ပ္ဍဲကွာန်တံင်ပရင်၊ ပွိုင်ဍုင်ရေဝ်၊ တွဵုရးဍုင်မန်ဝွံ နူကဵုပၟတ်ချးမသှ်ေသၟေဟ်မွဲကဆံင်ဂှ် သ္ၚိဒၟံင်စတူအာလဝ်ရောင် ညးဒေသ မဆဵုဂဗနမတ်တံ ဟီုရ။
ချးစံင်လဝ် ပၟတ်ဟွံအိုတ်အးဏီ (ပၟတ်မသှ်ေသၟေဟ်မံင်) ကေတ်ဖျဴနင်နူဝါဂှ် ပၟတ်စောဲတူအာကဵု ကပေါတ်မၞုံပ္ဍဲသ္ၚိဒၟံင်ဂှ်တုဲ သၟုဟ်ယက်ဂမၠိုင်တိတ်ကၠုင်မှ ဂွံတီကေတ် ပရူဒဒှ်ပၟတ်တူရ။
ဟိုတ်နူကပေါတ်စက်ပ္ဍဲသ္ၚိဒၟံင်ကဵု သ္ၚိဒၟံင်ဂမၠိုင် ကြပ်စုက်ဒၟံင်တုဲ ပၟတ်ကၠောံထၞာန်မြက်ဇက်ကီုလေဝ် အခိင်နူဂယး ၜိုတ် (၁၁) နာဍဳဂှ် နကဵုအရီုဗင် ဂကောံရီုဗင်ဟံင်ပြာ်မၞိဟ်အပ္ဍဲဒေသ၊ ဂကောံပၠိုတ်ပၟတ် ကေုာံ ညးဒေသတံ ပံင်ကောံပၠိုတ်ပၟတ်မာန်တုဲ ညးဒးဘဲဝပ်ဟွံမွဲရောင် ဂွံတီကေတ်ရ။
“စံင်လဝ်ချး ပ္ဍဲဝါတုဲ ကေတ်ဖျဴနင်သ္ၚိရ။ စွံလဝ် ပ္ဍဲသ္ကဲသ္ၚိဂှ်ရ။ သ္ၚိဂှ်ၜါထပ်တှ်ေ နူကဵုချးဂှ် ပၟတ်စောဲအာရ။ ဂကောံဟံင်ပြာ်တံ စိုပ်ဂတာပ်အခိင်ရ။ ဒှ်မံင်ချး။ တုဲတှ်ေ ကပေါတ်စက်လေဝ် နွံဗွဲမဂၠိုင်တုဲ ပၟတ်ကၠောံမြက်အာရ” သာ်ဝွံ ညးဗြဴဒေသကွာန်တံင်ပရင်မွဲတၠ လဴထ္ၜးလဝ် ပရေင်ဆဵုဂဗညးရ။
နကဵုအရီုဗင်ညးဒေသတံတုဲ ကပေါတ်စကာသ္ၚိလ္ၚဵုဂှ် ပြံင်ဆုဲဏာ ဗွဲမဂတာပ်အခိင်မာန်ကီုလေဝ် ဟိုတ်နူပၟတ်တူဂှ်ရ သ္ၚိဒၟံင် (၂) မ တူပၟတ်ဒှ်ပတေင်တုဲ (၃) မ တူအာပၟတ်ကီုရ။
ဟိုတ်နူဘဲဒဏ်ဂမ္တဴအေဝ်နဳညဵုသ္ကာတ်မြဟ်ဂှ်ရ အသိင်ဂမ္တဴသၠုင်တိုန်မာန်တုဲ ပရေင်ဍာ်ဇတ်ကှ် က္တဵုဒှ်မာန်ရ။ ဟိုတ်ဂှ်ရ နကဵုညးဍုင်ကွာန်ဂမၠိုင်တံ စွံသတိကဵု ဘဲအန္တရာဲပၟတ်ဗွဲတၟေင်ညိဂှ် တၠပညာဗြဲကျာကဵု ဂကောံရီုဗင်ဟံင်ပြာ်ဂမၠိုင်တံ ကဵုလဝ်သတိကီုရ။