အသိင်တၠအဝဵုပၞာန်တအ် ဂရတ်ပတေင်ရပ်တိုန်ညးဍုင်ကွာန်တအ် ကိစ္စသ္ပပၞာန်ဂှ်တုဲ သၟာကမၠောန်ဆုဲပြံင်တအ် ထပ်လိုအ်စှ်ေကၠုင်ဍုင်မန် နွံဂၠိုင်ကွေံကွေံရောင် လစှ်ေမာန်နေဂျာ ရုင်စက်ဆု (ရော်ဘာဝုဒ်) နူမုဟ်ဍုင်မွဲတၠ ဟီုရ။
“ပ္ဍဲရုင်စက်ဆု (ရော်ဘာဝုဒ်) တအ်ကီု ရုင်ကမၠောန်တအ်ကီု ဇၟာပ်ပွိုင်ဍုင်ဂှ် သၟာကမၠောန်ဆုဲပြံင် နူလ္ပာ်လတူတေံ ဍိုက်လိုအ်စှ်ေကၠုင် ဒေသဍုင်မန်ဏံ ဂၠိုင်ကွေံကွေံ၊ မုဒှ်ရောတှ်ေ ဒေသညးတအ် (ဒေသလ္ပာ်လတူတေံ) တေံဂှ် ဍေံ (တၠအဝဵုပၞာန်) တအ် ဂရတ်ရပ်ပတေင်တိုန်ညးဍုင်ကွာန်တအ်ကွေံကွေံ၊ ဒေသညးတအ်အတေံဂှ် ဍေံတိုန်ရပ်ကေတ်လတူသ္ၚိဏောင်၊ တေင်ကွေံကွေံ၊ ဇှ်ရ လ္ပာ်ဍုင်မန်ဏံဂှ် မံင်ၜိုဟ်မံင်ဂးတှ်ေ အဆက်ညး အဆက်ညးဂှ် ကေတ်အဆက်တုဲတှ်ေ ထပ်လိုအ်စှ်ေမံင် သ္ဇက်ဟီုဟွံမွဲရ” သာ်ဝွံ လစှ်ေမာန်နေဂျာ ရုင်စက်ဆုဂှ် ဟီုထ္ၜးရ။
သ္ပဟိုတ်နူကဵု သၟာကမၠောန်ဆုဲပြံင် ဒေသလ္ပာ်လတူတေံ ဍိုက်လိုအ်စှ်ေကၠုင်ဂၠိုင်ဂှ်တုဲ ပ္ဍဲအကြာသၞေဟ်ကင် လုပ်ဍုင်၊ တိတ်ဍုင်ဂမၠိုင်ဂှ် စၟဳစၟတ်ကာဒ်ကောန်ဍုင်တေင်တိုန်ကီု၊ ထ္ၜးဟိုတ်မွဲမွဲသာ်တုဲ ရပ်စပ်ညးဍုင်ကွာန်တအ် တေင်ဂၠိုင်တိုန်မံင်နွံရ။
ပ္ဍဲဒေသဍုင်မန် အကြာအရာပ်၊ ကွာန်၊ ဍုင်ဗွဲမဂၠိုင်တအ်ဂှ် ဟိုတ်နူမၞိဟ်တၠိင်မုက် ဍိုက်လိုအ်စှ်ေကၠုင် ပ္ဍဲဍုင်မန်ဂၠိုင်လောန်ဂှ်တုဲ ပရေင်ပၠံင်ၜးကပေါတ်ဒြပ်ရတ်ညးဍုင်ကွာန်တအ်ကီု၊ ကမၠတ်ဒမၠတအ်ကီု ကတဵုဒှ်ဂၠိုင်ကၠုင်ဒၟံင်ကီုရ။
“နူတမ်ဝါဒိဂှ် သၟာကမၠောန်ဆုဲပြံင် ဗၟာအညာတအ် ပိုဲဟီု ဂၠိုင်မံင်ဇၟာပ်ကွာန် ဇၟာပ်ဍုင်ရရဂှ် လၟုဟ်ပၠန် အသိင်ကိစ္စ ဍေံရပ်သ္ပပၞာန်ဏံပၠန်ဂှ် ဂကူဗၟာတအ် ထပ်ဍိုက်စှ်ေကၠုင် ဟွံအောန်လးလးပၠန်ဏံဂှ်တှ်ေ အကြာဂှ် ကမၠတ်လေဝ်ပါ၊ ဒမၠလေဝ်ပါ၊ ရဲပၠံင်ၜး ခါဲဒုတ်လေဝ်ပါကၠုင် သ္ဇက်ဟီုဟွံမွဲရ၊ အကြာကွာန် / အကြာအရာပ်တအ် မၞိဟ်ထုဲနှဴလုပ်ကၠုင် ဂၠိုင်ကွေံကွေံ၊ ဇှ်တှ်ေ ဒးသ္ပသတိကဵု ကမၠတ်ဒမၠတအ် ပဵုနူတုဲတုဲတေံဏီရ” သာ်ဝွံ သကိုပ်အုပ်ဓုပ်ကွာန် ဍုင်မန် သကုတ်သၠုင်ကျာမွဲတၠ ဟီုရ။
သၟာကမၠောန်ဆုဲပြံင် နူဒေသလ္ပာ်လတူတေံ စှ်ေစိုပ်ကၠုင်ဒေသဍုင်မန်ဂှ် နကဵု တၠအဝဵုအလဵုအသဳဒေသတအ် ၜိုန်ရကရေပ်ဂရတ်လဝ် စပ်ကဵုပရေင်တေင်ကၟုဲနွံကီုလေဝ် ပရေင်ထပက်စလာဘ်ဗဇဴဂှ် ဆက်နွံမံင်အတိုင်တြေံတေံဂှ်ရ ညး ဍုင်ကွာန်နူဒေသတၞဟ်တၞဟ်တအ် လုပ်ဖျေံသဇိုင်ပ္ဍဲဍုင်မန်၊ ပ္ဍဲကွာန်မန်တအ်လေဝ် ပရေင်ထပက်စဩန် ကဵုလာဘ်ဗဇဴနွံဂှ်တုဲ အတိုင်ပၟိက်စိုတ် ဒၟံင်တန်တဴဂွံမံင်ရ။
သ္ပဟိုတ်ကဵု သၟာကမၠောန်ဆုဲပြံင် ညးဍုင်ကွာန်ဒေသတၞဟ်တၞဟ်တအ် ထပ်ဍိုက်လိုအ်စှ်ေကၠုင် ဒေသဍုင်မန်ဂၠိုင်ကွေံကွေံဂှ်တုဲ ပရေင်ကမၠတ် ကွဳလိုန်ဓာတ်ကီု၊ ပရေင်ပၠံင်ၜးဒြပ်ရတ်ညးဍုင်ကွာန်တအ်ကီု ကတဵုဒှ်ဒၟံင် ဟွံပိုတ်နွံရောင် ဂွံတီကေတ်ရ။