ပ္ဍဲပွိုင်ဍုင်ပံင်၊ တွဵုရးဍုင်မန်ဝွံ အခိင်ကြပ်ရတ်သြောံဏံ သြောံဂမၠိုင်ဒးစၟဂှ်ရ လၟိဟ်သြောံကဵုကၠံဨက သၟာဗ္ၚဒေသ (၂၀၀) ပြင်တံဂှ် လီုလာ်ဆောံလေင်တုဲ သွက်ဂွံစဵုဒၞာ နကဵုဂဥုဲဂစိုတ်စၟဂှ် ဝါတ်ဂါတ်မံင်ရောင် ဂွံတီကေတ် နူသၟာဗ္ၚအပ္ဍဲဒေသတံရ။
ပ္ဍဲကွာန်ဇိုင်ကျာ်ကဵု ကုန်ပ္ကဴ(ပန်းကုန်း) ဂှ် ဒးစၟဂၠိုင်တုဲ ဒှ်မံင်အခိင်ကြပ်ရတ်သြောံဂှ်ရ ဒးဗ္တိုက်သရိုဟ်ဒၟံင် နကဵုဂဥုဲဂစိုတ်စၟ ဗွဲမစှ်ေသၞောတ်ရဂှ်လေဝ် သၟာဗ္ၚမွဲတၠဂှ် ဟီုရ။
“ညးတဵုလဝ် (၂၀) ဨကဂှ်တှ်ေ ၜိုတ် (၅) ဨက၊ (၈) ဨက အိုတ်အာရ။ နူကဵုပရေင်တဵုလွဳဂှ်တှ်ေ စၟ(ဆစ်ပိုး) ဂးရ။ နူကဵုသၟဝ်တၞံဂှ် စၟဗစံက်တံ လုပ်အာရ။ သွက်ဂွံရတ်သြောံဂှ် သှေ် (၁၅) တ္ၚဲဓဝ်ရ။ သြောံတံလေဝ် ဗု(ဖြူ)အိုတ်ရ။ ကွာန်တၞဟ်လေဝ် ဒှ်ရ” သာ်ဝွံ ညးဟီုရ။
ပ္ဍဲကဵုဝါဗ္ၚ မနှဴရဴတဵုလဝ် သြောံကသီု၊ သြောံက္ညင် ကေုာံ သၞေဝ်ကေဝ်ဂမၠိုင်ဂှ် ဒးစၟဂၠိုင်တုဲ မွဲသၞာံကဵုမွဲသၞာံ ညးကၠောန်ဝါဗ္ၚ အောန်စှ်ေကၠုင်ဂှ်ရ ပရေင်ဗ္တိုက်သရိုဟ်စၟဍိုန်လျတုဲ ပရေင်လီုလာ်ဆောံလေင်ဂၠိုင်ရောင် ဂးရ။
“သၞာံတုဲတေံလေဝ် ဒှ်ရ၊ ဆဂး ဒၞာဲဟွံတုပ်ပုဟ်၊ အဓိကဂှ်တှ်ေ ဒၞာဲတဵု (သီးစား) တဵုၜဲတံ သြောံကသီု၊ သြောံက္ညင်တံ ဒှ်ဂၠိုင်ရ။ စၟလေဝ်ဏး၊ ဆဠတှ်ေ ဒးစၟ(ဖြုတ်ပိုး)၊ လၟုဟ် ဒးစၟ(ဆစ်ပိုး)ရ” သာ်ဝွံ ညးဟီုရ။
ဟိုတ်နူဥတုရာသဳ ကတဴကတာန်ဂၠိုင်ဂှ်ရ လၟိဟ်စၟခြအ်(ဖလံသား)က္ဍတ် သၠုင်တိုန်ကၠုင်တုဲ ခံက်ဝါဗ္ၚဂမၠိုင် ဒးစၟရောင် ညးစိုန်သကီု ပရေင်တဵုလွဳတံ ထံက်ထ္ၜးရ။
စၟ(ဆစ်ပိုး)ဂမၠိုင်ဝွံ လုပ်ပလီုပလာ် ကိတ်ထပိုတ်တၞံသြောံတုဲ ယဝ်ရ ဒးအခိင်တၞံဍောတ်ဍောတ်မ္ဂး “အလယ်ခေါင်ညွန့်” ချိုတ်အာလေပ်ရ။ တုဲပၠန် ယဝ်ရ ဒးအခိင်ဂၞဴသြောံ(စပါးနှံ) တိတ်မ္ဂး သကဵုဒှ်အာ သြောံသ္ပအ် (သ္ပအ်သြောံ) ရ။
သၞာံဏံဂှ် ဟိုတ်နူဥတုရာသဳပြံင်သၠာဲ၊ ဒးစၟ ကေုာံ ညးတဵုလွဳသြောံအောန်ဂှ်ရ သြောံအပ္ဍဲဒေသ တိတ်အောန်စှ်ေမာန်ရောင် သၟာဗ္ၚတံ တော်ခယျလဝ်ရ။
အခိင်ကာလကြပ်ရတ်သြောံလၟုဟ်ဏံဝွံ သၟာဗ္ၚမၞုံယၟု (ပုံစံ ရ) ဂမၠိုင်တံ သွက်စက်ဂစတ်ဂဥုဲဂစိုတ်စၟဂှ် ဒးဆဵုဂဗမံင်ပြဒ္ဒညာ အတိုင်လၟိဟ်ပမာဏ မၞုံပၟိက်ကၠေင် (လောင်စာဆီ) ဂှ် ရာန်ကေတ်ဟွံဂွံရောင် ဂွံတီကေတ်ရ။