ဗညာတၞိင် (လညာတ်ပါ်ပါဲ)
ဒိတ္ထဳ သေတ်တေန်ပါ (၂၆-၂၇၊ ၂၀၂၆) ဂှ် ပ္ဍဲရးကရေၚ်၊ ပွိုၚ်ဍုၚ်ဘာအၚ်၊ ဗ္ဒမ်ၝောံခန် (ဇွဲကပင်) ဂှ် ဂကောံအလဵုအသဳတွဵုရးကရေၚ် ပၠတရဴတုဲ ကၠောန်ဗဒှ်ကၠုၚ်လဝ် ပေါဲကောံဆဵုဂဗတက်ကျာ ပရေၚ်ၜိုဟ်လလံမွဲ နကဵုယၟု (ကရင်ပြည်နယ် ငြိမ်းချမ်းရေးနှင့် ဖွံ့ဖြိုးတိုးတက်ရေး ဖိုရမ် ၂၀၂၆ ခုနှစ်) ရ။ ပေါဲဂှ် ဂကောံရပ်လွဟ်ကရေၚ်လ္ၚဵုတအ် ပါလုပ်တိုန်စိုပ်လဝ်ကီုရ။ ဗွဲတၟေၚ် ရဲဂကောံမလုက်စုက်ကဵု အလဵုသဳတၠအဝဵုပၞာန်ဂမၠိုၚ် ဥက္ကဋ္ဌကေအေန်ယူတြေံ မူတူသေဖဝ်၊ နူဂကောံကေန်အေယူ (ပဳဇြဳ) ဂှ် ဒု-ဥက္ကဋ္ဌ နဝ်ကပဝ်ထူ၊ သၟိၚ်ဗညာဇၞော် သဝ်ကျဝ်ညောအ်၊ နူဂကောံဒဳကေဗဳအေဂှ် သ္ကိုပ်ပၞာန်ဇၞော် သဝ်ယှိုဲဝတအ် တိုန်စိုပ်လဝ်ရောၚ် ဂွံဆဵုကေတ်ရ။
လ္ပာ်ညးတာလျိုၚ်အလဵုအသဳတအ်ဂှ် ပါဲနူဂကောံဝန်ဇၞော်ရးကရေၚ် ကေုာံ ဂကောံအလဵုအသဳရးကရေၚ် ဂမၠိုၚ်တုဲ ဥူအံၚ်မေန် မဒှ်ညးကဵုကသပ်ဂၞန် ကုကမ္မတဳဗမံက်ရုပ်ရဴ ပရေၚ်ၜိုဟ်လလံ (NSPNC) ကေုာံ ပဒဝ်မာန်ညိၚ်မံၚ် မဒှ်ကောန်ဂကောံ ကံၚ်ဇြဳချပ်ဂၞန်ကၟိန်ဍုၚ် အလဵုအသဳပၞာန်တအ်လေဝ် တိုန်စိုပ်ဂှ် ဂွံဆဵုကေတ်ရ။ စပ်ကဵုပေါဲတွံဓရ်အေန်ဇြဳအေဏအ်တုဲ လ္ပာ်ရဲရပ်လွဟ် ညးမတိုန်စိုပ်တအ်ကီု၊ လ္ပာ်ညးစၞး အလဵုအသဳတၠအဝဵုပၞာန်တအ်ကီု ဗီုညး ညးဟီုတဴအိုတ်ရ။ ကြက်ဂလာန်အဓိက ညးတအ်မဟီုတွံဂှ် ဒှ်မံၚ် မူဝါဒ တၠအဝဵုပၞာန်တအ်ရောၚ် ဂွံဆဵုကေတ်ရ။ ဒးဟီုဍန်ဍန်မ္ဂး ညးတအ်ဟီုတွံမံၚ်- ဟိုတ်နူပေါဲပၞာန်တုဲ ညးဍုၚ်ကွာန်တအ် ဒှ်ဒဒိုက်အိုတ်ရ။ ဆဂး ညးဂှ်ကဵုမံၚ်ဒဒိုက်ကဵုညးဍုၚ်ကွာန်တအ်ရော၊ ဟိုတ်တမ်မူလ မုဟိုတ်ပေါဲပၞာန် ဂွံဒှ်မံၚ်ရောဂှ် ဟွံဟီုတွံတဴအိုတ်ရ။
ပေါဲဓဝ်အေန်ဇြဳအေ မာန်ညိၚ်မံၚ်၊ ဥူအံၚ်မေန် မၞိဟ်တြေံ MPC လက်ထက်ဥူတိန်သိန်တအ် ပံၚ်ကဵု အနော်မူတူ (ဥက္ကဌ ကေအေန်ယူတြေံ) တအ်တုဲ စှ်ေဟီုတွံဒၟံၚ် လ္ပာ်ရးကရေၚ်ဏအ်ဂှ် ဓရ်ပတေဟ် ဥူအံၚ်မေန်ဂှ် လ္ပာ်သၠုၚ်ကျာဏအ် စန်ဒက်ဂွံအာ ကေအေန်ယူမဂး ရမျာၚ်လွဟ်သ္ၚိတ်ဇြအာမာန်ရ။ ဟိုတ်ဂှ်ရ ဒးစန်ဒက်ကေတ် ကေအေန်ယူကၠာ စဵုကဵုဂွံဏောၚ်။ ပေါဲဟီုတွံ အေန်ဇြဳအေ ဆက်အာယုက် တၠအဝဵုပၞာန်ဏအ် ကၠောန်သ္ပပ္ဍဲရးကရေၚ်တုဲမ္ဂး ဆက်ကၠောန်အာ ပ္ဍဲရးမန် ကေုာံ ရးတၞဟ်တၞဟ်သေံဇၞော် တအ်လေဝ် ဒှ်မာန်ရ။
မွဲလ္ပာ်ပၠန်ဂှ် ကောန်ဂကောံဂိုဏ်ဥူတိန်သိန်တြေံတြေံတအ် မပ္တံဥူညဵုအံၚ်မျေအ်၊ အံၚ်နာၚ်ဥူ၊ ဒံက်တာ မေန်ဇြဝ်ဥူတအ်လေဝ် ကလေၚ်သွံမံၚ်ဖျာ လးသ္ကဝ် ဓဝ်အေန်ဇြဳအေ ကၠေတ်ကၠုၚ်မံၚ်လေဝ် ဂွံဆဵုကေတ်ရ။ အခိၚ်ဒပ်ပၞာန်မေန်အံၚ်လှာၚ် ကြေပ်ဂြက်မံၚ်ဏအ် ရဲတအ်ဏအ် ကလေၚ်မံက်တိတ်ကၠုၚ်ပၠန်ဂှ် ဗွဲစၟတ်ဨကန္တ ဍေံဟွံယဵုလ္တူတပ်တး ဟီုမာန်ရ။ တဲဍိုန်အိုတ် မၞိဟ်တအ်ဏအ်ကဵု တၠအဝဵုပၞာန် မေန်အံၚ်လှာၚ် တအ်ဂှ် ဒှ်မံၚ်မွဲဇုက် မွဲကလော်ဟေၚ်ရ။
လိက်ကသုက်အေန်ဇြဳအေဂှ် ညးမွဲလေဝ် ပလီုဟွံဂွံ ရဴသာ်ဝွံ ဥူအံၚ်မေန် ကြဵုဇာလဝ်ရ။ ဆဂး လိက်ကသုက်ပေန်လုၚ်ဂှ် ရဲပၞာန်ဗၟာ တၠအဝဵု ဗိုလ်နေဝေန်တအ် ပလီုကၠုၚ်တုဲရ။ လိက်ကသုက်ဗီုဏအ်ဂှ် ကၠာတေံ ပ္ဍဲဝၚ်ဂကူကောန်ဍုၚ်အရၚ်တမ်မူလအမေရိကာန်ကဵု အလဵုအသဳအမေရိကာန် ချုက်ကၠုၚ်လဝ် နွံလၟိဟ် ၜိုတ် (၅၀၀) ဟွံက