ပ္ဍဲတွဵုရးဍုင်မန်ဝွံ ၚုဟ်သြောံကသီုပံက်ဒၟံင် စဵုကဵု (၅၀) ကိုဋ်ပြင်နွံကီုလေဝ် သြောံတိတ်အောန်မာန်ရောင် သၟာဗ္ၚတံ ဟီုဂးချိင်ဆလဝ်ရ။
အပ္ဍဲဗွဝ်ဖျာမ္ၚးဝွံ ဂကူသ္ၚုဍိုန် (ဆန်ချော) တိတ်နူဒေသမန် သြောံ (၁၀၀) နဂှ် ကလိဂွံမံင်ၚုဟ် စဵုကဵုကြပ် (၆၀) ကိုဋ်တုဲ ဂကူအဇာလဒေါဝ် သြောံ (၁၀၀) နဂှ်မ္ဂး ကလိဂွံမံင်ၚုဟ် (၅၀) ကိုဋ်ပြင်ဂှ်ရ ၚုဟ်ခိုဟ်နူသၞာံတုဲတေံ ကြပ်ကဝက်ရ။
သၟာဗ္ၚတဵုသြောံကသီုတံဝွံ အဃောတဵုသြောံဂှ် တၞံဗၠိုက်ဍာ်ကီု၊ တၞံဒေါမ်စှ်ေကီု၊ ဒးစၟကီုဂှ်ရ မသြောံဟွံအံင်၊ ဒကောင်သြောံဟွံဍိုက်ပေင်တုဲ စၞးတိတ်မံင်ဓမ္မတာ (၁၀၀) နဂှ် ၜိုတ် (၇၀) နဟေင် ကလိဂွံမာန်ရောင် သၟာဗ္ၚ နူကွာန်ကြေဝ်ဏာမွဲတၠဂှ် ဟီုရ။
“အဃောဗြဲဂူဂှ် ဍာ်ဇၞော်လဝ်တှ်ေ သြောံဗၠိုက်ဍာ်ရ။ မသြောံဟွံအံင်မွဲသာ် ဒကောင်ဟွံပေင် ဒှ်မံင်ရ။ က္လေင်တဵုတုဲတှ်ေ ထပ်ဗၠိုက်ဍာ်ရ။ (၁၀၀) ဂှ်တှ်ေ ၜိုတ် (၇၀) ဟေင်ဂွံရ။ တၞံလေဝ်ဂၠေံရ။ ၜိုတ်ပ္တိတ်တမ်မာန်ဂှ်ရကၠောန်” သာ်ဝွံ ညးဟီုရ။
အခိင်လၟုဟ်ဏံဝွံ သြောံတြေံဂမၠိုင်ဂှ် ၚုဟ်ဟွံစှ်ေမွဲသာ် ပရေင်သွံရာန်ဓမ္မတာနွံတုဲ သြောံမံက်တိတ်တၟိဂမၠိုင်ဂှ်လေဝ် တိုန်စှ်ေဟွံမြက်မွဲသာ် ပရေင်သွံရာန်ဓမ္မတာရဂှ်လေဝ် ဂွံတီကေတ် နူသၟာဗၞိက်ဂမၠိုင်တံရ။
အပ္ဍဲတ္ၚဲကၠာဟွံဂွံရတ်သြောံဏီဂှ် ဟိုတ်နူဒးစၟ (ဆစ်ပိုး) ဂှ်ရ သၟာဗ္ၚအပ္ဍဲပွိုင်ဍုင်ပံင်တံ သြောံမွဲဨက တိတ်မံင်အကြာ (၂၀) နဟေင်ရဂှ် သၟာဗ္ၚကၠောန်မံင်ဝါ (၂၀) ဨက နူပွိုင်ဍုင်ပံင်မွဲတၠ ဟီုရ။
