ပ္ဍဲသ္ကုတ်သၟဝ်ကျာကအ်ကြိက်၊ တွဵုရးကရေင်ဂှ် ဟွံဒှ်ပေဲါဗ္တိုက်မွဲသာ် ဒပ်ကမ္မယှေန်ပၞာန်တံ ပန်မံင်ကဵု စက်ဗရုသာဲ ကေုာံ လွဟ်ဇၞော် အဆက်ဆက် ပ္ဍဲကွာန်နွံရောင် ညးဒေသတံ ဟီုရ။
စနူဂိတုအံက်တဝ်ဗာမံက်တုဲ ဒပ်ကမ္မယှေန်ပၞာန် ဖျေံသဇိုင် ကအ်ကြိက်ကဵု ကြုင်ဒဵုဂှ် အဓိက ပန်မံင်ကဵု လွဟ်ဇၞော်၊ စက်ဗရုသာဲ လ္ပာ်ကွာန် “နောင်တလာ၊ ဝိဇ္ဇာကုန်း၊ ကွဳမောင်တိုင်၊ မြပတိုင်နိုင် ဒေသသ္ကုတ်သၟဝ်ကျာကအ်ကြိက်ဂှ်ရ။
ဒပ်ကမ္မယှေန်ပၞာန်တံဝွံ သၟာင်နူပန်ဗ္တိုက်မွဲနှေံမွဲနှေံတုဲ လုပ်စိုပ်ဖျေံဒပ်နွံဂှ်ရ ညးဒေသနူကွာန် မၞုံသ္ကုတ်သၟဝ်ကျာကအ်ကြိက်တံ ဒးဂြိပ်ပဲါဒဴမံင်ရ။
“လ္ပာ်သ္ကုတ်သၟဝ်ကျာဂှ်တှ်ေ စကစတံ ကေတ်လဝ်ဒၞာဲဗွဲမဂၠိုင်ရ။ ဟိုတ်ဂှ်ရ ကောန်ကွာန်ဗွဲမဂၠိုင်တံ ဟွံမံင်ပ္ဍဲကွာန်ပုဟ်။ လ္ၚဵုတံဂှ် ပြံင်ကၠုင်မံင် လ္ပာ်သ္ကုတ်သၠုင်ကျာဂၠိုင်ရ။ ညးလ္ၚဵုတံလေဝ် စိုပ်အာသေံရ။ ဟိုတ်ဂှ်ရ မၞိဟ်ဟွံမွဲပ္ဍဲကွာန်ကွေံတှ်ေ ဟွံဒးဘဲချိုတ်ဂျိုင်ကွေံပုဟ်။ ဆဂး သ္ၚိဂှ်တှ်ေ ဒးမွဲနှေံမွဲနှေံရ” သာ်ဝွံ ညးဗြဴမွဲတၠဂှ် ဟီုရ။
ဂိတုနဝ်ဝေမ်ဗာ စၟတ်တ္ၚဲ (၅) တုဲကၠုင်ဏံဂှ် ဟွံဒှ်ပေဲါဗ္တိုက်မွဲသာ် ဒပ်ကမ္မယှေန်ပၞာန် ဖျေံသဇိုင်ကြုင်ဒဵုတံ ပန်ဏာလွဟ်ဇၞော်ဆဆဵု လ္ပာ်ကွာန် “ဝိဇ္ဇာကုန်း” တုဲ ညးတြုံအာယုက် (၄၅) သၞာံမွဲတၠ ဒးကမ်လွဟ်ချိုတ်အာရ။
တုပ်သာ်ဝွံကီု ဂိတုနဝ်ဝေမ်ဗာ စၟတ်တ္ၚဲ (၄) ဂှ်လေဝ် ဒပ်ကမ္မယှေန်ပၞာန်တံ ပန်ဏာမခတိုဟ်ကဵုစက်ဗရုသာဲ (၃) မ ပ္ဍဲကွာန် “မြပတိုင်နိုင်” ဂှ်တုဲ သ္ၚိဒၟံင်ၜါမ လီုလာ်အာကီုလေဝ် မၞိဟ်ဟွံဒးဘဲဝပ်ချိုတ်ဂျိုင်ရ။
မခတိုဟ် ကေုာံ စက်ဗရုသာဲ ဒပ်ကမ္မယှေန်ပၞာန်တံဂှ် ဒတုံခတိုဟ်မံင် လ္တူသ္ၚိညးဍုင်ကွာန် မၞုံအပ္ဍဲကွာန်တံတိုက်ရိုက်တုဲ သ္ၚိဒၟံင် ကေုာံ စမြိုင်လ္ၚဵု လီုလာ်အာနွံရ။
ဒပ်ကမ္မယှေန်ပၞာန်တံ သွက်သ္ဂောံက္လေင်ထိင်ဒဝ် သ္ကုတ်ဂၠံင်ကြုင်ဒဵု-ကအ်ကြိက် ဒပ်ပံင်ကောံပၠန်ဂတးတံ မချဳဓရာင်မံင်ဂှ်တုဲ ပန်ဗ္တိုက်ဒၟံင် ကြပ်ပွဳပွူကွာန်ဂမၠိုင်ဂှ်ရောင် ညးဒေသတံ ဟီုရ။
မွဲလ္ပာ်ဂှ် ဟိုတ်နူပေဲါဗ္တိုက်ကအ်ကြိက်တုဲ ညးဍုင်ကွာန် ဒးဂြိပ်ပဲါဒဴဒၞာဲဗၠးဘဲတံဂှ်လေဝ် သွက်သ္ဂောံက္လေင်လုပ်မံင်ပ္ဍဲကွာန်ဂှ် ဂကောံအုပ်ဓုပ်ကမ္မယှေန်ပၞာန် အပ္ဍဲဒေသတံ ကော်မံင်မွဲနှေံမွဲနှေံရောင် ဂွံတီကေတ်ရ။
ပ္ဍဲကွာန်သ္ကုတ်သၟဝ်ကျာ၊ ပွိုင်ဍုင်ကအ်ကြိက် ဒပ်ကမ္မယှေန်ပၞာန် ထိင်ဒဝ်ဖျေံလဝ်ဒပ်ဂှ် တိုပ်ထောံလဝ်မာင်တိုပ်တိဂှ်ရ ညးဒေသပဲါဒဴဘဲပၞာန်တံ သ္ဂောံက္လေင်စဴဂှ် ဝါတ်ဂါတ်မံင်ရောင် ဂွံတီကေတ် နူတမ်ရိုဟ်ပရိုင်ပၞာန်ကရေင်ရ။