အပ္ဍဲဒေသမန်ဝွံ ကၠောန်ဗဒှ်သဘၚ်အခိုက်ကၞာကဵုဒါန် လလးကထိုန်ကီုလေဝ် ညးရာန်ကပေါတ်ကဵုဒါန်ဂမၠိုၚ် အောန်ဒၟံၚ်ဂှ်ရ ဇြဟတ်သွံစှေ်မံၚ် “သွံဟွံခိုဟ်ကွေံ” ရောၚ် အတိုၚ်ဆေၚ်သွံကပေါတ်သ္ၚာတံ ဟီုဂးလဝ်ဂှ် ဂွံတီကေတ်ရ။
ဇၟာပ်သၞာံ အခိၚ်လလးကထိုန်ဝွံ ညးတၠဒါန်ဗုဒ္ဓဘာသာဗွဲမဂၠိုၚ်တံ သ္ပကုသဵုကဵုဒါန် သ္ၚာ၊ ဇံၚ်ဝတ္ထုနာနာ၊ ကပေါတ်ကဵုဒါန်ဂမၠိုၚ် ကေုာံ ကဵုဒါန်ပိဏ္ဍပါတ်ရ။
သၟာၚ်နူကဵု ပရေၚ်ကြေပ်ဂြတ်စသုၚ်မံၚ်စံၚ် အကာဲအရာလၟုဟ်ဏံတုဲ ဟိုတ်နူဗီုပြၚ်ကဵုဒါန်လလးကထိုန် ပြံၚ်လှာဲကၠုၚ်ဂှ်ရ သ္ၚာ ကေုာံ ကပေါတ်ကဵုဒါန်ဂမၠိုၚ် ဇြဟတ်သွံ (ကြဳ) အောန်စှေ်အာ ဗွဲမကၠးဖ္ဍးရောၚ် ညးဗြဴနူဆေၚ်သွံသ္ၚာ ဍုၚ်မတ်မလီုမွဲတၠ ဟီုရ။
“ဗီုကၠာတေံဂှ် သွံသ္ၚာ ဟွံမြက်ရပုဟ်။ ပ္ဍဲကဵုလလးလၟုဟ်ဏံ ကဝါ်ဇံၚ်ဏောၚ်၊ ကၠာတေံဟီုတှေ် ကပေါတ်ရပ်ဂှ်လေဝ် သွံဂွံဏီရ၊ ဗီုကဵုဂအုပ်တံ မုတံလေဝ်၊ လၟုဟ်ဏံ မုဟွံရပ်မွဲသာ် လှေ်မံၚ်အတိုၚ်ဏံရ” သာ်ဝွံ ညးဟီုရ။
ဟိုတ်နူအကာဲအရာ ပရေၚ်ဂီုကၠီုတုဲ သဘၚ်ကဵုဒါန်လလးကထိုန်ဂမၠိုၚ်ဂှ် ဒးကၠောန်မံၚ်ကဵု သၞောတ်ဗ္ၜတ် (အပိုၚ်အခြာ) တုဲ ပ္ဍဲဒေသလ္ၚဵုတံဂှ် ပေဲါသဘၚ်မိပ်ဇြိပ်ဂမၠိုၚ်ဂှ်ဟေၚ် ကဵုဖျုန်ကၠောန်ကၠုၚ်ရ။
အပ္ဍဲအခိၚ်လလးကထိုန်လၟုဟ်ဏံဝွံ ကပေါတ်ကဵုဒါန်လ္ၚဵု ၚုဟ်မးတိုန်ကၠုၚ်ဂှ်ရ သ္ၚာလလးမွဲစုံဂှ် အောန်အိုတ် ၚုဟ်နွံဒၟံၚ် အကြာ (၂) ကိုဋ်တုဲ သ္ၚာဖျုန်တောဝ်မွဲစုံ နူ (၁) ကိုဋ် (၄) ဠက် စဵုကဵု (၁၀) ကိုဋ်နွံရ။
ညးဗြဴဒေသကျာ်မြဟ် ပါလုပ်ဗပေၚ်ဇြဟတ် ပ္ဍဲသဘၚ်ကဵုဒါန်လလးကထိုန်ကွာန်မွဲတၠဂှ် “လောန်ကၠုၚ်ၜိုတ်ပိပန်သၞာံတေံတှေ် သွက်ဂွံဗ္ဂိန်သ္ၚာဂှ်တှေ် ဂကောံသ္ၚိကၟိန်မွဲမွဲတၠဂှ် ဒှ်ရာန်ကဵုသ္ၚာရ။ လၟုဟ်ဏံ ဟိုတ်နူၚုဟ်မးဖျာတုဲ ပဟွံမာန်ရပုဟ်။ ၜိုတ်ပမာန်ဂှ်ဟေၚ် ကဵုဒါန်ရ။ မိက်ဂွံကဵု ဗီုညးတၞဟ်ကီုရ” သာ်ဝွံ ဟီုရ။
စပ္တံနူဂိတုဝှ် (၁) စွေက် စဵုကဵုဂိတုကထိုန် (၁) စွေက်ဏံ ကောန်ဗုဒ္ဓဘာသာတံ စၟတ်ကေတ်လဝ် နဒဒှ်အခိၚ်ကာလ လလးကထိုန်တုဲ ပ္ဍဲကဵုဘာလကျာ်ဒေသမန်ဂမၠိုၚ်ဂှ်ဝွံ ကၠောန်ဗဒှ် လလးပံၚ်ကောံ၊ လလးမွဲမွဲတၠနွံရ။
ဟိုတ်နူၚုဟ်မးကပေါတ်ဖျာသၠုၚ်တိုန်ဂှ်ရ စၞးကပေါတ်ဒါန်ဂမၠိုၚ်ဂှ် အဓိက ဗ္ဂိန်ကၠုၚ်သြန်ဂမၠိုၚ်ဟေၚ်တုဲ သဘၚ်လလးကထိုန်ဂမၠိုၚ်လေဝ် ကဵုကၠုၚ်ဖျုန်ကဵု ပေဲါသဘၚ်မိပ်ဇြိပ်ဂမၠိုၚ်ဂှ်ရ ရှ်သာလလးကထိုန်ကၠေံမံၚ်ရဂှ်လေဝ် ညးဒေသလ္ၚဵုတံ ဟီုဂးပါ်ပဲါကၠုၚ်နွံရ။