်ပန်ဗ္တိုက်ထောံဖျေံဗမ်ကဵု စက်ဗရုသာဲ လ္ပာ်ကွာန် (ၚှက်ပျောတော) ဂှ် ၜါမပၠန်ရ။
ဟိုတ်ဂှ်ရ ညးဗြဴ (၁) တၠကဵု ညးတြုံ (၂) တၠ မကၠုင်စိုပ်ကၠောန်မံင်ကမၠောန် ပ္ဍဲကွာန် (ၚှက်ပျောတော) ဂှ် ချိုတ်အာတုဲ ညးတြုံတၞဟ်မွဲတၠပၠန်ဂှ်လေဝ် ဒးအာဘဲဝပ်ကီုရ။
“နူၝောံဒပ် (၄၄) ဂှ် ပန်မံင်လွဟ်ဇၞော်၊ စက်ဗရုသာဲ လ္ပာ်ကွာန်တေံ အဆက်ဆက်ရ။ ဗီုကဵုဒှ်မံင်ပေဲါဗ္တိုက်လေဝ် ဟွံမွဲပုဟ်။ သက်သက်ဂှ် ပန်မံင်ရ။ လွဟ်ဇၞော်တံ၊ ဗမ်တံ ဒတုံခတိုဟ်တှ်ေ သ္ၚိတံ လီုလာ်ရ။ မၞိဟ်တံလေဝ် ဒးရ” သာ်ဝွံ ညးဒေသကျာ်ထဝ်မွဲတၠ ဟီုရ။
ဟိုတ်နူဒပ်ပၞာန်တံ ပန်ဗ္တိုက်ထောံဖျေံဗမ်ကဵု စက်ဗရုသာဲဂှ်ရ သ္ၚိဒၟံင်လီုလာ်အာနွံတုဲ ညးဒေသတံလေဝ် ဒးဂြိပ်ပဲါဒဴအာ ဒၞာဲဗၠးဘဲတေံရ။
ဂိတုအံက်တဝ်ဗာ စၟတ်တ္ၚဲ (၂) တုဲကၠုင်ဏံဂှ်လေဝ် နူကဵုဌာန်ဂအုပ် ၝောံဒပ် (၄၄) ပန်ကဵုလွဟ်ဇၞော် (၁၂၀ မမ) တုဲ ကောန်ၚာ်အာယုက် (၃) သၞာံ နူကွာန် (ဇီးကုန်း) မွဲတၠဂှ် ဒးချိုတ်အာလဝ်ဏီရ။
ဒပ်ပၞာန်တံဝွံ ဇၟာပ်တ္ၚဲ ပန်ပှော်မံင်ကဵု လွဟ်ဇၞော်၊ စက်ဗရုဲသာဲ လ္ပာ်ကွာန် မၞုံအပ္ဍဲပွိုင်ဍုင်ကျာ်ထဝ်ဂမၠိုင်ဂှ် အဆက်ဆက်တုဲ ကောန်ကွာန်တံ ဒးဘဲဇီုကပိုက်ချိုတ်ဂျိုင် ဂၠိုင်ကၠုင်ရဂှ်လေဝ် ညးဒေသတံ ဟီုရ။
တုဲပၠန် ဟိုတ်နူဒပ်ပၞာန်ပန်ဗ္တိုက်တုဲ သၟာင်နူသ္ၚိဒၟံင်၊ ကပေါတ်ပိုင်ပြဳဂမၠိုင်၊ ဗွိုင်ကမၠောန်ဂမၠိုင် လီုလာ်အာဂှ်မ္ဂး ညးဒေသလၟိဟ်ကဵုလ္ၚီတံလေဝ် ဒးဂြိပ်ပဲါဒဴအာ ဒၞာဲဗၠးဘဲတေံရ။
ဒပ်ပၞာန်တံဝွံ စွံပွန်ကဵု ကောန်ညးဍုင်ကွာန်တံတုဲ သၟာင်နူပန်ဗ္တိုက်ကဵုက္ၜင်ကျာဂှ်မ္ဂး သီုပန်ပှော်မံင်ကဵုလွဟ်ဇၞော်ဂှ်ရ ကောန်ကွာန်ဒးဘဲဇီုကပိုက်ချိုတ်ဂျိုင်၊ သ္ၚိဒၟံင် ကေုာံ ကပေါတ်ဒြပ်ကသပ်ဂမၠိုင် ဒးဆောံလေင်လီုလာ်အာနွံရဂှ်လေဝ် ကေအေန်ယူ လလောင်ပ္တိတ်လဝ်ရ။