ပ္ဍဲကဵုကွာန်ဖဠာန်ပါင်ကြုင်၊ မၞုံအပ္ဍဲတိဍာ်ဗော်ဍုင်မန်တၟိ NMSP ၊ ဒေသကၞောတ်ၜဳရေဝ်၊ တွဵုရးဍုင်မန်ဂှ် ဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကုက္ၜင်ကျာဂှ်ရ ညးဗြဴအာယုက်ဇၞော် (၁) တၠ ဒးချိုတ်အာတုဲ ညး (၂) တၠ ဒးအာဘဲဝပ် ဗွဲမသ္ကာတ်မြဟ်ရဂှ် ဂွံတီကေတ် နူညးဒေသတံရ။
ဂိတုနဝ်ဝေမ်ဗာ စၟတ်တ္ၚဲ (၁၅) ၊ နူတနေံဏံ အခိင်ဗ္တံ (၁၁) နာဍဳကဵု ဂိတုနဝ်ဝေမ်ဗာ စၟတ်တ္ၚဲ (၁၆) ၊ တ္ၚဲဏံ အခိင်နူဂယးပြဟ် ၜိုတ် (၂) နာဍဳဂှ် ဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကုက္ၜင်ကျာ Y-12 (၂၀) မပြင် ပ္ဍဲကွာန်ဖဠာန်ပါင်ကြုင်ကဵု ကြပ်ပွဳဗွိုင်ဂှ် အဆက်ဆက်နွံရ။
ဟိုတ်နူပန်ဗ္တိုက်ထောံဖျေံဗမ်ဂှ်ရ ညးဗြဴအာယုက် (၇၀) သၞာံပြင်မွဲတၠ မၞုံဒၟံင်ပ္ဍဲသၟိဂှ် ဒးကဝေက်ဗမ်ချိုတ်အာတုဲ ညးဗြဴအာယုက် (၅၀) သၞာံပြင်မွဲတၠကဵု သၟတ်အာယုက် (၂၀) သၞာံပြင်မွဲတၠလေဝ် ဒးအာဘဲဝပ် ဗွဲမသ္ကာတ်မြဟ်ရောင် ညးဒေသမွဲတၠ ဟီုရ။

“ထောံဖျေံဗမ် အလန်ပထမဂှ်တှ်ေ ညးဗြဴအာယုက်ဇၞော် နွံပ္ဍဲသ္ၚိဂှ် ဒးကဝေက်ဗမ်တုဲ ချိုတ်အာရ။ ကောန်ကွာန်တံ ဖေက်တုဲ သွက်ဂွံဂြိပ်တိတ်ဂှ် ပလေဝ်ပလေတ်ရ။ အေအခိင်ဂှ် ဂြိပ်တိတ်အာကဵုကာဂှ် ဗီုကဵုမုပဂွံဂြိပ်တိတ်ဂးတုဲတှ်ေ ၜင်ကျာက္လေင်ဂေတ်ကၠုင်တုဲ ထောံဖျေံဗမ်ကဵုကာရ။ ဟိုတ်ဂှ်ရ မၞိဟ်နွံပ္ဍဲကာတံ ဒးအာဝပ်သ္ကာတ်မြဟ်ရ။ အလန်ပထမဂှ် ဗမ် (၂၂) မ၊ အလန်ဒုတိယဂှ် ဗမ် (၂) မ ထောံဖျေံလဝ်ရ” သာ်ဝွံ ညးဟီုရ။
အပ္ဍဲဗ္တိုက်ကဵုက္ၜင်ကျာဂှ်ဝွံ သၟာင်နူမၞိဟ်ဒးဘဲဝပ်ချိုတ်ဂျိုင်တုဲ သ္ၚိဒၟံင်၊ ကွဳစက်မွဲဖ္ဍိုက်ကဵု တၞံသတ်ဂမၠိုင်လေဝ် လီုလာ်အာနွံရောင် ဂွံတီကေတ်ရ။
အခိင်လၟုဟ်ဏံ ညးဒေသကွာန်ဖဠာန်ပါင်ကြုင်ကီု သီုညးမၞုံကြပ်ပွဳဗွိုင်တံဂှ် ဒးဂြိပ်ပဲါဒဴအာ ဒၞာဲဗၠးဘဲတေံရောင် ညးဒေသလ္တူဂှ် ထပ်ဟီုလဝ်ရ။
“ပြဟ်ပြဟ်ဏံဂှ်တှ်ေ ညးဒေသတံဖအိုတ် ပဲါဒဴဏောင်။ အပ္ဍဲကာလဏံ ဂွံမံင်ပ္ဍဲကွာန်ဂှ် ပြေပြံင်ဟွံမာန်ဏီပုဟ်။ ပတှ်ေဟွံဂွံပုဟ်။ ဟိုတ်ဂှ်ရ ဒၞာဲဗၠးဘဲဂှ်ဟေင် ဒးပဲါဒဴသီုဖအိုတ်ဏောင်” သာ်ဝွံ ဟီုရ။
ပ္ဍဲဒေသပွဳဗွိုင်ကၞောတ်ၜဳရေဝ်ဂှ်ဝွံ နူဒပ်ကမ္မယှေန်ပၞာန်တံ ကၠောန်သ္ပသၠုင်ပ္တိုန်ကၠုင်အသိင် ပရေင်ထံက်ကင်ကဵုက္ၜင်ကျာနွံရောင် ညးဒေသတံ ဟီုရ။
ပ္ဍဲကဵုဒေသကၞောတ်ၜဳရေဝ် ဟွံကတဵုဒှ်ပေဲါဗ္တိုက်ဂှ်ဝွံ စနူဂိတုမေတုဲကၠုင်တေံရ နူဒပ်ကမ္မယှေန်ပၞာန်တံ သၟာင်နူကၠောန်သ္ပထံက်ကင် ကုက္ၜင်ကျာအရိုဟ်တ္ၚဲတုဲ ပရေင်ပန်ဗ္တိုက်ထောံဖျေံဗမ် ကုက္ၜင်ကျာဂှ်လေဝ် ကၠောန်သ္ပကၠုင်မံင်အဆက်ဆက်နွံရောင် ဂွံတီကေတ် နူညးဒေသတံရ။
