အပ္ဍဲတွဵုရးဍုင်မန်ဝွံ ခၟဳသင် ဒဳကွဳစက် ကေုာံ ပရေင်ဒုင်ဒါန်ဟွံဂပ်ဂဝ် ပလီုဓဝ်လျုင်ပတှ်ေသာသနာဂမၠိုင်ဂှ် ဒးဒုင်စၟဳစၟတ်ကေတ်အရေဝ်မာန်ရောင် ဂွံတီကေတ် နူညးရေင်တၠုင်ဒၟံင် ကမၠောန်သာသနာကဵု ခၟဳသင်ဂမၠိုင်တံရ။
ပ္ဍဲကဵုပွိုင်ဍုင်ကျာ်မြဟ်၊ မတ်မလီု၊ မုဟ်ဍုင်လ္ၚဵုတံဂှ် စေဝ်ပၞောန်သွက်ဂွံဒ္ဂေတ်ဗက် ကိစ္စခၟဳသင် ဒဳကွဳစက်ကဵု ပရေင်ဒုင်ဒါန်ဂမၠိုင်ဂှ် စနူလ္ဒောဝ်ဂိတုအံက်တဝ်ဗာတုဲကၠုင်ဏံတုဲ ဂကောံထိင်ဒဝ်စေဝ်ပၞောန်ခၟဳသင် ပွိုင်ဍုင်မဆေင်စပ်တံ ကဵုသမ္တီလလောင်ပ္တိတ်လဝ်ရ။
လိက်လလောင်ကဵုသမ္တီဂှ်ဝွံ သၟာင်နူပလံင်ဗ္စိုပ် ဇရေင်ဘာလကျာ်ဂမၠိုင်တုဲ သီုပစူလဝ်ဝဳနာင်/ပိုဝ်သတာ ဒၞာဲညးအာကၠုင်ဂၠိုင် ကေုာံ ပ္ဍဲဂၠံင်ဍာန်ဂမၠိုင်ရ။
အပ္ဍဲတ္ၚဲအကြာတဏံဝွံ ပ္ဍဲသၞေဟ်ကင်စၟဳစၟတ်ကမ္မယှေန်တံဂှ် ခၟဳသင်ဒဳကၠုင်ကွဳလိုန်ဓာတ် ကေုာံ ကွဳစက်ဂမၠိုင်ဂှ် ဗဒေံါစၟဳစၟတ်တုဲ ဟီုဂးကဵုမံင်သတိနွံရောင် ခၟဳသင်နူပွိုင်ဍုင်ကျာ်မြဟ်မွဲဇကု ဟီုမြော်ရ။
“လၟုဟ်ဏံ နကဵု ကဵုပညာဂှ်တှ်ေ ပင်တဲတုဲ ဒဳဂွိုအ်ပုဟ်ဂှ် ဟီုရ။ အခိင်ကာလကဵုပညာ နွံ (၃) ဂိတုဏောင် မိင်ရ။ လက္ကရဴဂှ်တှ်ေ ဟွံဒ္ဂေတ်ဗက်စေဝ်ပၞောန်တှ်ေ ဗီုကဵုဒးဒုင်ရပ်ကေတ်အရေဝ်မာန်နွံရ။ ပြဟ်ပြဟ်ဏံ ကဵုမံင်သတိဗွဲမစိုပ်တရဴဂှ်တှ်ေ ဒဳကွဳစက်၊ ဒဳကွဳလိုန်ဓာတ်ကဵု ပရေင်ဒုင်ဒါန် ဒၞာဲညးဍုင်ကွာန်တံ အာကၠုင်ဂၠိုင်ဂှ်ရ” သာ်ဝွံ ဟီုမြော်ရ။
ဗွဲကြဴနူအခိင်ကာလကဵုပညာ သၞာံ (၂၀၂၇) မံက်တေံမ္ဂး အကာဲအရာ ကၠောန်သ္ပ ရပ်စပ်ကေတ်အရေဝ်မာန်နွံရောင် ဂွံတီကေတ်ရ။
