အာကာ
ပ္ဍဲစၟတ်တ္ၚဲ ၂၂၊ ၜိုတ်အခိၚ်သဝ်တ္ၚဲ ၄ နာဍဳကဝါ်ဂှ် ဆေၚ်ထဝ်မွဲဆေၚ် မၞုံပ္ဍဲအရာပ် ၅၊ လပါ်ပါၚ်မုခ်ဗၟံက် ဖယျာကျဳ၊ ဍုၚ်ဗြဝတဳဂှ် ဒးဒုၚ်ပၠံၚ်ဗတိုက်တုဲ ၜိုန်ရဗၠာဲသၟိၚ်တံ ဗက်ဂၠာဲရပ်မံၚ် ဒမၠတၠတဲတံကီုလေဝ် စဵုကဵုတ္ၚဲဏံ ရပ်ဟွံဂွံဏီရောၚ်ဂှ် ဗၠာဲသၟိၚ် ဍုၚ်ဗြဝတဳ ဟွံမိက်ဓမံက်ယၟုမွဲတၠ ဟီုရ။
“ကဠာဒ္ၚောဝ် စုတ်လဝ်ထဝ်ဂှ် ၜုၚ်ထကးကဵု ကွပ်သေနာတ်တုဲ ဍေံအုဲဏာထဝ်ဂှ်၊ မၞိဟ်နွံသကဲတံဂှ်လေဝ် လှၚ်တုဲ ဗဵုမံၚ်အတိုၚ်ဂှ်ရ။ ထေၚ်ခယျမံၚ် ဂကောံရပ်လွဟ်မွဲမွဲဂကောံတုဲ ညးမွဲလေဝ် ဟွံဂံၚ်ကဵု အရီုအဗၚ်ကဵု တၠဆေၚ်ဂှ်ပုဟ်” သာ်ဝွံ ဗၠာဲသၟိၚ်ဂှ် လဴထ္ၜး အတိုၚ်လၟေၚ်ဒဒှ်ဂှ်ရ။
အတိုၚ်လဴတေၚ်လဝ်ကဵု ဗဒိုပ်ဗၠာဲသၟိၚ်မ္ဂး ဒးဒုၚ်ဗတိုက်ဏာဂှ် ၚုဟ်မး နွံၜိုတ် ပိကၠံကိုဋ်ရောၚ် သ္ဂောံတီကေတ်ရ။
ညးဗြဴမွဲတၠ ကေုာံ ညးတြုံၜါတၠ နကဵုလွဟ်ဇမၠေံ ၂ ဒကိုဟ် လုပ်ပၠံၚ်ဗတိုက်ဏာ ဆေၚ်ထဝ် နာဲသာန်အံၚ်၊ မိယှိုဲတိတ် တံရောၚ်။
“ဒမၠတံ ဖံက်ဏာလွဟ် ၜါလစုတ်တုဲ ကလေၚ်တိတ်အာ နူဆေၚ်ထဝ်ဂှ်၊ မံၚ်ညိဂှ် ပလုက်တံ စိုပ်ကၠုၚ်၊ ညးလဵု ဒှ်တၠတဲဂှ် စဵုကဵုလၟုဟ် ဟွံဂွံသၟူဏီဖိုဟ်၊ ပိုဲဂှ် တ္ၚဲဏံ ဟွံဂံၚ်တိတ်ဆေၚ်တုဲ ဒးကၟာတ်လဝ်ဆေၚ်” သာ်ဝွံ တၠဆေၚ်ထဝ်ဂကူမန် မၞုံဇရေၚ် ဆေၚ်ထဝ် ဒးဒုၚ်ဗတိုက်ဏာဂှ်ရ။
ဒမၠဗတိုက်တုဲ ခြာဟွံလအ်ဂှ် ဗၠာဲသၟိၚ်တံ စိုပ်ကၠုၚ်ဆေၚ်ထဝ်တုဲ ဗက်စၟဳစၟတ် တၠဆေၚ် မၞုံဗဒဲါဗဒဲါ ကေုာံ သၟာကမၠောန်တံအိုတ်ရ။
အခိၚ်ဗတံဂှ် ဖျေံဗပေၚ်လဝ် ဂီုကၠီုတုဲ စဵုကဵုတ္ၚဲဏံလေဝ် ဆက်ဂၠိုက်ဂၠာဲမံၚ် စေအ်စေအ်ဖိုဟ်ဏီရောၚ်ဂှ် တၠဆေၚ်ဖျာ မၞုံဇရေၚ်ဆေၚ်ထဝ် ဒးဒုၚ်ဗတိုက်ဏာမွဲတၠ ဟီုရ။
ဍုၚ်ဗြဝတဳဝွံ ဒှ်ဍုၚ်ပယျဵုကိစ္စဇၞော်မွဲတုဲ ဂီုကၠီုတေၚ်ဂြတ် ဗွဲမလောန်ရ။
သအာၚ်နူဂှ်ပၠန် ဂကောံဒေါံပန်ပှော် မပ္တံကဵု ဂကောံဒဳကေဗဳအေ၊ ကေပဳအာဖ်၊ ကံၚ်ဇြဳပရေၚ်ၜိုဟ်လလမ် ကရေၚ်တံလေဝ် ဖျေံလဝ်သဇိုၚ် လတူဍုၚ်ဗြဝတဳဂှ် နွံရ။
