မိလျးထဝ် – စနူဂိတု ပသာ် သၞာံအာတေံ အလဵုအသဳပၞာန်ဗၟာတအ် ဟွံကဵုအခေါၚ် ပတိုန်သ္ၚုဂှ်ရ ကွာန်ဗဒိုပ်ဟံၚ်ပြာ် ကေုာံ ကွာန်ပွဳပွူ ဗဒိုပ်ဟံၚ်ပြာ် မၞံုဒေသခရိုၚ်ထဝဲါ ရးတၞၚ်သဳတံ ဒှ်အခက်အခုဲကဵု ဇွောံမသ္ၚုသြောံအိုတ်ရ။ 
နူအခိၚ်လၟုဟ် ညးဒေသ လ္ၚဵုတံဂှ် ဒှ်အခက်အခုဲကဵုသ္ၚုတုဲ ဒးစမံၚ် ပုၚ်ၜိုဟ်အိုတ်ရောၚ် ကောန်ဂကောံမွဲတၠ နူကမ္မတဳ ဟံၚ်ပြာ် ဒဒိုက် ညးဍုၚ်မန်ဂှ် ဟီုလဴအတိုၚ်ညး ဆဵုကၠုၚ်လဝ်ဂှ်ရ။
ဟိုဟ်နူအခေါၚ် ပၠုပ်သ္ၚု ခရိုၚ်ထဝဲါတေံ ဟွံမွဲဂှ်ရ ဂကောံထံက်ပၚ် ရဲဒှ်ဒဒိုက်တံလေဝ် သွက်သ္ဂောံဆက်ရီုဗၚ်အာ ပ္ဍဲသၞာံဏံဂှ် ဒှ်အခက်အခုဲတုဲ ဂၠာဲကၠုၚ်နဲကဲရ။ စၞးပရအ်ကဵုမံၚ်သ္ၚုဂှ် သၞာံဏံ ထံက်ပၚ်ကေတ်သြန်ရောၚ် ညးတံ ချပ်ဇန်လဝ်ရ။
“ယဝ်ရပရအ်သ္ၚုတှေ် သွက်ရဲဒှ်ဒဒိုက်တံဂှ် ဍေံဟွံဒှ်ဒဒိုက်ကွေံကွေံပုဟ်။ ယဝ်ပရအ်ကဵု လှုဲတှေ် ဍေံအိုတ်အာ လောဲလောဲတုဲ သွက်ညးတံ စဟွံရုမ်ဂပ် ဒှ်ကၠုၚ်မာန်ဏောၚ်” သာ်ဝွံ ညးအုပ်ကာ ကမ္မတဳဟံၚ်ပြာ် ဖောအ်ဗြေဝ် ညးဍုၚ်မန် နာဲဗညာအိန် ဟီုရ။
သၞာံတုဲကၠုၚ်တေံဂှ် ကဵုမံၚ်အထံက်အပၚ်ကဵု ရဲဒှ်ဒဒိုက်တံ မွဲသၞာံပိဝါတုဲ မွဲဝါမ္ဂး မွဲတၠ ကဵုသ္ၚုမွဲစေဝ်ရ။ ပိဝါမ္ဂး ဒှ်သ္ၚုမွဲရိုက်တုဲ သ္ၚုမွဲရိုက်ဂှ် နွံၚုဟ် ၂၀၀ ၀၀ ဒကေဝ်ပြၚ်ရ။ ယဝ်ဒှ်ကၠုၚ် အစဳအဇန် ထံက်ပၚ်သြန်မ္ဂး ဟွံပါ်ကဵု ပိဝါတုဲ မွဲဝါဟေၚ် ထံက်ပၚ်ကဵု ကောံကောံကလောံကလောံ အကြာပွဳပွူ ၂၀၀ ၀၀ ဒကေဝ် ဒှ်မာန်ရောၚ် နာဲဗညာအိန် ဟီုရ။
ၜိုန်ဂှ်လေဝ် ပြဟ်ဟ်ဏံဂှ် နူတၠဒါန်တံ ကဵုနၚ်အထံက်အပၚ် မူစိရောဂှ် ဟွံတီချိုတ်တ်ပၠိုတ်တ်ဏီတုဲ ဂလိုၚ်လဵု ဂွံကဵုအထံက်အပၚ်ဂှ် ဟွံဂွံဖျေံသ္ဂုတ်သွာတ်ဏီရောၚ် ညးဆက်ဟီုရ။
သွက်ဇွောံမ ထံက်ပၚ်မံၚ် ပ္ဍဲခရိုၚ်ထဝဲါတံဂှ် ဒးဇက်ပၠုပ်မံၚ် နူတွဵုရးမန်တုဲ ဒးတတ်ကၠေံ ဒဵုဒလဲ ပယျဵုတွဵုရးမန်ကဵု ရးတၞၚ်သဳရ။ လၟုဟ်သၞေဟ်ကၚ် ဒဵုဒလဲ ဟွံကဵုအခေါၚ် ပ္ဍိုက်သ္ၚု လောန်နူ ၜါရိုက်ရ။
ရဲဒှ်ဒဒိုက် ဗဒိုပ်ဟံၚ်ပြာ် ခရိုၚ်ထဝါဲတံဂှ် သွက်ဇွောံမသ္ၚု ဒးရာန်ယိုက်ပတိတ် နူကွာန်ဍာ်ဂမ္တဴ (ရာဖူး) တုဲ နူဂှ်မွဲကဆံၚ် ဒးဖ္ဍိုက်ကဵုဂၠုၚ်ရ။
ဖ္ဋိုက်ကဵုဂၠုၚ်ပၠန် ဒပ်ပၞာန်ဗၟာ ဖျေံလဝ်သဇိုၚ် ပ္ဋဲကွာန်ဍာ်ဂမ္တဴ ခလရ ၁၀၃ ဆဵုဒးမ္ဂး သ္ပပခက်တုဲ ဟွံကဵုအခေါၚ်အိုတ်ရ။
ပ္ဍဲဗဒိုပ်ဟံၚ်ပြာ် ခရိုၚ်ထဝဲါဂှ် ကွာန် ၄ ကွာန် ပါလုပ်တုဲ ကွာန်ညးဒၞာဲဝဲါလီု ဂြိပ်ဒဴပၞာန်လေဝ် ပတန်လဝ် နွံမွဲကွာန်ရ။
ကောန်ကွာန်တံဝွံ ကမၠောန်တဵုဂူဟေၚ် ဒှ်ကမၠောန် ဂယိုၚ်လမျီုညးတံတုဲ ဒးဗဒဗဒါဲဒၟံၚ်ကဵု သြောံဂူညးတံကဵု အရီုအဗၚ် သ္ၚု ဟံၚ်ပြာ်ရ။ ၜိုန်ဂှ်လေဝ် သွက်ညးတံဂှ် စသုၚ်ဟွံရုပ်ဂပ်အိုတ်ရ။