လိက်လလောင်ကဵုသမ္တီ ဂကောံထိင်ဒဝ်စေဝ်ပၞောန်ခၟဳသင်ဂှ် ထံက်ဂလာန်ဒုင်တၠုင်ကီုလေဝ် နကဵုသၞေဟ်ကင်စၟဳစၟတ်ဂမၠိုင်တံ ဟွံဗက်စအဂတိမွဲသာ် သွက်ဂွံဓမံက်ရုပ်ရဴနတဲဂှ် နွံပၟိက်ရောင် ညးတြုံဒေသမန် အာယုက် (၃၅) သၞာံပြင်မွဲတၠဂှ် ဟီုရ။
“ဂကောံသင်တံ ကၠောန်သ္ပဗီုဏံဂှ် ဒုင်တၠုင်ရ။ ဆဂး ဍုင်ပိုဲတံဂှ် ဒ္ဂေတ်စလာဘ်နွံမံင်တှ်ေ ကာလကၠောန်ကွေံကွေံတှ်ေ စိုပ်တရဴကွေံကွေံဏောင်ဂှ် ဟွံညာတ်ရ။ ဇေတ်ဇေတ်ဂှ်တှ်ေ ခၟဳသင်တံ ဒဳကာဂှ် ဟွံဂပ်ဂဝ်ပုဟ်။ ဟိုတ်နူကာဂှ်ရ ခၟဳသင်လ္ၚဵုတံ ဒှ်လောဘတုဲ ပြိုင်ပ္ကာန်ညးသ္ကံလေဝ်နွံရ။ တုဲတှ်ေ ဗက်ဒုင်ဒါန်သြန် ပ္ဍဲကဵုဖျာဂှ်လေဝ် ဟွံကိတ်ညဳကဵု ဂုန်သိက္ခာခၟဳသင်တုဲ ရံင်စလေဝ်ဟွံခိုဟ်ရ” သာ်ဝွံ ညးဟီုရ။
ပ္ဍဲကဵုပွိုင်ဍုင်ဗွဲမဂၠိုင် မၞုံအပ္ဍဲတွဵုရးဍုင်မန်ဂှ် ထ္ပိုဲခၟဳ၊ သဳလဂမၠိုင်တံ သၟာင်နူဗက်ဒုင်မံင်ဒါန် ပ္ဍဲသၞေဟ်ကွဳစက်၊ သၞေဟ်ကွဳပၟတ်၊ ဒၞာဲဂၠံင်ပန်သွာင် ကေုာံ ပ္ဍဲဆေင်စသုင်ဂမၠိုင်တုဲ ပ္ဍဲကဵုကွာန်/အရာပ်ဂမၠိုင်ဂှ်လေဝ် စကာယၟုသဘင်ကျာ် ကေုာံ ဘာလကျာ်/တိုက်လိက်ဂမၠိုင်တုဲ ဗက်ဒုင်မံင်ဒါန် လုပ်မွဲသ္ၚိတိတ်မွဲသ္ၚိနွံရ။
ပ္ဍဲကဵုလိက်လလောင်ကဵုသမ္တီ ဂကောံထိင်ဒဝ်စေဝ်ပၞောန်ဂှ်ဝွံ နအလဵုထ္ပိုဲခၟဳ၊ သဳလဂမၠိုင်တံ ဒဳကွဳစက်/ကွဳလိုန်ဓာတ်၊ ဍိုက်ကွဳလိုန်၊ ဒဳကွဳသၠာပိ ကေုာံ ပရေင်ဒုင်ဒါန်ဂမၠိုင်ဂှ် စၟဳစၟတ်ကေတ်အာရေဝ်ရောင် ဓမံက်ထ္ၜးလဝ်ရ။
ပွမသုင်အရက်သုရာ ကေုာံ ပွမဗ္ၜူကြာန်ကီု၊ ထ္ပိုဲခၟဳ / သဳလဂမၠိုင်တံ ပပြဘိုက် စမံင်စၞအခိင်ဟွံသေင်ကီု ယဝ်ဆဵုဒးမ္ဂး စၟဳစၟတ်ကေတ်အရေဝ်ရောင်ဂှ် ချူဓမံက်ထ္ၜးလဝ် ပ္ဍဲလိက်လလောင်ဂှ်နွံရ။