ပ္ဍဲကဵုပေဲါရုဲမာဲအကြာ ဂကောံဒပ်ပၞာန်ကၠောန်ဗဒှ်ဏံဂှ် ဗော်ညဳသၟဟ်မန် လုပ်ပြိုင်ပ္ကာန်အာရောင် ဂွံတီကေတ် နူက္ဍိုပ်သ္ကိုပ်ဗော်တံရ။
ပေဲါရုဲမာဲအကြာဏံဝွံ ပ္ဍဲဂိတုဨဗြဴ စၟတ်တ္ၚဲ (၄) ၊ သၞာံ (၂၀၂၇) တေံ ကၠောန်ဗဒှ်အာ ဒၞာဲဆန္ဒမာဲကၠတ်ထဝ် (၅၅) ဒၞာဲ သီုပါလုပ်ဒၞာဲဆန္ဒမာဲ ကၠတ်ထဝ်ညးဍုင်ကွာန် ပွိုင်ဍုင်ကျာ်မြဟ်ဂှ်ရောင် ကမ္မယှေန်ပေဲါရုဲမာဲကၟိန်ဍုင်ဂကောံဒပ်ပၞာန် (UEC) လလောင်ပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၅) တုဲကၠုင်ဏံရ။
နကဵုဗော်ညဳသၟဟ်မန်ဝွံ ၜိုန်လုပ်ပြိုင်ပ္ကာန် ပေဲါရုဲမာဲအကြာကီုလေဝ် အခိင်လၟုဟ်ဏံ ဟွံဂွံရုဲစှ်လဝ် အလံင်ညးစၞးဏီရောင် ညးမၞုံအခေါင်ဟီုဂး MUP နာဲဂံင်လွဳ ဟီုရ။

“နကဵု MUP တှ်ေ ပ္ဍဲကဵုကောံဓရီု CEC ပိုဲတံဂှ် ဖျေံလဝ်သ္ဂုတ်သွာတ်ရ။ ညးဂှ်ပါရော၊ ရုဲညးဂှ်ရောဂှ်တှ်ေ ဟွံဂွံပဏီပုဟ်။ ဟွံဂွံရုဲဏီပုဟ်။ သ္ဂုတ်သွာတ်ဂှ် ဖျေံလဝ်ရ။ သွက်ဂွံပ္တိုန်နွံရ။ နကဵုဗော်ပိုဲ သွက်ဂွံလုပ်ပေဲါရုဲမာဲအကြာဂှ် နွံမွဲဒၞာဲဟီုတှ်ေ သွက်ဂွံလုပ်အကြာနွံရ” သာ်ဝွံ ဟီုရ။
ပေဲါရုဲမာဲသ္ကုတ်ပထမ သၞာံ (၂၀၂၅) တုဲကၠုင်ဏံဝွံ ပ္ဍဲကဵုဒၞာဲဆန္ဒမာဲကၠတ်ထဝ်ညးဍုင်ကွာန် ပွိုင်ဍုင်ကျာ်မြဟ်ဂှ် အလံင်ညးစၞး ဗော်ခိုင်ကၠိုက်ဖောအ်ဗြေဝ် USDP ဥူမျဵုမျေအ် ကလိဂွံဇၞးကီုလေဝ် ဟိုတ်နူခါန်ကၞက်ဏာလဝ် နဒဒှ်ဒုဝန်ဇၞော် ဌာနဝန်ဇၞော်ပရေင်သိုင်ခၞံဂှ်ရ ဒၞာဲညးစၞးကၠတ်ထဝ်ညးဍုင်ကွာန် ပွိုင်ဍုင်ကျာ်မြဟ်ဂှ် သၠးအာရ။
ပ္ဍဲကဵုပွိုင်ဍုင်ကျာ်မြဟ် မကၠောန်ဗဒှ် ပေဲါရုဲမာဲအကြာဏံဂှ်ဝွံ ဟို်တ်နူကွာန်မန်ဇၞော်ဇၞော်ဂမၠိုင် ပါလုပ်ကၠုင်ဂှ်ရ နကဵုဗော်ညဳသၟဟ်မန်ပိုဲ အကာဲအရာမာန်နွံရဂှ်လေဝ် နာဲဂံင်လွဳ ဟီုရ။
မွဲလ္ပာ်ဂှ်လေဝ် ပွိုင်ဍုင်ကျာ်မြဟ် မကၠောန်ဗဒှ် ပေဲါရုဲမာဲအကြာဂှ်ဝွံ ဒှ်မံင်ပဋိပက္ခ ပရေင်ပၞာန်တုဲ ဂိတုနဝ်ဝေမ်ဗာ စၟတ်တ္ၚဲ (၁၂) တုဲကၠုင်ဏံရ ဒပ်မန်ရာမည RMA လုပ်စိုပ်ဗ္တိုက်လဝ် ဗဒိုပ်ဒပ်ကမ္မယှေန်ပၞာန် (၃) ဒၞာဲဏီရ။
ဂကောံဒပ်ပၞာန်သီအဝဵုတံဝွံ ပေဲါရုဲမာဲပတောံဏံဂှ် ကၠောန်ဗဒှ်လဝ် ပ္ဍဲသၞာံ (၂၀၂၅) ဂိတုဒဳဇြေမ်ဗာ (၂၈) ကေုာံ သၞာံ (၂၀၂၆) ဂိတုဂျာန္နဝါရဳ (၁၁) နကဵုၜါသ္ကုတ်ရ။
ဒပ်ပၞာန်သီအဝဵုတံ ကၠောန်ဗဒှ် ပေဲါရုဲမာဲပတောံတုဲ ပြံင်လှာဲအာဗီုပြင်(အယောင်) ကောန်ကွာန်ကီုလေဝ် လ္တူကောန်ညးဍုင်ကွာန်တံဂှ် ကၠောန်သ္ပပကီုပရာပ်ဒၟံင် လၟေင်ဒဒှ်တ္ၚဲရောင် ဂကောံဇြဟတ်ပၠန်ဂတးဂမၠိုင်တံ ဟီုဂးလဝ်ရ။
