ပ္ဍဲကွာန် (သဲချောင်းကြီး) ၊ ပွိုင်ဍုင်တယျက်ချံင်၊ ရးတၞင်သဳဂှ် ကရောင်ပၞာန်ဒပ်ပၞာန်တံ ရပ်စပ်ကောန်ကွာန်ဒုဟ်ဟွံမွဲ (၁) တၠတုဲ ပ္ဍဵုပ္ဍိုက်ပျဲပျာံဂစိုတ်ဏာလဝ်ရောင် ဗော်သွးကရေင် ကေအေန်ယူ ခရိုင်ဗိက်ထဝဲါ လလောင်ပ္တိတ်ရ။
ဂိတုအံက်တဝ်ဗာ စၟတ်တ္ၚဲ (၆) တုဲကၠုင်ဏံ ကရောင်ပၞာန်ပံင်ကောံ တမ်ဒပ် (ခမရ ၄၀၃၊ ၄၀၄၊ ၄၀၉) ဒပ်ပၞာန် မလုပ်စိုပ်ကၠုင် အပ္ဍဲပွိုင်ဍုင်တယျက်ချံင်ဂှ် ရပ်စပ်ဏာ ကောန်ကွာန် သဲချောင်းကြီး) အာယုက် (၂၁) သၞာံမွဲတၠရ။
သၟတ်ဂှ်ဝွံ အဃောအာလ္ပာ်ကွာန် (စုံစင်ဖျား)၊ ကရောင်ပၞာန်ဒပ်ပၞာန်နွံဂှ်တုဲ ဟိုတ်ဖဵုဟွံမွဲ မွဲသာ် ဒးဒုင်ရပ်စပ်လဝ်ရောင် ဂွံတီကေတ် နူညးဒေသတံရ။
အပ္ဍဲပွိုင်ဍုင်တယျက်ချံင် ဒးဆဵုဂဗမံင် ဘဲဒဏ်ဍာ်ဂှ် ဒပ်ပၞာန်တံ ထ္ၜးဟိုတ်ကဵု ပရေင်ဟံင်ပြာ်တုဲ ထ္ပက်မံင်ကရောင်ပၞာန်ဂှ်ရ ကတဵုဒှ်မံင်ပေဲါဗ္တိုက်ကဵု ဂကောံဒပ်ပၠန်ဂတးတံရဂှ် ဂွံတီကေတ် နူဇရေင်ဂကောံဒပ်ပၠန်ဂတးတံရ။
ဂိတုအံက်တဝ်ဗာ စၟတ်တ္ၚဲ (၅) တုဲကၠုင်ဏံဂှ်လေဝ် ပ္ဍဲကွာန် (ပြင်ဖြူကြီး) ၊ ပွိုင်ဍုင်တယျက်ချံင်ဂှ်ဝွံ ဟိုတ်နူကရောင်ပၞာန်ဒပ်ပၞာန် ပန်ပှော်လွဟ်ဇၞော် ဒတုံခတိုဟ်အာတုဲ ညးဗြဴအာယုက် (၄၅) သၞာံမွဲတၠ ဒးချိုတ်အာလဝ်ရ။
ပ္ဍဲပွိုင်ဍုင်ဍာ်ဗု၊ တယျက်ချံင်၊ လံင်လုင် မဒးဆဵုဂဗမံင် ဘဲအန္တရာဲသဘာဝပရေံပရေံဂှ် သၟာင်နူဒပ်ပၞာန်ထ္ပက်ကရောင်ပၞာန်တုဲ ပန်ဗ္တိုက်ထောံဖျေံမံင်ဗမ်ကဵုက္ၜင်ကျာနွံရဂှ်လေဝ် ဂွံတီကေတ် နူဂကောံဒပ်ပၠန်ဂတး အပ္ဍဲဒေသတံရ။
ပ္ဍဲကဵုဇရေင်ဒေသထဝဲါ မဒးဆဵုဂဗဒၟံင် ဘဲအန္တရာဲသဘာဝဂှ်ဝွံ သၟာင်နူဟွံကဵုအခေါင်အာကၠုင်ဗၠးၜး ကုပရေင်ဟံင်ပြာ်ရီုဗင်ဂမၠိုင်တုဲ ဟွံကဵုအခေါင်လုပ်ရီုဗင်ထံက်ပင်မွဲသာ် သီုပလာပ်ပထုဲကဵုမံင်ဒဒိုက်နာနာသာ်နွံရောင် ဒပ်ပၞာန်ဗၠးၜးကောန်ဂကူထဝဲါ လလောင်ပ္တိတ်လဝ်ရ။