သ္ပဒတန်ပ္ဍဲစၠတ်ထဝ်တုဲ နွံ (၄၇၀) ဂကူ၊ အခိၚ်လၟုဟ် လိက်ကသုက်တအ်ဂှ် နကဵုသၞောဝ် နွံမံၚ်အတိုၚ်ဂှ်ကီုလေဝ် ကိစ္စဗမံက်ရုပ်ရဴ ဍိုန်လျတဴ ဗွဲမလောန်၊ ဍေံတန်တဴကဵု လစွံစိုတ် အလဵုအသဳရ။ ဂကူကောန်ဍုၚ်အရၚ်တမ်မူလတအ်ဂှ် ဂကူညးတအ်လ္ၚဵု ကၠေံကၠက်အိုတ်၊ လ္ၚဵုကြပ်ကၠက် သှ်ေၜက်ဟွံပေၚ်စှ်အိန်ထံၚ်၊ လ္ၚဵုသှ်ေမံၚ် နွံဟွံဂၠိုၚ်၊ ဂွံဂျိုၚ်လမျီုဂှ် အလဵုအသဳအမေရိကာန် ဒးကဵုလဝ်ဒၞာဲ ဒးဗ္စလဝ် ဂွိၚ်ဖေက်မကၠက်အာရ။ လိက်ကသုက်သှ်ေမံၚ်ကွေံကီုလေဝ် ရဲထပက်လဝ်လိက်ကသုက်တအ်ဂှ် ချိုတ်အာ၊ ဂကူဂှ် ကြပ်ကၠက်အာအိုတ်မံၚ်ရတုဲ လိက်ကသုက်တအ်ဂှ် မုပစဂွံမံၚ်ဏီရော။ သွက်ညးတအ် သွပ်လ္ပံ ဒးဒုၚ်ဍဵုဍိုက်မဂး ဂွံကလေၚ်ဗ္တိုက်ကဵုအလဵုအသဳဂှ် လ္ပဟီုရ။ ဂွံဂျိုၚ်တဴလမျီုဂှ် သီုဒးလ္ၚောဝ်မံၚ် အလဵုအသဳဏီရ။
ဟိုတ်ဂှ်ရ လဟီုအကြီုဝန်ဇၞော်ကွဳပၟတ်တြေံ (မီးရထားဝန်ကြီးဟောင်း) ဥူအံၚ်မေန် အေန်ဇြဳအေ ညးမွဲပလီု ဟွံဂွံဂှ် ဟီုအကြာဂြိုပ် အကြာဝါ အကြာရဲမုဟ်ဂၠဴ ခၟဴဂစေံ ရဲဟွံတီ ဟွံကၠိုဟ် ပရေၚ်ဍုၚ်ကွာန်မွဲသာ်တအ်ရ ဂွံ။ ရဲတအ်ဂှ် ပ္တေဟ်တေဟ် ပ္တေဟ်အာရ။ သွက်ရဲညးမအာဂတပၠတရဴဂကူ မကၠိုဟ်ခၠၚ်တအ်ဂှ် ဒှ်အရေဝ်ပြအ်သဍိုဟ်ဟေၚ် ဂပ်ဝ်စၟတ်ရ။
လိက်ကသုက်ဂှ် ပလီုဂွံ၊ ပလီုဟွံဂွံဂှ် အဓိကဟွံသေၚ်၊ အဓိကဍေံဂှ် အတိုၚ်လိက်ကသုက်ဂှ် ဗမံက်ရုပ်ရဴဟွံမာန်မဂး လမျီုဍေံဟွံလုပ်၊ လိက်ကသုက်ဂှ် ချုက်လဝ်တုဲ ချိုတ်အာမဂး တုပ်သၟဟ်ကဵု ဍေံလီုမံၚ်တုဲတုဲကီုရ။ မွဲသာ်ပၠန်ဂှ် လိက်ကသုက်ဟီုဂှ် စပ်ကဵုပၞာန်မဂး တန်တဴကဵုဇြဟတ်ရ။ ဇြဟတ်ပၞာန်ဇကုဟွံမဲမ္ဂး လိက်ကသုက်ပၞာန်ဂှ် ဒှ်အာဆအယာံမာတ် စက္ခော ဇိုတ်အိက်ဓဝ်ရ။
