လှုဲတာန်မသုန်လ္ၚီ သုၚ်စောဲမံၚ်အခိၚ်တ္ၚဲဏံ
ဌာန်ပရိုၚ်ဗၠးၜးမန်
– နူသ္ကိုပ်ဗျူဟာ (၁) သၞေဟ်ကၚ်ဝၚ်အနာၚ်ဂှ် ရပ်ဂွံလှုဲဗၟာပတောံ ၂၂ ကိုဋ်ဒကေဝ် ကေုာံ မၞိဟ် (၃) တၠ ရောၚ် သ္ဂောံတီကေတ်ရ။ပ္ဍဲဂိတုအဝ်ဂါတ် ၂၂ ဂှ် ဂကူမန် ၂ တၠ မၞုံယၟု နာဲစိၚ် အိန်ထံၚ်ညး မိမူ ကဵု ဂကူသေံမွဲတၠဂှ် သ္ကိုပ်ဗျူဟာရပ်ထောံလဝ်ရ။ ဂကူမန်ၜါဂှ်ဝွံ မတန်တဴဒၟံၚ် ပ္ဍဲဍုၚ်ကျာ်ပိ အရာပ် (၂) ရ။ ညးပိတၠဂှ်ဝွံ နူကြုၚ်ထဝ်ဂှ် စှေ်အာကဵုဂၠုၚ်တုဲ စိုပ်ကဝက်ဂၠံၚ်ဂှ် ပြံၚ်ထောံဂၠံၚ်ကွဳစက်တုဲ စိုပ်ဝၚ်အနာၚ်ဂှ် ဒးဒုၚ်ရပ်ရ။
“ညးပိကဵု အပ္ဍဲညးတံ လှုဲဗၟာပတောံ ၂၂ ကိုဋ္ဋ် ဒးဒုၚ်ရပ်၊ နာဲစိၚ်ကဵု မိမူဂှ် မံၚ်ဒၟံၚ် ပ္ဍဲကဵုအရာပ် (၂) တၟာလအ်ရ၊ ညးတံဂှ် ဒရိပ်ဒၟံၚ်ကွဳစက် ကၠောန်ဒၟံၚ်ပရေၚ်ပိုန်ဒြပ် ဍုၚ်ကျာ်ပိကဵု ဍုၚ်ဇြပ်ဗုတေံ” သာ်ဝွံ ရဲဍုၚ်ကျာ်ပိမွဲတၠ ဟီုရ။
လှုဲပတောံဗၟာ ၂၂ ကိုဋ် ရပ်ဂွံလဝ်တံဂှ်ဝွံ မဒှ်ဒၟံၚ်လှုဲ တာန်လ္ၚီဂှ်လေဝ် ဂွံတီကေတ်ရ။ မၞိဟ်ဒးဒုၚ်ရပ်လဝ်တံဂှ် နူကဵု သ္ကိုပ်ဗျူဟာ (၁) ရပ်ဂွံတုဲ ပလံၚ်ပစိုပ်ဏာကဵု ဌာန်ဂအုပ်ဒိုဟ်အဂၞဲတေံရောၚ် ဂွံတီကေတ်ရ။ အကာဲအရာ လက်ကရဴဏံ မုဆက်ဒှ်ဂှ် ဟွံတီဏီရ။
“ညးတံ စဒၟံၚ်ပုၚ် ပ္ဍဲသၞေဟ်ကၚ် ဝၚ်အနာၚ်ဂှ်၊ လသောၚ်လှုဲကဵု တၠဆေၚ်ဂှ်ရ တၠဆေၚ်ဂှ် စိုတ်ဟွံသၚ်ကာကဵုလှုဲဂှ်တုဲ ကဵုပရိုၚ်ကဵု သ္ကိုပ်ဗျူဟာ (၁) ဂှ်တုဲ ရပ်ထောံဟဂှ်ရ၊ ရပ်တုဲဂှ် ညးတံ ပလံၚ်ဏာ ဌာန်ဂအုပ်ဒိုဟ်အဂၞဲတေံရ” သာ်ဝွံ သၟာပရေၚ်ပိုန်ဒြပ်နူဍုၚ်ကျာ်ပိမွဲတၠ ဟီုရ။
အတိုၚ်ပရိုၚ်သ္ပဒတန်ဟွံဂွံ တိတ်မံၚ်ဂှ်မ္ဂး လှုဲဗၟာပတောံ ဒးဒုၚ်သီလဝ်ဂှ် ကၠောန်ပတိတ် နူပယျဵုသေံကဵုဗၟာ ဍုၚ်ကျာ်ပိတုဲ လှုဲပတောံ ၜိုတ် (၆၀) ကိုဋ် ဒကေဝ် သှေ်ဒၟံၚ်ဏီရောၚ်ဂှ် ပရိုၚ်တိတ်ဒၟံၚ်ရ။
မၞိဟ်ဆက်စပ်ကဵု နာဲစိၚ်၊ မိမူ မသှေ်တဴဒၟံၚ်လ္တူဍုၚ်ကျာ်ပိဂှ် ညးတာလျိုၚ်အလဵုအသဳတံ ဗက်ဂၠာဲစၟဳတ်မံၚ်တုဲ ညးတံ ဒးပါဲဓလေတ်ဒၟံၚ်ရောၚ် ရဲဍုၚ်ကျာ်ပိတံ ဟီုမံၚ်အိုတ်ရ။
0 Comments