နူတနေံဏအ် ဂိတုနဝ်ဝေမ်ဗာ စၟတ်တ္ၚဲ (၉)၊ အခိၚ်ဗ္တမ် (၉) နာဍဳဂှ်ဝွံ ပ္ဍဲသၚ်္ခဠၜုရဳ (ဝၚ်က) ပၞာန်မၚ်ဂီုကၠီုသေံ သၞေဟ်ကၚ်တၞံပကုက်တအ် ထပ်ရပ်ဂွံလဝ် သၟတ်ကောန်ဍုၚ်ဗၟာ ညးကၠတ်လုပ်ဍုၚ်သေံ လၟိဟ် (၇) တၠနွံရောၚ် ဂွံတီကေတ်ရ။
အပ္ဍဲကဵုရပ်ဂွံလဝ် သၟတ်ကောန်ဍုၚ်ဗၟာ ညးကၠတ်လုပ်ဍုၚ် (၇) တၠဂှ်မ္ဂး မၞိဟ်တြုံ (၄) တၠ ကဵု မၞိဟ်ဗြဴ (၃) တၠ သီုကောန်ၚာ် (၃) တၠပါလုပ်မံၚ်တုဲ အဃောကၠတ်လုပ်စိုပ်အာ ကြပ်ကွာန်ဝၚ်က၊ အရာပ်နံၚ်လု ဗဒေါံလဝ်ကွဳစက်ကာ သ္ကဲဂၠံၚ်ဇၞော်ဂှ် ဗၠာဲသၟိၚ်သေံတအ် စၟဳစၟတ်ရပ်ဂွံဏာ သီုကဵုဃံၚ်ညးထပၠုပ်သေံမွဲတၠကီုရ။
ပြဟ်ဟ်ဏအ်ဝွံ သၟတ်ကောန်ဍုၚ်ဗၟာ ညးကၠတ်လုပ်ဍုၚ်သေံ (၇) တၠ ကဵု ဃံၚ်ညးထပၠုပ်သေံ (၁) တၠတအ်ဂှ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်သေံ သၚ်္ခဠၜုရဳ (ဝၚ်က)တုဲ ဆက်စၟဳစၟတ် ကေတ်မံၚ်အရေဝ်နွံရ။
ကောန်ဍုၚ်ဗၟာ ညးကၠတ်လုပ်ဍုၚ်သေံတအ်ဝွံ နူကဵုဒေသပယျဵုသေံ-ဗၟာ ကျာ်ပိဂှ်မွဲတဆံၚ် အဃောကၠတ်လုပ်ဂှ် ဗၠာဲသၟိၚ်သေံ၊ ဒပ်မၚ်ဂီုကၠီုသေံတအ် အဆက်က် ရပ်စပ်ဂွံမံၚ်နွံရ။
အပ္ဍဲပယျဵုသေံ-ဗၟာ လ္ပါ်ဒေသပယျဵုကျာ်ပိဝွံ ပ္ဍဲဂိတုနဝ်ဝေမ်ဗာဏအ်မံက်တုဲဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ရပ်စပ်ဂွံလဝ် ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ် လၟိဟ် (၂၁) တၠနွံရောၚ် ဂွံတီကေတ်ရ။