ဥပမာ-ပေါဲပၞာန်ရုယှာကဵု ယူခရိန် ဒှ်မံၚ်လၟုဟ်ဏအ်ဂှ် နူကဵုယူခရိန် ရုပ်သီထောံလွဟ်လက်ကၠိုက် နျူကလဳယျာ ဣပ်ထောံကဵု ရုယှာတေံ ချုက်လဝ်လိက်ကသုက်နွံမံၚ်ကီုရ။ ရုယှာ လုပ်ဗ္တိုက်ၜက်ၜေတ် ယူခရိန်ဟွံဂွံ၊ အမေရိကာန်၊ အၚ်္ဂလိက်တအ် ဒးကေတ်တာလျိုၚ်ဒှ်တမ်၊ ဆဂး အခိၚ်လၟုဟ် ပုတေန် ဗ္တိုက်မံၚ်ယူခရိန် ပန်သၞာံပြၚ်အာဣရ။
လိက်ကသုက်အေန်ဇြဳအေဗၟာဏအ် ပရေံအိုတ်ဂှ် ရန်တၟံဍေံတအ် ကၞောတ်အထောတ်ဖအိုတ်ကၠေံ ပၠန်ဂတးရပ်လွဟ်တုဲ စကာနဲနာနာသာ် ၚိတ်ကမၠက်ကၠေံ ဂကူကောန်ဍုၚ်အရၚ်ဖအိုတ် ညံၚ်ဂွံဒှ် “မျာန်မာ” ရ။ အကြာဏအ် ဆလအ်ဂွံစိုပ်တိုၚ်ကဴဍေံတအ်ဂှ် စကာလိက်ကသုက်အေန်ဇြဳအေတုဲ ဒၞာဲပရဲဍေံတအ်နွံဂှ် ဍေံဟီုတွံဏောၚ်၊ ဍေံဗမံက်ရုပ်ရဴဏောၚ်၊ ပရဲဍေံတအ်ဟွံမဲမ္ဂး ဍေံတအ် ကၟာတ်လဒဵုစဵုဒၞာဏောၚ်၊ ဟီုဍန်ဍန်တေဟ် ပတိတ်ပရဲကဵုလိက်ကသုက်အေန်ဇြဳအေရ။ ဥပမာ- ကၠာတေံ ဒပ်သေံဇၞော် အာဇြဳအေသ်အေသ် တအ် ထပက်အေန်ဇြဳအေတုဲ စှ်ေပရေၚ်စန်ဒက်လုက်စုက်ကဵုညးဍုၚ်ကွာန်တအ်ဂှ် ဍေံတအ်ဟွံကဵုအခေါၚ် ကၟာတ်လဒဵုကၠုၚ်နွံရ။
ဟီုပရူအေန်ဇြဳအေတေဟ် မွဲလ္ပာ်ပၠန် ပရူဂကောံဟွံသေၚ်ကဵု အေန်ဇြဳအေတအ်လေဝ် ဒးရံၚ်ကီုရ။ ဂကောံညးတအ်ဂှ် FPNCC ရ။ နူကဵုပေါဲပြေၚ်ဇက်ပၞာန် (၁၀၂၇) ဂှ် ဂကောံ Non NCA တအ် သီဂွံအာတိဍာ်တၟာဂလိုၚ်၊ အဓိကဍေံ ကဝ်က၊ ပလံၚ်၊ ကချေၚ်၊ ဝ တအ် ပါ်ပရအ် ဂွံအာတိဍာ်သေံဇၞော်သ္ကုတ်သၟဝ်ကျာကြပ်အိုတ် ဟီုဂွံရ။ ပေါဲပၞာန် ညိၚ်ဝတ်အာတုဲ ခြာဟွံလအ်တုဲကၠုၚ်ဂှ် ရဲဂကောံတအ်ဂှ်လ္ၚဵု အာခဍံက်စမ်ရံၚ်တြၚ်ၜိုဟ်လလံ၊ တြၚ်ပရေၚ်ဍုၚ်ကွာန် မေန်အံၚ်လှာၚ်တအ် ပ္ဍဲနေပျဳဒဝ်တေံရ။ ရံၚ်ကေတ်သွဟ် ညးတအ် ဂွံနၚ်လဝ်တအ်ဂှ်မ္ဂး အကာဲအရာဟွံခိုဟ်ကွေံကွေံ၊ ပေါဲပြုပြေၚ်ဇက်ပၞာန် ကလေၚ်ဒှ်မွဲဟလးပၠန်လေဝ် ဒှ်မာန်ရ။
ကလေၚ်ရံၚ်မ္ဂး- လ္ပာ်သၠုၚ်ကျာဏအ် အလဵုအသဳပၞာန်ဗၟာတအ် ထပက်ပၞာန်ပရေၚ်ဍုၚ်ကွာန် အေန်ဇြဳအေမ္ဂး လ္ပာ်သၟဝ်ကျာတေံ ရဲ Non NCA တအ် ဒးပလေဝ်ပလေတ်စ ဗ္တိုက်ပၞာန်ရ။ ဗျူဟာရဲအလဵုအသဳပၞာန်ဗၟာတအ်ဂှ် ဒေါံပၞာန်လ္ပာ်ဏအ် ဍိုက်ဗ္တိုက်လ္ပာ်တေံ၊ ဍိုက်ဗ္တိုက်လ္ပာ်ဏအ် ဒေါံလ္ပာ်တေံရ။
အခိၚ်လၟုဟ် ဍေံတအ် ဒေါံလဝ်လ္ပာ်သၟဝ်ကျာ၊ ဗက်လဒီုဒၟံၚ် လ္ပာ်သၠုၚ်ကျာတုဲ ဍိုက်ဗ္တိုက်မံၚ် လ္ပာ်ပလိုတ် ရခေၚ်၊ ချေၚ်၊ ရးဒေသလဒေါဝ် လ္ပာ်အညာတအ်ရ။ ရဲဍိုပ်ဥူအံၚ်မေန်၊ မာန်ညိၚ်မံၚ်တအ် ဗက်တွံမံၚ်ဓဝ်အေန်ဇြဳအေလၟုဟ်ဏအ်ဂှ် ရန်တၟံလဒီုပၞာန်လ္ပာ်သၠုၚ်ကျာဏအ်တုဲ အာဍိုက်ဗ္တိုက်ကေတ်ဇၞးအေအေ ရခေၚ် ဒှ်မာန်ရ။ ပ္ဍဲဒိတ္ထဳ ဂိတုသေပ်တေန်ပါ ၂၈ ဂှ် နူဒပ်ပၞာန်စကမတအ် အာဂြာတ်ထောံဖျေံမဟတိုဟ် လျိုၚ် (၅၀၀) ပံၚ် ပ္ဍဲဖျာဇၞော်အိန္ဒိယျ ဍုၚ်ကျံက်တဝ် ရးရခေၚ်တုဲ မၞိဟ်ဒးချိုတ်အာၜိုတ် (၅၀) တၠ၊ ဒးအာဝပ် လၟိုဟ်ၜိုတ်(၅၇) တၠ ဂးလဝ်ရ။ ဗီုဂကောံတၠအဝဵုပၞာန်တအ် ပဆုဲမံၚ်သ္ၚိကၠဂှ် ရဲဂကောံမဟာမိတ်သၟဝ်ကျာတအ် ကြတ်ဒးမံၚ်ကီုတုဲ ရခေၚ်ကျအာဟွံဂွံဟေၚ်၊ ပရေၚ်ပြုပြေၚ်ပၞာန်မွဲနဲမွဲဗီု ညးတအ် ဒးကၠောန်ပၠန်ဏောၚ် ညာတ်ကေတ်ရ။
