ပ္ဍဲကဵုပေါဲပြိုင်လှ်ေ၊ ဒယှ်ေ၊ တိင်တက် ဂကူကောန်ဍုင်အရင် မရနုက်ကဵု (၂၇) ဝါ ကၠောန်ဗဒှ် နေပျဳဒဝ်ဂှ် ကောန်သၟိင်မန် “ဆာန်လွဳ” လုပ်ပြိုင်လှ်ေ စၞးကောန်ဍုင်တွဵုရးဍုင်မန်တုဲ က္လိဂွံဏာ လာဘ်တဆိပ်ထဝ်ရ။
ပေါဲပြိုင်ဂှ်ဝွံ ကၠောန်ဗဒှ်လဝ် ပ္ဍဲဂိတုသေပ်တေမ်ဗါ စၟတ်တ္ရဲ (၂၅) တုဲ ဂကူကောန်ဍုင်အရင် ဗၟာ၊ မန်၊ ကရေၚ်၊ ချေၚ်၊ ကရေင်ဍာဲ၊ သေံ၊ ကချေၚ် ဖအိုတ် လုပ်ပြိုင် (၁၄) တၠဂှ် ဆာန်လွဳ ၜှ်ပလှ်ဏာတဆိပ်ထဝ်ရ။
“ကလိဂွံတဆိပ်ထဝ်ဂှ် ပ္ဍဲကဵုစိုတ်တေံ မိပ်ကွေံကွေံ သက်လဴဟၟဲရ။ ဆာန်လွဳဂ္စာန်ကၠုၚ်ဟီုဂှ် အရၚ်ဆာန်လွဳသၟးဟွံသေၚ် သ္ပစၞးကဵုတွဵုရးဍုၚ်မန်ရ။ တွဵုရးဍုၚ်မန်ပိုဲဏံဂှ်တှ်ေ ကောန်သၟိၚ်မန်ပိုဲ တဴတက်ဗီုဏံ နွံမံၚ်ဏီ မိက်ဂွံဂွံယၟုဗီုဂှ်တုဲ ပြိုၚ်ပ္ကာန်ကဵု ကောန်ဍုၚ်အရၚ်တအ်ရ” သာ်ဝွံ ကောန်သၟိၚ် ဆာန်လွဳ ဟီုရ။
ကောန်သၟိင်ဆာန်လွဳဝွံ လၟုဟ်ဂွံအာယုက် (၃၀) သၞာံ၊ ဇာတိကွာန်ၜါသွာင် ပွိုင်ဍုင်ကျာ်မြဟ်၊ တွဵုရးဍုင်မန်ရ။
နူအခိင်နွံအဝဲကောန်င္ရာ် စနူအာယုက် (၅) သၞာံတေံ လုပ်ကၠုင်လဝ်ပေါဲပြိုင်လှ်ေ ပ္ဍဲနေပျဳဒဝ် (၄) ဝါဆက်က်က်တုဲ ကေင်ဂွံလဝ်တဆိပ်ထဝ် (၁) ဝါကီု၊ ဗွဲကြဴ သ္ပစၞးကဵုတွဵုရးချေင်တုဲလေဝ် ကေင်လုပ်ပြိုင်လှ်ေလဝ် ဗၞတ် (၃) ဝါနွံကီု၊ လုပ်လဝ်ပေါဲပြိုင်လှ်ေ အဆံင်တွဵုရးဍုင်မန်ဂှ်လေဝ် ဂွံကၠုင်လဝ်လာဘ်ပထမနွံကီုရောင် ဂွံတီကေတ်ရ။
“တွဵုရးဂကူချေၚ်တံ ဆဵုဂဗဆာန်လွဳ လ္တူလပှ်ကျာအန်လာၚ်တုဲ ကောန်သၟိၚ်ဏံ သုၚ်စောဲဂွံမံၚ်ဏောၚ်ဂးတုဲ ညးတံ လိင်ကၠုၚ်ဆာန်လွဳ မွဲအလန် (၂၀) ကိုဋ် မံၚ်စံၚ်စသုၚ်၊ အာကၠုၚ်၊ ကယျိုၚ်လ္တက်ဂၠိက်ယာတ် ကောန်သၟိၚ်ဂှ် ကဵုကေတ်တၞဟ်ခြာတုဲ ဆာန်လွဳ လုပ်ပြိုၚ်ပ္ကာန်လှ်ေ နကဵုစၞတွဵုရးချေၚ် (၃) သၞာံအဆက်က်၊ သၞာံဏံ ဟွံဂွံပုဟ်လေဝ် ဇကုကောန်သၟိၚ်ဂကူမန်တှ်ေ ဒးလုပ်ပြိုၚ်ပ္ကာန်စၞး တွဵုရးဍုၚ်မန်ဏောၚ် ဖျေံလဝ်စိုတ်ရ” သာ်ဝွံ ကောန်သၟိၚ် ဆာန်လွဳ ဆက်ဟီုရ။
သၞာံဂတဏံလေဝ် ဆက်လ္ၚတ်အာ ကွတ်ပညာအနုသုခုမနာနာတုဲ သွက်ဂွံဆက်လုပ်ပြိုၚ်ပ္ကာန် ပ္ဍဲနေပျဳဒဝ်ပၠ န်ဂှ် ဖျေံလဝ်အစဳဇန်နွံဂှ်ရ ပရိသာတ်ကောန်ဂကူမန်ကီု၊ ကောန်ဍုၚ်အရၚ်ကီု မၚ်စၟဳ ကဵုဇြဟတ်အိုတ်ပၠန်ညိ ကောန်သၟိင်ဆာန်လွဳဂှ် ဂးကၠုင်ရ။