“သၞာံဏံသြောံခိုဟ်တှ်ေ ရန်လဝ်ၜိုတ် (၅၀) ရ၊ ဆဂး ဒးအာစၟတှ်ေ မွဲဨက (၂၀၊ ၁၀) လေဝ် တိတ်နွံရ။ ဝါဒးအာစၟ ၜိုတ်ပိဂအုံမွဲဂအုံနွံရ။ ဆဂး ၚုဟ်သြောံဂှ် ပံက်ဒၟံင် (၄၀) ပြင်ကီုလေဝ် ဟွံဂွံသြောံပၠန်ပုဟ်” သာ်ဝွံ ညးဟီုရ။
သၟာင်နူအခိင်တဵုသြောံလဇုဲဂှ် ဟိုတ်နူဥတုရာသဳပြံင်လှာဲဂှ်ရ တိကှ်တုဲ သွက်ပရေင်တဵုလွဳမ္ဂး ဒးဗဒဗဒဲါတမ်ရိုဟ်ဍာ်ဂၠိုင်ကၠုင်ဂှ်ရ ဟိုတ်နူအကာဲအရာ ၚုဟ်ကၠေင်ဓာတ်က္ဍင်တုဲ သၞာံဏံ သၟာဗ္ၚဒေံါဇူလဝ်ကမၠောန်ဝါဗ္ၚ ဂၠိုင်မံင်ရဂှ်လေဝ် ဂွံတီကေတ်ရ။
ပ္ဍဲကဵုဝါဗ္ၚမုဟ်ဍုင် သြောံဟွံဗၠိုက်ဍာ်၊ ဟွံဒးစၟတံဂှ်မ္ဂး သွက်သြောံသ္ဂောံတိတ်ခိုဟ်ဂှ် သၟာဗ္ၚဂမၠိုင်တံ စၟဳကေတ်လဝ်တုဲ အခိင်ကၠာတ္ၚဲရတ်ဟွံစိုပ်ဏီဂှ် ပရဟ်ဒုင်စဵုဒၞာဒၟံင် ဘဲအန္တရာဲစၟစၟောန်ရဂှ်လေဝ် ဂွံတီကေတ်ရ။
ပ္ဍဲတွဵုရးဍုင်မန်ဝွံ ဇၟာပ်သၞာံ တဵုမံင်သြောံကသီု ကြပ် (၇) ကိုဋ်ဨကနွံတုဲ သြောံတိတ် (၄၃၀) ကိုဋ်နပြင်ရ။ သြောံတိတ်ကၠုင်ဂမၠိုင်ဂှ်ဝွံ သၟာင်နူစသုင်အပ္ဍဲဒေသတုဲ ပလံင်ဗ္စိုပ်သွံကဵု တွဵုရး ကေုာံ ရးတၞဟ်တေံရ။
ဇၟာပ်သၞာံ ဟိုတ်နူဘဲဒဏ်ဥတုရာသဳ၊ ဘဲစၟပလီုသြောံ၊ ဘဲဒဏ်ၚုဟ်တဵုက္ဍင်၊ ဘဲဒဏ်ဝါတ်သၟာကမၠောန်၊ ဘဲဒဏ်ကၠေင်စက်ဟွံရုံဂပ်တုဲ ကျဒၟံင်ကီုလေဝ် ဟိုတ်နူဒှ်ကမၠောန်ကၟိတ် တၞောဝ်ဒတောဝ်မိမဇုဇဗဴလဂှ်ရ နဲဂွံဂှ် ဆက်ကၠောန်ၜိုတ်ဒၟံင်ရ။
နူကဵုညးတာလျိုင်မဆေင်စပ်တံ ကဵုရီုဗင်ထံက်ပင်အောန်တုဲ ဟိုတ်နူၚုဟ်စရိတ်သၠုင်တိုန်ဂှ်ရ အဆက်ဖဵုဒေံါကမၠောန်ဝါဗ္ၚဂၠိုင်ကၠုင်ဂှ်ဝွံ ပ္ဍဲကာလဍာ်ဇမၠိင်မ္ဂး သကဵုဖဵုတိုန်စိုပ် လ္တူပရေင်ပ္တိတ်သြောံအပ္ဍဲဒေသမန် ကေုာံ ပရေင်သၠဲလးဇွောံမစၞစအပ္ဍဲဒေသ ဒှ်ကၠုင်မာန်ရောင် တၠပညာပရေင်တဵုလွဳတံ သ္ၚဳဂၠိပ်လဝ်ရ။