ဂကောံ Non NCA တအ်လ္ၚဵုအာလဝ်နေပျဳဒဝ်တုဲကၠုၚ်ဂှ် မုဂွံနၚ်သွဟ်ရော။
- ၁။ UWSA (ဝ) အာတ်တွဵုရးလေဝ် ဍေံတအ်ဟီု ပတိုန်ထ္ၜးပ္ဍဲစၠတ်ထဝ် အတိုၚ်သၞောဝ် ၂၀၀၈။
- ၂။ တအာၚ်ပလံၚ် အာတ်တွဵုရးလေဝ် ဍေံဟီုအတိုၚ်သၞောဝ် ၂၀၀၈ ဂှ်ပၠန်ရ။
- ၃။ ဒပ်သေံဇၞော် SSPP အာတက်ကျာဂှ် ဍေံတအ်ဟီု ညံၚ်ဂွံဆက်ထိၚ်ဒဝ် ဒေါံပန်ပှ်ောကီု၊ ဂွံကၠောန် အာပရေၚ်ဖောအ်ဗြေဝ်ကီုနွံကၠုၚ်ရ။ နကဵုပရေၚ်ဍုၚ်ကွာန်ဂှ် ဟွံမဲကွေံကွေံ။
- ၄။လက်ကရဴအိုတ် ကဝ်က အာတ်ပကဵုစၟတ်သမ္တီ ဒေသတၟေၚ် ဂၞန် (၁) ဂှ်လေဝ် ဍေံတအ်ဟီု ပံက်ဗော်ပရေၚ်ဍုၚ်ကွာန်၊ဒုၚ်ရုဲမာဲ၊ပတိုန်ထ္ၜးပ္ဍဲစၠတ်ထဝ် အတိုၚ်သၞောဝ် ၂၀၀၈ ပၠန်။
ရဲမေန်အံၚ်လှာၚ်တအ် ကော်ဘိက် တက်ကျာဂွံၜိုဟ်လလံ၊ ဂွံသောၚ်ကလးပရေၚ်ဍုၚ်ကွာန်လ္တူခုၚ်ဂးတုဲ ယၟုဂှ် ကလၚ်ခိုဟ်ပိက်မံၚ်၊ ဆဂး ကာလအာတက်ကျာကွေံကွေံဂှ် ဍေံတအ် ရပ်လဝ်မူတြေံ မတွံဂး ဖျေံလွဟ်၊ ပံက်ဗော်ပရေၚ်ဍုၚ်ကွာန်၊ လုပ်ဒုၚ်ရုဲမာဲ၊ အာတ်မိက်ပ္ဍဲစၠတ်ထဝ် သၟဝ်သၞောဝ် ၂၀၀၈ ဖအိုတ်ရ။
မုဟိုတ်ဍေံတအ် ဂန်ရပ်လဝ်မူဂှ်ရော ချပ်ဗ္စာမဂး ဂွံညာတ်ကေတ်ကၠးမံၚ်ရ။ ဂကူဍောတ်ဍောတ်တအ်ဂှ် ပံက်ဗော်ပရေၚ်ဍုၚ်ကွာန်တုဲ လုပ်ဒုၚ်ရုဲမာဲလေဝ် ဂွံဇၞးမာဲ ပ္ဍဲဒေသဇကုညိညရ။ ဂွံမာဲညိည၊ ဂွံအမာတ်ၜါပိတုဲ တိုန်အာတ်အခေါၚ် ပ္ဍဲစၠတ်ထဝ်တေံမဂး စိုပ်အတေံ ရဲပၞာန်ဗၟာတအ်ကဵု အမာတ်ဗော်ဗၟာတအ် မပ္တံ ကျဖောတ်၊ အေန်အေလ်ဒဳတအ် ဖအိုတ် အုပ်လဒီုလဝ်တုဲ ဍေံတအ်ဟွံကဵုမဂး မွဲအယုက်ကဝ်လေဝ် ဂွံဟွံမာန်၊ အမာတ်ဗော်ပရေၚ်ဍုၚ်ကွာန်တအ် ကဵုပၠန်လဝ်ကဵုဒှ်ကၠာရ နူဒပ်ပၞာန်ဗၟာတအ် ၂၅% ဟွံကဵုမဂး ဟွံဂွံပၠန်ရ။
