ပ္ဍဲကွာန် (ကဒိုက်ကလေး)၊ ပွိုင်ဍုင်သဓီု၊ တွဵုရးဍုင်မန်ဂှ် ကောန်ၚာ်အာယုက် (၄) သၞာံမွဲတၠ ဒးဂဂဵုတးပန်တုဲ ချိုတ်အာလဝ်ရောင် ဂွံတီကေတ် နူညးဒေသတံရ။
ပ္ဍဲအရာပ်တၟိ၊ ကွာန် (ကဒိုက်ကလေး)၊ ပွိုင်ဍုင်သဓီုဂှ်ဝွံ ဂိတုနဝ်ဝေမ်ဗာ စၟတ်တ္ၚဲ (၄) တုဲကၠုင်ဏံ အခိင်တ္ၚဲစေင် ၜိုတ် (၂) နာဍဳဂှ် “မောင်ထက်မြက်အောင်” အာယုက် (၁၂) သၞာံ၊ “မရှင်းလင်းထက်” အာယုက် (၈) သၞာံကဵု “မောင်ညဳသုတ” အာယုက် (၄) သၞာံတံ ဝေင်ဒၟံင်ကြပ်ဂအုံချံက်ရ။
အခိင်ကောန်ၚာ်တံ ဝေင်ဒၟံင်ဂှ် ဆေဝ်ပလေဝ်လှာ် ဂဂဵုတးပန်ဂှ်ရ “မောင်ညီသုတအောင်” ဟွံဒးဘဲဝပ်လ္ပာ်မ္ၚးသာ် ဒးချိုတ်အာလဝ်ရဂှ် ညးဒေသမွဲတၠ ဟီုရ။
တုဲပၠန် “မရှင်းလင်းထက်” ကဵု “မောင်ထက်မြက်အောင်” တံလေဝ် ဒးဗွိုင်စက်ဂဂဵုတးတုဲ ဒးအာလဝ်ဘဲဝပ်နွံကီု ဂးရ။
“မရှင်းလင်းထက်” ကဵု “မောင်ထက်မြက်အောင်” (၂) တၠဂှ်လေဝ် ဒးဗွိုင်စက်ဂဂဵုတးတုဲ ဂွံအာဘဲဝပ်ဂှ်ရ ပလံင်ဏာ ရုင်ဂဥုဲပွိုင်တိုက်(သိမ်ဆိပ်)ရ။ “မောင်ထက်မြက်အောင်” ဂှ် ဘဲဝပ်သ္ကာတ်မံင်ညိတုဲ နူကဵုရုင်ဂဥုဲပွိုင်တိုက်(သိမ်ဆိပ်)ဂှ် ထပ်ပလံင်ဏာ ရုင်ဂဥုဲညးဍုင်ကွာန်ခရိုင်သဓီု” သာ်ဝွံ ညးဆက်ဟီုလဝ်ရ။
တုပ်သာ်ဝွံကီု ပ္ဍဲဂိတုအံက်တဝ်ဗာ စၟတ်တ္ၚဲ (၁၀) တုဲကၠုင်တေံ အခိင်ဗ္တမ်ဂှ်လေဝ် “ဦးကျော်သူ” ကေုာံ ကောန်ဝုတ်ညး “မထက်ထက်သူ” ဒၟံင်တန်တဴ ပ္ဍဲအရာပ် (၇) ၊ ကွာန်(ဆင်ဖြူကွျန်း)၊ ပွိုင်ဍုင်သဓီုဂှ်လေဝ် ဒးဗွိုင်စက်ဂဂဵုတးတုဲ ဒးအာဘဲဝပ်ဏီရ။
အပ္ဍဲဂိတုသေပ်တေမ်ဗာတုဲကၠုင်တေံဂှ်လေဝ် အဃောတေအ်မံင်ဗဝ် ပ္ဍဲသၠာတ်ဝေင်ဇြဟတ် မဳတာ (၄၀၀) ၊ ဍုင်မုဟ်ဍုင်ဂှ် ဂဂဵုတးပန်တုဲ သၟာဝေင်ဇြဟတ်ဗဝ် ပၞောန်ဂတမွဲတၠ ဒးချိုတ်အာလဝ်ကီုရ။