ဟိုတ်နူသၞောတ် QR Quota ဆေင်စပ်ကဵု ဗပေင်ကၠေင်စက် ကမ္မယှေန်ပၞာန်တံတုဲ ဂကောံဟံင်ပြာ်မၞိဟ် မၞုံအပ္ဍဲတွဵုရးဍုင်မန်တံ သွက်သ္ဂောံဂွံကၠေင်စက်ဂှ် စဵုကဵုအခိင်တ္ၚဲဏံ မဒးဆဵုဂဗမံင် တင်ဝါတ်ဂါတ်ဖိုဟ်ရောင် ဂွံတီကေတ် နူညးတာလျိုင်ဂကောံတံရ။
ကွဳစက်ဟံင်ပြာ်ကာတၟေင်ဗွဲမဂၠိုင် မစကာဒၟံင် အပ္ဍဲတွဵုရးဍုင်မန်ဂှ် ဒှ်မံင်ကွဳစက်လာင်ဇြေန်ဟွံမွဲဂှ်ရ သွက်သ္ဂောံဂွံရာန်ကၠေင်စက်ဂှ် နူဂကောံအလဵုအသဳပွိုင်ဍုင် သၟဝ်တဲကမ္မယှေန်ပၞာန်တံ ပ္တိတ်လဝ်ကဵု လိက်ထံက်ဂလာန်အခေါင်ရာန်ရောင် ဂွံတီကေတ်ရ။
ၜိုန်ဂှ်ကီုလေဝ် နူကဵုဆေင်ကၠေင်ဂမၠိုင်ဂှ် သွံဒၟံင်ကဵု QR ဂှ်ရ နကဵုကွဳစက်ဟံင်ပြာ်ကာတၟေင်တံ ဒးဗဒဗဒဲါမံင်ကဵု ကၠေင်စက်နူဗွဝ်ဖျာမ္ၚး အဓိကဖိုဟ်ရောင် ညးတာလျိုင် နူဂကောံဟံင်ပြာ်မၞိဟ် မဖျေံသဇိုင်ပွိုင်ဍုင်မုဟ်ဍုင်မွဲတၠဂှ် ဟီုရ။
“ဟိုတ်နူသၞောတ်စုံ/မဏံတုဲ ပိုဲတံခက်ခုဲရ။ ပိုဲတံထ္ၜးကဵု လိက်ထံက်ဂလာန်/တၞးလိက် ဍိုက်ဍိုက်ပေင်ပေင်ကီုလေဝ် ဍေံတံ ဟွံသွံကဵုပုဟ်။ သွံကဵုတှ်ေလေဝ် သွံကဵုမံင် ၚုဟ်ဒမၠုက်ရ။ ဆဠတှ်ေ မၞိဟ်ယဲနွံမံင်ဖိုဟ်လေဝ် ဍေံတံ ဟွံသွံကဵုပုဟ်” သာ်ဝွံ ဟီုရ။
ဟိုတ်နူရာန်ကၠေင်စက်ဟွံဂွံဂှ်တုဲ ပ္ဍဲပရေင်ကမၠောန်ဟံင်ပြာ် ပလံင်ဗ္စိုပ်မၞိဟ်ယဲဂှ် သၟာင်နူဒးဆဵုဂဗကၠုင် တင်ဝါတ်ဂါတ်ခက်ခုဲဂှ်မ္ဂး ဟိုတ်နူဒးရာန်ကၠေင်စက် နကဵုၚုဟ်မးဒမၠုက်မ္ၚးဂှ်ရ သွက်ဂကောံဂွံတန်တဴ ကေုာံ သွက်မၞိဟ်ယဲဂမၠိုင်ဂှ် တင်ဝါတ်ဂါတ်နွံကၠုင်မာန်ရောင် ဂးရ။
