ဇွောံမကပေါတ်လုပ်ပါင်ဖဴ ဟွံပါဟွံတုဲ ကသိုန်ဗ္ကေတ်ဂှ် လၟုဟ် င္ရုဟ်သၠုင်တိုန်မံင် မွဲပသာ စဵုကဵု (၂၅၀၀၀) ဒ္ကေဝ်ရောင် ဂွံတီကေတ်ရ။
ပြဟ်ဟ်ဏံ င္ရုဟ်နူဒေင်ဂှ် ကသိုန်ဗ္ကေတ်တြေံမ္ဂး မွဲပသာ (၁၅၀၀၀) ဒကေဝ်၊ ကသိုန်ဗ္ကေတ်တၟိမ္ဂး (၁၀၀၀၀) ဒကေဝ်နွံတုဲ စိုပ်ဆေင်ဖျာအကြာကွာန်တအ်ဂှ် ကသိုန်ဗ္ကေတ်တြေံ မွဲပသာ င္ရုဟ်နွံမံင် အကြာ (၂၅၀၀၀) ဒကေဝ်၊ ကသိုန်ဗ္ကေတ်တၟိဂှ် အကြာ (၂၂၀၀၀) ဒကေဝ် သွံတြးမံင်ညးသ္ကအ်နွံအိုတ်ရ။

ဒှ်သာ်ဂှ်ရ မွဲကာလပၞာန်သီအဝဵု အပ္ဍဲပွိုင် (၅) သၞာံပြင်ဏအ် သ္အာင်နူခက်ခုဲကဵု ပရေင်ကမၠောန်ကၟိတ်ဂှ် င္ရုဟ်ကသိုန်ဗ္ကေတ်လေဝ် သၠုင်တိုန်အာ စဵုကဵု (၂၅၀၀၀) ဒ္ကေဝ် ဒှ်ကၠုင်ရ။
“မွဲတ္ၚဲကဵုမွဲတ္ၚဲ ၚုဟ်တိုန်စှ်ေ ဟွံညိၚ်ဝတ်တုဲ ကသိုန်ဗ္ကေတ် တြေံကီု၊ တၟိကီု ၚုဟ်တိုန်ဒၟံၚ်ရ။ တၟော်ရံၚ်ကဵု သၞာံတုဲကၠုၚ်တေံတှ်ေ ၚုဟ်သၠုၚ်တိုန်အာ ဗ္ဒါဲ (၁၀) ဆနွံ” သာ်ဝွံ ညးဗြဴနူဒေသဍုင်မန်မွဲတၠ ဟီုရ။
စပ်ကဵုၚုဟ်ကသိုန်ဗ္ကေတ်ဝွံ တန်တဴကဵု ဒၞါဲဒေသ၊ ကွာန် နွံသ္ရောဲ-နွံကြပ်ကဵုဍုင်ကီု တန်တဴကဵုအဝဲဗ္ၜတ်မကသိုန်ဗ္ကေတ် ဍောတ်-ဇၞော်ကီုတုဲ င္ရုဟ်လေဝ် တၞဟ်ခြာအာနွံကီုရ။
တုဲပၠန် ဒၞါဲရုင်မခြိုင်စွံလဝ် ကသိုန်ဗ္ကေတ် လ္တူဍုၚ်မတ်မလီုတအ်ဂှ် ကသိုန်ဗ္ကေတ်တြေံ ကြပ်အိုတ်မံင်ကၠာလေဝ် ကသိုန်ဗ္ကေတ်တိတ်တၟိ စိုပ်အောန်မံင်ဂှ်ရ င္ရုဟ်ကသိုန်ဗ္ကေတ် ဂွံသၠုတိုန်မံင်သာ်ဏအ်ရောင် ဒေင်ကသိုန်ဗ္ကေတ် နူဍုင်မတ်မလီုမွဲတၠ ဟီုလဴကၠုင်လဝ်နွံရ။
ပ္ဍဲဒၞါဲဒေသမတဵုလွဳကၠောန်ပ္တိတ်မံင်ကသိုန်ဗ္ကေတ် မပ္တံကဵု ရးဒေသအင်ဝ၊ မဂွေ၊ သဂါင်တအ်ဂှ် ဟိုတ်နူဒးဘဲဒဏ်ပွဳပွူသဘာဝ ဍာ်ဗၠိုက်တုဲ ကသိုန်ဂမၠိုင် လီုလာ်အာနွံကီု၊ ဟိုတ်နူအကာဲအရာပဋိပက္ခပၞာန်ဂမၠိုင်နွံကီုတုဲ လၟိဟ်ပ္တိတ်ကသိုန်ဗ္ကေတ် လၟိဟ်ဨကတဵုလွဳကသိုန်ဗ္ကေတ် အောန်စှ်ေဗ္ဒါဲကဝက်ဒှ်ရောင် ဂွံတီကေတ်နူညးသွံရာန်မံင်ဗၞိက်ဗွဝ်ဖျာ ဒေသပယျဵုမွဲတၠ ဟီုရ။
