ပ္ဍဲပွိုင်ဍုင်ကျာ်ထဝ်၊ တွဵုရးဍုင်မန်ဂှ် ဟိုတ်နူဒပ်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာ၊ ပန်ကဵုစက်ဗရုသာဲ ပွိုင်ၜိုတ် (၂) သတ္တဟပြင်ဂှ်ရ ညးဒေသနူသ္ၚိကၟိန် (၂၅၀) တံ ဒးပဲါဒဴဒၟံင်တုဲ စဵုကဵုတ္ၚဲဏံ က္လေင်စဴဌာန်ဟွံမာန်ဏီရောင် ဂွံတီကေတ်ရ။
စပ္တံနူဂိတုသေပ်တေမ်ဗာ (၂၂) တေံတုဲ ပ္ဍဲကဵုကွာန်အဆက်စပ် မန်-ကရေင်၊ တိဍာ်မဟာဒပ် (၁) ၊ ကေအေန်ယူဂှ် ဟွံဒှ်ပေဲါဗ္တိုက်မွဲသာ် နူကဵုဒပ်ပၞာန်တံ ပန်ဗ္တိုက်ဒၟံင်ကဵုက္ၜင်ကျာတုဲ နူတမ်ဒပ်အမၠံက် (၃၀၁) ကဵု ဌာန်ဂအုပ်ၝောံဒပ် (၄၄) ဂှ်လေဝ် ပန်ပှော်မံင်ကဵုလွဟ်ဇၞော်ကီုရ။
ဟိုတ်ဂှ်ရ ညးဒေသနူကဵုကွာန် ၜိုတ် (၁၀) ကွာန်တံ ဒးပဲါဒဴဒၟံင်တုဲ အပ္ဍဲတ္ၚဲအကြာတဏံ ပရေင်ပန်ပှော်ကဵုလွဟ်ဇၞော်/က္ၜင်ကျာတံ သ္ၚိတ်ဇြအာညိညကီုလေဝ် ညးဒေသတံ ဟွံဂံင်က္လေင်စဴဌာန်ဏီရောင် ညးကဵုဒၟံင်အရီုဗင် ပရေင်ပဲါဒဴဘဲပၞာန်ကျာ်ထဝ်မွဲတၠ ဟီုရ။
“စနူတ္ၚဲဂြာတ်ထောံဖျေံ ဌာနရးပၞာန်တုဲ ပ္ဍဲကျာ်ထဝ်ဂှ် လ္ပာ်တမ်ဒပ် (၃) ကဵု မဟာဒပ် (၁) ၊ အဆက်စပ်မန်-ကရေင်၊ “လေးကေအပေါ်” ဂှ် ဒးဒုင်ဂြာတ်ထောံဖျေံရ။ ဂြာတ်ဖျေံအရိုဟ်တ္ၚဲရ။ ပေဲါဗ္တိုက်လေဝ် ဟွံဒှ်ပုဟ်။ ၜိုတ် (၁၀) ကွာန်နွံရ။ သ္ၚိကၟိန်ဂှ်တှ်ေ (၂၅၀) ရ” သာ်ဝွံ ညးဟီုရ။
ပ္ဍဲပွဳဗွိုင်ဧရိယာ ဒးဒုင်ပန်ဗ္တိုက်ထောံဖျေံဗမ်ကဵုက္ၜင်ကျာဂှ်ဝွံ လာင်ဆက်စၠောံ ပိုတ်သ္ကုတ်ဒၟံင်ဖိုဟ်တုဲ ဟိုတ်နူပန်ပှော်တုဲ မၞိဟ်ဒးဘဲချိုတ်ဂျိုင်ကဵု သ္ၚိဒၟံင်/စမြိုင်ဂမၠိုင် လီုလာ်အာနွံရဂှ်လေဝ် ညးဆက်ဟီုရ။
“လာင်လေဝ် ဟွံဂွံပုဟ်။ သီုဖအိုတ် ပဲါဒဴရ။ သ္ၚိတ်မံင် ၜိုတ်ၜါတ္ၚဲရ။ ဆဂး ဟွံက္လေင်စဴဏီပုဟ်။ ဒၞာဲပြေပြံင်ဂှ် မံင်ဒၟံင်ရ။ ၜင်ကျာမွဲဓဝ် ဟွံသေင်ပုဟ်၊ သီုလွဟ်ဇၞော်၊ စက်ဗရုသာဲ၊ စက်ဗရုသာဲညးဒဳဟွံမွဲတံရ။ ပ္ဍဲဂကောံဇြဟတ် (တလရ) ညးဒးဒုင်ရပ်လေဝ်နွံရ။ ဂွံပရိုင်အေနူဂှ် မဒှ်ရ” သာ်ဝွံ ဟီုရ။
ဂိတုအံက်တဝ်ဗာ စၟတ်တ္ၚဲ (၂) တုဲကၠုင်ဏံဝွံ ဟိုတ်နူဒးကဝေက်ကမ်လွဟ်ဇၞော်ဂှ်ရ ပ္ဍဲကွာန် (ဇီးကုန်း) ဂှ် ကောန်ၚာ်အာယုက် (၃) သၞာံမွဲတၠ ဒးချိုတ်အာတုဲ သၟာင်နူကောန်ကွာန်ချိုတ် ဟွံအောန်နူ (၃) တၠဂှ်မ္ဂး ညးဒးဘဲဝပ်တံလေဝ်နွံရ။
ဂကောံဒပ်ပၞာန်တံဝွံ စနူဂိတုဖေဖဝ်ဝါရဳ (၂၄) ၊ သၞာံ (၂၀၂၁) စဵုကဵုဂိတုသေပ်တေမ်ဗာ ၊ သၞာံ (၂၀၂၆) ဏံဂှ် ပရေင်ပန်ဗ္တိုက်ကဵုက္ၜင်ကျာ (၇၈၉၉) ဝါနွံတုဲ ကောန်ကွာန်ဒးအိုတ်အာလမျီု အောန်အိုတ် (၄၈၃၆) တၠနွံရဂှ် ဂွံတီကေတ် နူတင်နင် Blood Money ရ။
မွဲလ္ပာ်ဂှ်လေဝ် ဂကောံဇြဟတ်ပၠန်ဂတးတံ ဗ္တိုက်သီကေတ်တိဍာ် ဇရေင်ဂကောံဒပ်ပၞာန်တံ ဗွဲမဂၠိုင်မာန်တုဲ သွက်သ္ဂောံက္လေင်ဂွံ တိဍာ်ဆောံလေင်လဝ်ဂမၠိုင်ဂှ်မ္ဂး ဂကောံဒပ်ပၞာန်တံ ပန်ဗ္တိုက်ထ္ပက်ဒၟံင်ပၞာန်ရောင် ဂွံတီကေတ်ရ။