ဂိတုနဝ်ဝေမ်ဗာ စၟတ်တ္ၚဲ (၃) ဏံဝွံ ပ္ဍဲဆေင်ကၠေင်စက်တွဵုရးဍုင်မန်ဂှ် ဒဳဇြာမွဲလဳတာ (၅၂၁၅) ဒကေဝ်၊ ၉၂ မွဲလွဳတာ (၄၈၀၅) ဒကေဝ်၊ ၉၅ မွဲလဳတာ (၄၈၄၅) ဒကေဝ် စၟတ်လဝ်ၚုဟ်ကီုလေဝ် ပ္ဍဲဗွဝ်ဖျာမ္ၚးဂှ်မ္ဂး မွဲလဳတာ အကြာ (၂၀၀) ဒကေဝ် ၚုဟ်သၠုင်မံင်ရ။
ဂကောံဟံင်ပြာ်မၞိဟ် တွဵုရးဍုင်မန် မဒးဆဵုဂဗမံင် ပြဒ္ဒညာကၠေင်စက်လၟုဟ်ဏံဂှ် ပ္တိုန်ထ္ၜးလဝ် ဇရေင်ဂကောံမဆေင်စပ်တံကီုလေဝ် ပရေင်ပြံင်လှာဲဟွံမွဲရောင် ဂးရ။
“ၜိုတ်မုဟ်ဍုင်ကဵု မတ်မလီုဂှ်ရ သွက်ပိုဲတံ ပြဒ္ဒညာဟွံမွဲ။ ဆဂး မၞိဟ်ယဲကာတၟေင် ဒးပလံင်လ္ဂုင်ဏောင်ဟီုတှ်ေ ဒးစုတ်အာ ဇၟာပ်ဆေင်ကၠေင်ရ။ မွဲဒၞာဲတှ်ေ ၜါဠက်ဘာ်၊ ပိဠက်။ ကာလဂှ်တှ်ေ ဘဲအန္တရာဲလမျီုမၞိဟ်ယဲဂှ်လေဝ် ထိခေက်ရ” သာ်ဝွံ ဟီုရ။
စပ္တံနူဂိတုမာတ်မံက်တုဲကၠုင်တေံတုဲ စဵုကဵုအခိင်တ္ၚဲဏံဂှ် ကၠေင်စက်ပိုတ်သ္ကုတ်၊ ရာန်ဝါတ်ဂါတ် ကေုာံ ဒးဆဵုဂဗမံင် ၚုဟ်ကၠေင်စက် က္ဍင်နူရးဒေသဇၞော်/တွဵုရးတၞဟ်ကီုလေဝ် နူဂကောံအလဵုအသဳတွဵုရးကမ္မယှေန်ပၞာန်တံ ဗွဲမစိုပ်တရဴ ပသောင်ကဵုမွဲမွဲသာ် ဟွံမာန်ဏီရ။
ပ္ဍဲတွဵုရးဍုင်မန်ဝွံ အခိင်ကၠာဟွံဂွံသီအဝဵုဂှ်မ္ဂး ဂကောံဟံင်ပြာ်ရီုဗင်မၞိဟ် နွံအကြာ (၁၀၀) ဂကောံတုဲ ကောန်ဂကောံလ္ၚဵုတံ ဆက်စပ်ကဵု ဂကောံဇြဟတ်ပၠန်ဂတးနွံဂးတုဲ ဒပ်ပၞာန်တံ စောတ်စောဲရပ်စပ်ကီု၊ ပွဒးဒုင်ကြတ်(ကၠတ်)ဗ္တိုက်၊ သြန်ဂအုံဟွံပြေံပြံင်ကီု သီုတင်ဝါတ်ခက်ခုဲ သ္ဂောံကလိဂွံကၠေင်စက်ကီုဂှ်ရ လၟိဟ်ဂကောံၜိုတ်ကဝက်ပြင် ဒးဒေံါဇူလဝ်နွံဂှ် ဂွံတီကေတ်ရ။