သရောပ်ထောံမဂး ဍေံတအ်ကော်ဘိက် တက်ကျာၜိုဟ်လလံ ဒုၚ်ယၟုသောၚ်ကလးပြသၞာ ပရေၚ်ဍုၚ်ကွာန်လ္တူခုၚ်တုဲ ထဴကဵုပံက်ဗော်ပရေၚ်ဍုၚ်ကွာန်၊ ကဵုအာတ်အခေါၚ်ပ္ဍဲစၠတ်ထဝ်ဂှ် ရန်တၟံဍေံတအ် ပၠအ်အခိၚ် ဇမၠိၚ်အခါ ပ္တဝ်ဏာဍိုပ်ကဵု ဖအိုတ်ကၠေံပၠန်ဂတး၊ ပရဲပၠန်ဂတး ဂွံဒှ်အာသၟးသၟး၊ ကၞောတ်တဲ ကရေပ်ဓရတ်ကဵုဖျေံလွဟ်၊ ဗ္တိုက်သအးသီလွဟ်၊ ကဵုအပ်လွဟ်တုဲ ကမၠက်ဖအိုတ် ဂစိုတ်ထောံ တၞောဝ်ဒတောဝ်မဗဳဇ ဂကူကောန်ဍုၚ်အရၚ်တအ် ဖအိုတ်ရ။ ဂကူကောန်ဍုၚ်အရၚ်ဖအိုတ်ဂှ် ညံၚ်ဂွံဒှ်အာ မျာန်မာ၊ ဗၟာတုဲ ဂွံကၠေံကၠက်အာဍာ်ဍာဍာ လ္တူကျာဗဳလာရ။
ဂၠံၚ်တရဴ သွက်ဂကူကောန်ဍုၚ်အရၚ်တအ် ဂွံဆက်ဂျိုၚ်အာလမျီု ပ္ဍဲအနာဂတ်ဂတမာန်ဂှ် အဓိကဇၞော်အိုတ် ဒးအာဂၠံၚ်တရဴ ပခိုၚ်ဇြဟတ်စဵုဒၞာဂကူရ။ ဇြဟတ်စဵုဒၞာဂကူဂှ် ဇြဟတ်ပၞာန်၊ ကွတ်ပညာပၞာန်၊ လွဟ်လက်နက်၊ စိုတ်ဓါတ်ဗ္တိုက်ပၞာန်၊ စိုတ်ဓါတ်ပၠန်ဂတး၊ စိုတ်ဓါတ်မၚ်မွဲတၞောဝ်ဒတောဝ်တိဍာ် အာဲကၟာဲလိက်ပတ်ဇကု ဒးပေၚ်ကၟိုဟ်မံၚ်လၟိုန်ဟေၚ်။ နကဵုဂၠံၚ်တရဴဏအ်ဟေၚ် ဂကူဍောတ်ဍောတ်တအ် ကေတ်ဇၞးကၠုၚ်သၞမဟာဝါဒဳ ရဲတၠအဝဵုပၞာန်ဗၟာတအ်တုဲကၠုၚ်ရောၚ်ဂှ် ဂကောံတအာၚ်ပလံၚ်၊ ကဝ်က၊ ဝ၊ ရခေၚ်တအ် ထ္ၜးဏာသက်သဳသာဓက ဂတမတ်တုဲရ။ ဆက်အာဂၠံၚ်တရဴအေန်ဇြဳအေမ္ဂး ဂကူဂှ် ဒးဗၠိုက်ဍာ်ဍာဍာတုဲ ဂုန်ဖဵုသွက်ရဲကၠောန်စလ္တူကျာ သၟာလဗၚ်ၜိုဟ်လလံ (ဝါ) မၞိဟ်စအကြာၜိုဟ်လလံ (ငြိမ်းချမ်းရေးပွဲစား) တအ်ဟေၚ် သှ်ေအာရောၚ်။