အပ္ဍဲပွိုင်ဍုင်တယျက်ချံင်၊ ရးတၞင်သဳ မဒးဆဵုဂဗမံင် ဘဲဒဏ်ဍာ်ဇၞော်၊ တိလာ်ဂှ်ဝွံ ပ္ဍဲဂိတုအံက်တဝ်ဗာ စၟတ်တ္ၚဲ (၁) ၊ နူတနေံဏံ အခိင်ဗ္တံဂှ် နူကဵုဒပ်ပၞာန်တံ သၟာင်နူပန်ဗ္တိုက် ထောံဖျေံဗမ်ကဵုက္ၜင်ကျာတုဲ ပန်ပှော်ဏာကဵု လွဟ်စက်ကီုရောင် အတိုင်တမ်ရိုဟ်ပရိုင်ပၠန်ဂတးဗလးတိတံ ဟီုဂးလဝ်ဂှ် ဂွံတီကေတ်ရ။
က္ၜင်ကျာဗ္တိုက် (ဂျက်ဖိုက်တာ) (၂) ဖ္ဍိုက် တိုန်ကၠုင်နူဌာန်ဂအုပ်ဗဒိုပ်ဒပ်ကျာဗိက်ဂှ် ထောံဖျေံဗမ် ပံင် (၁၅၀) မသုန်မ၊ ပ္ဍဲကြပ်ပွဳဗွိုင်ကွာန် (ဆင်းကျန်း၊ လဘ၊ ပိတ်တိုင်) နွံရဂှ် သ္ကိုပ်ဆက်ဆောံမဟာမိတ် နူတမ်ဒပ် စၟတ် (၂) ၊ ကိုဝ်မေန်ထက် ဟီုရ။
“ဂြာတ်ထောံဖျေံမဗ် ပ္ဍဲကြပ်ပွဳဗွိုင်ကွာန် (ပိတ်တိုင်) ရ။ အကာဲအရာ ဒးဘဲဇီုကပိုက်ဂှ်တှ်ေ ဟွံမိင်ဏီပုဟ်။ က္ၜင်ကျာဗ္တိုက် (၂) ဖ္ဍိုက် တိုန်ကၠုင် နူဌာန်ဂအုပ်ဗဒိုပ်ဒပ်ကျာဗိက်ဂှ် ထောံဖျေံဗမ် ပံင် (၁၅၀) K8W 250 lb cluster boom ၜိုတ် (၅) မရ။ သီုပန်ကဵုလွဟ်စက် 23 mm cannon ကီု” သာ်ဝွံ ညးဟီုရ။
ပ္ဍဲကဵုဒၞာဲဂှ်ဝွံ အကြပ်ဒပ်ပၠန်ဂတးကဵု ဒပ်ပၞာန်တံ ဒှ်မံင်ပေဲါဗ္တိုက် မွဲနှေံမွဲနှေံကီုလေဝ် ပ္ဍဲကဵုအကာဲအရာ အခိင်ဒေံါဇူလဝ်ပၞာန် မွဲလ္ပာ်ကဵုမွဲလ္ပာ်ဏံ ကၠုင်စိုပ်ထောံဖျေံလဝ်ရောင် ညးဆက်ဟီုရ။
ဟိုတ်နူဍာ်ဇၞော်လဝ်တုဲ သွက်လၟေင်ကမၠောန်ဒက်ပ္တန် ညးဍုင်ကွာန်တယျက်ချံင်ဂှ် ဂကောံပၠန်ဂတးတံလေဝ် က္လေင်ဆုတ်ဒပ်၊ ပံက်ဂၠံင်ဍာန်ကဵု ဂကောံဟံင်ပြာ်ဂမၠိုင်တုဲ ဘိုင်ရီုဗင်မံင်ရောင် သ္ကိုပ်ဆက်ဆောံမဟာမိတ် ကိုဝ်မေန်ထက် ဟီုရ။
“အကာဲအရာ ပံက်လဝ်ဂၠံင်ဍာန်ကဵု ဂကောံဟံင်ပြာ်တံရ။ ဒပ်လ္ပာ်ပိုဲတံ သွက်ဂွံက္လေင်ဆုတ်၊ အကာဲအရာ ဘိုင်ရေင်တၠုင်မံင်ကဵု ခက်ခုဲညးဍုင်ကွာန်တံရ။ အကာဲအရာစကၠောန်မံင် ပရေင်က္လေင်ဒက်ပ္တန်ဏံ ကၠုင်ထောံဖျေံဂှ် ကူချပ်ဝါတ်မံင်ရ” သာ်ဝွံ ညးဟီုရ။
ၜိုန်ရဆက်စၠောံသၟာန်သၟုက်လဝ် ဂကောံဒပ်ပၠန်ဂတး မချဳဓရာင် အပ္ဍဲဒေသဂှ်ကီုလေဝ် အကာဲအရာ ဒးဘဲဇီုကပိုက်ဂှ် သ္ပဒ္တန်ဟွံမာန်ဏီ ဂးရ။
ပ္ဍဲပွိုင်ဍုင်တယျက်ချံင်ဝွံ ဂိတုသေပ်တေမ်ဗာ စၟတ်တ္ၚဲ (၂၇၊ ၂၈) တုဲကၠုင်ဏံဂှ် ဍာ်ဇၞော်တုဲ ပ္ဍဲကဵုကွာန်/အရာပ်ဂမၠိုင်ဂှ်မ္ဂး သၟာင်နူကၟဳသ္ၚိဗၠိုက်တုဲ မၞိဟ်ချိုတ်အာလေဝ်နွံရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၃၀) တုဲကၠုင်ဏံဂှ်လေဝ် ပ္ဍဲကဵုကွာန်ယေဝိုင်၊ (အရှေ႕တောဒေသ) ၊ ခရိုင်ထဝဲါဂှ် ဒပ်တၠအဝဵုပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာဏီရ။