မိစၠန်ထဝ်

ပယျဵုသေံ-ဗၟာ ပ္ဍဲဍုၚ်ကျာ်ပိ သၟာကမၠောန်ကၠောန်မံၚ် လ္ပာ်သြၚ်သေံတံဂှ် စနူဂိတုဂျောန် ၂၂ ဏံတုဲ စၟဳစၟတ်ကဵုဒၟံၚ်ယဲရ။

ဂွိၚ်ဖောက် ယဲဒဳဗဳ (TB) ကၠောံ အကြာသၟာကမၠောန်တံတုဲ မဒးစၟဳတ်ဗီုဏံရောၚ်ဂှ် ညးမက္ဍိုက်ပ်သၟာကမၠောန်မွဲတၠ ဟီုရ။

“ဍေံတံ စၟဳစၟတ် ဆီကၠာ၊ သီုစၟဳစၟတ်ခရာ၊ တက်တၞးဓါတ်၊ အဓိကဍေံဂှ် စၟဳစၟတ်ကၟယဲဒဳဗဳ (TB) ရလေဝ်၊ တုဲပၠန် သီုစၟဳစၟတ် HIV/AIDS၊ ကၟဇွဟ်ကီု၊ အကြာကမၠောန် ဂွိၚ်ဖေက် ယဲကၠောံဍ ဖေက်ကမၠောန်လီုဂှ်ရ ဒးစၟဳတ်ယဲ” သာ်ဝွံ ညးဟီုရ။

သွက်ဂွံစၟဳစၟတ်ယဲဂှ် အ္စာဂဥုဲ နူကဵုရုၚ်ဂဥုဲ ဍုၚ်သၚ်ခလပူရဳ ခရိုၚ်ကာန်ချနပူရဳ ဍုၚ်သေံတေံကီု သီုကဵုဂကောံ NGOs တံကီု၊ နူကဵုဂကောံပါထနာရက်တံကီု ကေတ်တာလျိုၚ်တုဲ စၟဳစၟတ်ကဵုဒၟံၚ်ရ။

တုဲကၠုၚ် ဂိတုဂျောန် ၁၇ စဵုကဵု ၂၀ ဂှ် စစၟဳစၟတ်လၟိဟ်စာရၚ်သၟာကမၠောန်တုဲ ပ္ဍဲစၟတ်တ္ၚဲ ၂၂ ဏံ စဵုကဵုစိုပ် ဂိတုဂျူလာၚ် ၁၂ တေံ စၟဳစၟတ်အာယဲရောၚ် ညးကြပ်ကဵု သၟာကမၠောန်မွဲတၠ ဟီုရ။

“မွဲတ္ၚဲတှေ် ၜိုတ် ၁၀၀ တၠ ဍေံတံစၟဳစၟတ်ဏောဝ်၊ ကၠာဟွံစၟဳစၟတ်ယဲဂှ်လေဝ် ဍေံတံ တြးလဝ်ကဵုလိက်တၞး စိုပ်ကဵုပရောပရာယဲတံကီုရ၊ ဆဵုယဲတှေ် ဍေံဝဳကဵုဏောဝ်၊ ဟွံပတိတ်ထောံနူကၠောန်ပုဟ်၊ ဆဂး ကဵုလဝ်စာရၚ်တုဲ ဟွံဒုၚ်စၟဳစၟတ်ပုဟ်တှေ် ဍေံပတိတ်ထောံဏောၚ်” သာ်ဝွံ ညးဆက်ဟီုရ။

ပယျဵုဍုၚ်သေံကဵုဍုၚ်ဗၟာ ပ္ဍဲဍုၚ်ကျာ်ပိ လ္ပာ်သြၚ်သေံဂှ် ရုၚ်စက်လၟိဟ်ၜိုတ် (၄၀) ပြၚ်နွံမံၚ်တုဲ၊ မပ္တံကဵု ရုၚ်ဒၞပ်၊ ရုၚ်ကၞဴ၊ ရုၚ်ဇိၚ်ဂၠိက်ယာတ်၊ ရုၚ်မပၟတ်ကေုာံ ရုၚ်သော်ပ္တောံတံ ပါလုပ်ဒၟံၚ်ရ။

ပွမစၟဳစၟတ်ဒၟံၚ်ယဲကဵု သၟာကမၠောန်တံဂှ် အလန်ဏံမ္ဂး ဒှ်ကၠုၚ်အလန် ဒုတိယရရောၚ် ဂွံတီကေတ်ရ။

“ယဝ်ရ ဂွိၚ်ဖေက်ယဲဇကု မံက်အာဂှ်ရ ဟွံဂံၚ်စၟဳစၟတ်ယဲပုဟ်တှေ် မၞိဟ်ဟွံဒုၚ်စၟဳစၟတ်တံဂှ် တၠကမၠောန်တံ ဗတိတ်ထောံနူကၠောန်ဏောဝ် ညးတံဟီုလဝ်၊ သၞာံအာတေံတှေ် ဆဵုဒးစၟယဲ HIV/AIDS ၄ တၠ၊ တၠကမၠောန်ဂှ် ဟွံပတိတ်ပုဟ်၊ ဆဂး သၟာကမၠောန်ဂှ် ဍေံနုက်တိတ်အာကေတ်တ်ရ” သာ်ဝွံ ညးကြပ်ကဵု သၟာကမၠောန်ဂှ် ဆက်ဟီုရ။

သၟာကမၠောန်ကောန်ဍုၚ်ဗၟာ ဗွဲမဂၠိုၚ် ကၠောန်မံၚ်ကမၠောန်ပ္ဍဲရုၚ်စက်ဗီုဏံဂှ် နကဵုတၠရုၚ်စက်တံ ဗီုကဵုလၟုဟ်စၟဳစၟတ်ကဵုယဲတံဂှ် ဒှ်လက်သြန်ခိုဟ်မွဲရောၚ် ရဲဍုၚ်ကျာ်ပိမွဲတၠ ဟီုပါ်ပဲါရ။